1 Kings 19

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 18 Jump to: Chapter 20 →

1Aur Aḳhíab ne sab kuchh jo Íliyáh ne kiyá thá, aur yih bhí ki us ne sab nabíoṉ ko talwár se qatl kar diyá, Ízabil ko batáyá.

2So Ízabil ne Íliyáh ke pás ek qásid rawána kiyá, aur kahlá bhejá, ki Agar maiṉ kal is waqt tak terí ján un kí ján kí tarah na baná ḍálúṉ, to deotá mujh se aisá hí balki is se ziyáda kareṉ.

3Jab us ne yih dekhá, to uṭhkar apní ján bacháne ko bhágá, aur Baírsaba‘ meṉ jo Yahúdáh ká hai áyá, aur apne ḳhádim ko wahíṉ chhoṛá.

4Aur ḳhud ek din kí manzil dasht meṉ nikal gayá, aur jháú ke ek peṛ ke níche ákar baiṭhá, aur apne liye maut máṉgí, aur kahá, Bas hai; ab tú, ai Ḳhudáwand, merí ján ko le le; kyúṉki maiṉ apne bápdádá se bihtar nahíṉ húṉ.

5Aur wuh jháú ke ek peṛ ke níche leṭá, aur so gayá; aur dekho, ek firishte ne use chhúá, aur us se kahá, Uṭh, aur khá.

6Us ne jo nigáh kí, to kyá dekhá, ki us ke sirháne angároṉ par pakí húí ek roṭí aur pání kí ek suráhí dharí hai. So wuh khá píkar phir leṭ gayá.

7Aur Ḳhudáwand ká firishta dobára phir áyá, aur use chhúá, aur kahá, Uṭh, aur khá, ki yih safar tere liye bahut baṛá hai.

8So us ne uṭhkar kháyá piyá, aur us kháne kí quwwat se chálís din aur chálís rát chalkar Ḳhudá ke paháṛ Horib tak gayá.

9Aur waháṉ ek g̣ár meṉ jákar ṭik gayá; aur dekho, Ḳhudáwand ká yih kalám us par názil húá, ki Ai Íliyáh, tú yaháṉ kyá kartá hai?

10Us ne kahá, Ḳhudáwand lashkaroṉ ke Ḳhudá ke liye mujhe baṛí g̣airat áí; kyúṉki baní Isráíl ne tere ‘ahd ko tark kiyá, aur tere mazbahoṉ ko ḍhá diyá, aur tere nabíoṉ ko talwár se qatl kiyá, aur ek maiṉ hí akelá bachá húṉ; so wuh merí ján lene ke darpai haiṉ.

11Us ne kahá, Báhar nikal, aur paháṛ par Ḳhudáwand ke huzúr khaṛá ho. Aur dekho Ḳhudáwand guzrá; aur ek baṛí tund áṉdhí ne Ḳhudáwand ke áge paháṛoṉ ko chír ḍálá, aur chaṭánoṉ ke ṭukṛe kar diye; par Ḳhudáwand áṉdhí meṉ nahíṉ thá: aur áṉdhí ke ba‘d zalzala áyá; par Ḳhudáwand zalzale meṉ nahíṉ thá.

12Aur zalzale ke ba‘d ág áí; par Ḳhudáwand ág meṉ bhí nahíṉ thá: aur ág ke ba‘d ek dabí húí halkí áwáz áí.

13Us ko sunkar Íliyáh ne apná muṉh apní chádar se lapeṭ liyá, aur báhar nikalkar us g̣ár ke muṉh par khaṛá húá; aur dekho, use yih áwáz áí, ki Ai Íliyáh, tú yaháṉ kyá kartá hai?

14Us ne kahá, Mujhe Ḳhudáwand lashkaroṉ ke Ḳhudá ke liye baṛí g̣airat áí; kyúṉki baní Isráíl ne tere ‘ahd ko tark kiyá, aur tere mazbahoṉ ko ḍhá diyá, aur tere nabíoṉ ko talwár se qatl kiyá; ek maiṉ hí akelá bachá húṉ; so wuh merí ján lene ke darpai haiṉ.

15Ḳhudáwand ne use farmáyá, Tú apne ráste lauṭkar Damishq ke biyábán ko já; aur jab tú waháṉ pahuṉche, to tú Hazáel ko masah kar, ki Arám ká bádsháh ho.

16Aur Nimsí ke beṭe Yáhú ko masah kar, ki Isráíl ká bádsháh ho, aur Abíl Mahúlah ke Ilísha‘ bin Sáfat ko masah kar, ki terí jagah nabí ho.

17Aur aisá hogá, ki jo Hazáel kí talwár se bach jáegá, use Yáhú qatl karegá; aur jo Yáhú kí talwár se bach rahegá, use Ilísha‘ qatl kar ḍálegá.

18Taubhí maiṉ Isráíl meṉ sát hazár apne liye rakh chhoṛúṉgá, ya‘ní wuh sab ghuṭne jo Ba‘l ke áge nahíṉ jhuke, aur har ek muṉh jis ne use nahíṉ chúmá.

19So wuh waháṉ se rawána húá aur Sáfat ká beṭá Ilísha‘ use milá, jo bárah joṛí bail ápne áge liye húe jot rahá thá, aur wuh ḳhud bárahwíṉ ke sáth thá: aur Íliyáh us ke barábar se guzrá, aur apní chádar us par ḍál dí.

20So wuh bailoṉ ko chhoṛkar Íliyáh ke píchhe dauṛá, aur kahne lagá, Mujhe apne báp aur apní máṉ ko chúm lene de, phir maiṉ tere píchhe ho lúṉgá. Us ne us se kahá, ki Lauṭ já; maiṉ ne tujh se kyá kiyá hai?

21Tab wuh us ke píchhe se lauṭ gayá; aur us ne us joṛí bail ko lekar zabh kiyá, aur un hí bailoṉ ke sámán se un ká gosht ubálá, aur logoṉ ko diyá; aur unhoṉ ne kháyá. Tab wuh uṭhá, aur Íliyáh ke píchhe rawána húá, aur us kí ḳhidmat karne lagá.

← Chapter 18 Jump to: Chapter 20 →