1 Kings 10

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 9 Jump to: Chapter 11 →

1Aur jab Sabá kí malika ne Ḳhudáwand ke nám kí bábat Sulaimán kí shuhrat suní, to wuh áí, táki mushkil suwáloṉ se use ázmáe.

2Aur wuh bahut baṛí jilau ke sáth Yarúshalem meṉ áí, aur sáth sáth úṉṭ the, jin par masálih aur bahut sá soná aur beshbahá jawáhir lade the; aur jab wuh Sulaimán ke pás pahuṉchí, to us ne un sab bátoṉ ke báre meṉ jo us ke dil meṉ thíṉ us se guftogú kí.

3Sulaimán ne us ke sab suwáloṉ ká jawáb diyá: bádsháh se koí bát aisí poshída na thí jo use na batáí.

4Aur jab Sabá kí malika ne Sulaimán kí sárí hikmat aur us mahall ko jo us ne banáyá thá,

5aur us ke dastarḳhwán kí ni‘matoṉ, aur us ke mulázimoṉ kí nishast, aur us ke ḳhádimoṉ kí házirbáshí, aur un kí poshák, aur us ke sáqíoṉ, aur us síṛhí ko, jis se wuh Ḳhudáwand ke ghar ko játá thá, dekhá, to us ke hosh uṛ gaye.

6Aur us ne bádsháh se kahá, ki Wuh sachchí ḳhabar thí jo maiṉ ne tere kámoṉ aur terí hikmat kí bábat apne mulk meṉ suní thí.

7Taubhí maiṉ ne wuh báteṉ báwar na kíṉ, jab tak ḳhud ákar apní áṉkhoṉ se yih dekh na liyá; aur mujhe to ádhá bhí nahíṉ batáyá gayá thá; kyúṉki terí hikmat aur iqbálmandí us shuhrat se jo maiṉ ne suní bahut ziyáda hai.

8Ḳhushnasíb haiṉ tere log, aur ḳhushnasíb haiṉ tere yih mulázim jo barábar tere huzúr khaṛe rahte aur terí hikmat sunte haiṉ.

9Ḳhudáwand terá Ḳhudá mubárak ho jo tujh se aisá ḳhushnúd húá ki tujhe Isráíl ke taḳht par biṭháyá hai: chúṉki Ḳhudáwand ne Isráíl se sadá mahabbat rakkhí hai, is liye us ne tujhe ‘adl aur insáf karne ko bádsháh banáyá.

10Aur us ne bádsháh ko ek sau bís qintár soná, aur masálih ká bahut baṛá ambár, aur beshbahá jawáhir diye; aur jaise masálih Sabá kí malika ne Sulaimán bádsháh ko diye, waise phir kabhí aisí bahutát ke sáth na áe.

11Aur Hírám ká beṛá bhí jo Ofír se soná látá thá baṛí kasrat se chandan ke daraḳht aur beshbahá jawáhir láyá.

12So bádsháh ne Ḳhudáwand ke ghar, aur sháhí mahall ke liye chandan kí lakṛí ke sutún, aur barbat, aur gánewáloṉ ke liye sitár banáe: chandan ke aise daraḳht na kabhí áe the, aur na kabhí áj ke din tak dikháí diye.

13Aur Sulaimán bádsháh ne Sabá kí malika ko sab kuchh jis kí wuh mushtáq húí, aur jo kuchh us ne máṉgá diyá; ‘aláwa is ke Sulaimán ne us ko apní sháhána saḳháwat se bhí ‘ináyat kiyá. Phir wuh apne mulázimoṉ samet apní mamlukat ko lauṭ gayí.

14Aur jitná soná ek baras meṉ Sulaimán ke pás átá thá, us ká wazn sone ká chha sau chhiyásaṭh qintár thá,

15‘aláwa is ke byopáriyoṉ aur saudágaroṉ kí tijárat, aur milí julí qaumoṉ ke sab salátín, aur mulk ke súbadároṉ kí taraf se bhí soná átá thá.

16Aur Sulaimán bádsháh ne soná gaṛhkar do sau ḍháleṉ banáíṉ; chha sau misqál soná ek ek ḍhál meṉ lagá.

17Aur us ne gaṛhe húe sone kí tín sau sipareṉ banáíṉ; ek ek sipar meṉ ḍeṛh ser soná lagá: aur bádsháh ne un ko Lubnání ban ke ghar meṉ rakkhá.

18Másiwá in ke bádsháh ne háthídáṉt ká ek baṛá taḳht banáyá, aur us par sab se chokhá soná manḍhá.

19Us taḳht meṉ chha síṛhiyáṉ thíṉ; aur taḳht ke úpar ká hissa píchhe se gol thá: aur baiṭhne kí jagah kí donoṉ taraf ṭekeṉ thíṉ, aur ṭekoṉ ke pás do sher khaṛe the.

20Aur un chha síṛhiyoṉ ke idhar aur udhar bárah sher khaṛe the: kisí saltanat meṉ aisá kabhí nahíṉ baná.

21Aur Sulaimán bádsháh ke píne ke sab bartan sone ke the; aur Lubnání ban ke ghar ke bhí sab bartan ḳhális sone ke the: chándí ká ek bhí na thá; kyúṉki Sulaimán ke aiyám meṉ us kí kuchh qadr na thí.

22Kyúṉki bádsháh ke pás samundar meṉ Hírám ke beṛe ke sáth ek Tarsísí beṛá bhí thá; yih Tarsísí beṛá tín baras meṉ ek bár átá thá, aur soná aur chándí aur háthídáṉt, aur bandar aur mor látá thá.

23So Sulaimán bádsháh daulat aur hikmat meṉ zamín ke sab bádsháhoṉ par sabqat le gayá.

24Aur sárá jahán Sulaimán ke dídár ká tálib thá, táki us kí hikmat ko jo Ḳhudá ne us ke dil meṉ ḍálí thí sune.

25Aur un meṉ se har ek ádmí chándí ke bartan, aur sone ke bartan, aur kapṛe, aur hathyár, aur masálih, aur ghoṛe, aur ḳhachchar, hadye ke taur par apne hisse ke muwáfiq látá thá.

26Aur Sulaimán ne rath aur sawár ikaṭṭhe kar liye: us ke pás ek hazár chár sau rath, aur bárah hazár sawár the, jin ko us ne rathoṉ ke shahroṉ meṉ aur bádsháh ke sáth Yarúshalem meṉ rakkhá.

27Aur bádsháh ne Yarúshalem meṉ ifrát kí wajh se chándí ko to aisá kar diyá jaise patthar; aur deodároṉ ko aisá jaise nasheb ke mulk ke gúlar ke daraḳht hote haiṉ.

28Aur jo ghoṛe Sulaimán ke pás the wuh Misr se maṉgáe gaye the; aur bádsháh ke saudágar ek ek jhunḍ kí qímat lagákar un ke jhunḍ ke jhunḍ liyá karte the.

29Aur ek rath chándí kí chha sau misqál meṉ átá, aur Misr se rawána hotá, aur ghoṛá ḍeṛh sau misqál meṉ átá thá; aur aise hí Hittíoṉ ke sab bádsháhoṉ aur Arámí bádsháhoṉ ke liye wuh in ko un hí ke zarí‘e se maṉgáte the.

← Chapter 9 Jump to: Chapter 11 →