1 Kings 16

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 15 Jump to: Chapter 17 →

1Aur Hanání ke beṭe Yáhú par Ḳhudáwand ká yih kalám Ba‘shá ke ḳhiláf názil húá;

2Is liye ki maiṉ ne tujhe ḳhák par se uṭháyá, aur apní qaum Isráíl ká peshwá banáyá; aur tú Yarubi‘ám kí ráh par chalá, aur tú ne merí qaum Isráíl se gunáh karáke un ke gunáhoṉ se mujhe g̣ussa diláyá;

3so dekh, maiṉ Ba‘shá aur us ke gharáne kí púrí safáí kar dúṉgá, aur tere gharáne ko Nabát ke beṭe Yarubi‘ám ke gharáne kí mánind baná dúṉgá.

4Ba‘shá ká jo koí shahr meṉ maregá, use kutte kháeṉge; aur jo maidán meṉ maregá, use hawá ke parande chaṭ kar jáeṉge.

5Aur Ba‘shá ká báqí hál, aur jo kuchh us ne kiyá, aur us kí quwwat, so kyá wuh Isráíl ke bádsháhoṉ kí tawáríḳh kí kitáb meṉ likhá nahíṉ hai?

6Aur Ba‘shá apne bápdádá ke sáth so gayá, aur Tirzah meṉ dafn húá, aur us ká beṭá Ailah us kí jagah bádsháh húá.

7Aur Hanání ke beṭe Yáhú kí ma‘rifat Ḳhudáwand ká kalám Ba‘shá aur us ke gharáne ke ḳhiláf us sárí badí ke sabab se bhí názil húá jo us ne Ḳhudáwand kí nazar meṉ kí; aur apne háthoṉ ke kám se use g̣ussa diláyá, aur Yarubi‘ám ke gharáne kí mánind baná, aur is sabab se bhí ki us ne use qatl kiyá.

8Aur sháh i Yahúdáh Ásá ke chhabísweṉ sál se Ba‘shá ká beṭá Ailah Tirzah meṉ baní Isráíl par saltanat karne lagá; aur us ne do baras saltanat kí.

9Aur us ke ḳhádim Zimrí ne jo us ke ádhe rathoṉ ká dároga thá us ke ḳhiláf sázish kí; us waqt wuh Tirzah meṉ thá, aur Arza ke ghar meṉ jo Tirzah meṉ us ke ghar ká díwán thá sharáb pí píkar matwálá hotá játá thá.

10So Zimrí ne Ásá sháh i Yahúdáh ke sattáísweṉ sál andar jákar us par wár kiyá, aur use qatl kar diyá, aur us kí jagah saltanat karne lagá.

11Aur jab wuh bádsháhí karne lagá, to taḳht par baiṭhte hí us ne Ba‘shá ke sáre gharáne ko qatl kiyá, aur na to us ke rishtadároṉ ká aur na us ke dostoṉ ká koí laṛká báqí chhoṛá.

12Yúṉ Zimrí ne Ḳhudáwand ke us suḳhan ke mutábiq jo us ne Ba‘shá ke ḳhiláf Yáhú nabí kí ma‘rifat farmáyá thá, Ba‘shá ke sáre gharáne ko nábúd kiyá,

13Ba‘shá ke sab gunáhoṉ, aur us ke beṭe Ailah ke gunáhoṉ ke sabab se jo unhoṉ ne kiye, aur jin se unhoṉ ne Isráíl se gunáh karáyá, táki Ḳhudáwand Isráíl ke Ḳhudá ko apne bátil kámoṉ se g̣ussa diláeṉ.

14Aur Ailah ká báqí hál, aur sab kuchh jo us ne kiyá, so kyá wuh Isráíl ke bádsháhoṉ kí tawáriḳh kí kitáb meṉ qalamband nahíṉ?

15Aur sháh i Yahúdáh Ásá ke sattáísweṉ baras meṉ Zimrí ne Tirzah meṉ sát din bádsháhí kí. Us waqt log Jibbatún ke muqábil jo Filistíoṉ ká thá ḳhaimazan the.

16Aur un logoṉ ne jo ḳhaimazan the, yih charchá suná, ki Zimrí ne sázish kí, aur bádsháh ko már bhí ḍálá hai; is liye sáre Isráíl ne ‘Umrí ko jo lashkar ká sardár thá us din lashkargáh meṉ Isráíl ká bádsháh banáyá.

17Tab ‘Umrí, aur us ke sáth sárá Isráíl Jibbatún se rawána húá, aur unhoṉ ne Tirzah ká muhásara kar liyá.

18Aur aisá húá, ki jab Zimrí ne dekhá ki shahr sar ho gayá, to sháhí mahall ke muhkam hisse meṉ jákar sháhí mahall meṉ ág lagá dí aur jal mará,

19apne un gunáhoṉ ke sabab se jo us ne kiye, ki Ḳhudáwand kí nazar meṉ badí kí, aur Yarubi‘ám kí ráh aur us ke gunáh kí rawish iḳhtiyár kí jo us ne kiyá, táki Isráíl se gunáh karáe.

20Aur Zimrí ká báqí hál, aur jo bag̣áwat us ne kí, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ?

21Us waqt Isráílí do faríq ho gaye; ádhe ádmí Jínat ke beṭe Tibní ke pairau ho gaye, táki use bádsháh banáeṉ; aur ádhe ‘Umrí ke pairau the.

22Par jo ‘Umrí ke pairau the un par jo Jínat ke beṭe Tibní ke pairau the g̣álib áe: so Tibní mar gayá, aur ‘Umrí bádsháh húá.

23Sháh i Yahúdáh Ásá ke iktísweṉ sál se ‘Umrí Isráíl par saltanat karne lagá; us ne bárah baras saltanat kí: Tirzah meṉ chha baras us kí saltanat rahí.

24Aur us ne Sámariya ká paháṛ Samar se do qintár chándí meṉ ḳharídá, aur us paháṛ par ek shahr banáyá, aur us shahr ká nám jo us ne banáyá thá paháṛ ke málik Samar ke nám par Sámariya rakkhá.

25Aur ‘Umrí ne Ḳhudáwand kí nazar meṉ badí kí, aur un sab se jo us se pahle húe badtar kám kiye.

26Kyúṉki us ne Nabát ke beṭe Yarubi‘ám kí sab ráheṉ, aur us ke gunáhoṉ kí rawish iḳhtiyár kí, jin se us ne Isráíl se gunáh karáyá táki wuh Ḳhudáwand Isráíl ke Ḳhudá ko apne bátil kámoṉ se g̣ussa diláeṉ.

27Aur ‘Umrí ke báqí kám jo us ne kiye, aur us ká zor jo us ne dikháyá, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ?

28So ‘Umrí apne bápdádá ke sáth so gayá, aur Sámariya meṉ dafn húá, aur us ká beṭá Aḳhíab us kí jagah bádsháh húá.

29Aur sháh i Yahúdáh Ásá ke aṛtísweṉ sál se ‘Umrí ká beṭá Aḳhíab Isráíl par saltanat karne lagá: aur ‘Umrí ke beṭe Aḳhíab ne Sámariya meṉ Isráíl par báís baras saltanat kí.

30Aur ‘Umrí ke beṭe Aḳhíab ne jitne us se pahle húe the, un sabhoṉ se ziyáda, Ḳhudáwand kí nazar meṉ badí kí

31Aur goyá Nabát ke beṭe Yarubi‘ám ke gunáhoṉ kí rawish iḳhtiyár karní us ke liye ek halkí sí bát thí, so us ne Saidáníoṉ ke bádsháh Itba‘l kí beṭí Ízabil se biyáh kiyá, aur jákar Ba‘l kí parastish karne aur use sijda karne lagá

32Aur Ba‘l ke mandir meṉ jise us ne Sámariya meṉ banáyá thá Ba‘l ke liye ek mazbah taiyár kiyá.

33Aur Aḳhíab ne Yasírat banáí; aur Aḳhíab ne Isráíl ke sab bádsháhoṉ se ziyáda jo us se pahle húe the Ḳhudáwand Isráíl ke Ḳhudá ko g̣ussa diláne ke kám kiye.

34Us ke aiyám meṉ Baitelí Híel ne Yaríhú ko ta‘mír kiyá: jab us ne us kí bunyád ḍálí, to us ká pahlauṭhá beṭá Abirám mará, aur jab us ke pháṭak lagáe, to us ká sab se chhoṭá beṭá Sajúb mar gayá; yih Ḳhudáwand ke kalám ke mutábiq húá jo us ne Nún ke beṭe Yashú‘ kí ma‘rifat farmáyá thá.

← Chapter 15 Jump to: Chapter 17 →