bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
1 Kings 15
1 Kings 15
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 16 →
1
Aur Nabát ke beṭe Yarubi‘ám kí saltanat ke aṭhárahweṉ sál se Abiyám Yahúdáh par saltanat karne lagá.
2
Us ne Yarúshalem meṉ tín sál bádsháhí kí. Us kí máṉ ká nám Ma‘kah thá jo Abísalom kí beṭí thí.
3
Us ne apne báp ke sab gunáhoṉ meṉ jo us ne us se pahle kiye the us kí rawish iḳhtiyár kí; aur us ká dil Ḳhudáwand apne Ḳhudá ke sáth kámil na thá, jaisá us ke báp Dáúd ká dil thá.
4
Báwujúd is ke Ḳhudáwand us ke Ḳhudá ne Dáúd kí ḳhátir Yarúshalem meṉ use ek chirág̣ diyá, ya‘ní us ke beṭe ko us ke ba‘d ṭhahráyá, aur Yarúshalem ko barqarár rakkhá:
5
is liye ki Dáúd ne wuh kám kiyá jo Ḳhudáwand kí nazar meṉ ṭhík thá, aur apní sárí ‘umr Ḳhudáwand ke kisí hukm se báhar na húá, siwá Hittí Úriyáh ke mu‘ámale ke.
6
Aur Rahubi‘ám aur Yarubi‘ám ke darmiyán us kí sárí ‘umr jang rahí.
7
Aur Abiyám ká báqí hál aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kitáb meṉ likhá nahíṉ hai? Aur Abiyám aur Yarubi‘ám meṉ jang hotí rahí.
8
Aur Abiyám apne bápdádá ke sáth so gayá, aur unhoṉ ne use Dáúd ke shahr meṉ dafn kiyá: aur us ká beṭá Ásá us kí jagah bádsháh húá.
9
Aur sháh i Isráíl Yarubi‘ám ke bísweṉ sál se Ásá Yahúdáh par saltanat karne lagá.
10
Us ne iktálís baras Yarúshalem meṉ saltanat kí. Us kí máṉ ká nám Ma‘kah thá jo Abísalom kí beṭí thí.
11
Aur Ásá ne apne báp Dáúd kí tarah wuh kám kiyá jo Ḳhudáwand kí nazar meṉ ṭhík thá.
12
Us ne lútíoṉ ko mulk se nikál diyá; aur un sab butoṉ ko jin ko us ke bápdádá ne banáyá thá dúr kar diyá.
13
Aur us ne apní máṉ Ma‘kah ko bhí malika ke rutbe se utár diyá; kyúṉki us ne ek Yasírat ke liye ek nafratangez but banáyá thá; so Ásá ne us ke but ko káṭ ḍálá, aur wádí e Qidron meṉ use jalá diyá.
14
Lekin úṉche maqám ḍháe na gaye; taubhí Ásá ká dil ‘umr bhar Ḳhudáwand ke sáth kámil rahá.
15
Aur us ne wuh chízeṉ jo us ke báp ne nazr kí thíṉ, aur wuh chízeṉ jo us ne áp nazr kí thíṉ, ya‘ní chándí, aur soná, aur zurúf, sab ko Ḳhudáwand ke ghar meṉ dáḳhil kiyá.
16
Aur Ásá aur sháh i Isráíl Ba‘shá meṉ un kí ‘umr bhar jang rahí.
17
Aur sháh i Isráíl Ba‘shá ne Yahúdáh par chaṛháí kí, aur Rámah ko banáyá, táki sháh i Yahúdáh Ásá ke pás kisí kí ámad o raft na ho sake.
18
Tab Ásá ne sab chándí aur sone ko jo Ḳhudáwand ke ghar ke ḳhazánoṉ meṉ báqí rahá thá, aur sháhí mahall ke ḳhazánoṉ ko lekar un ko apne ḳhádimoṉ ke supurd kiyá: aur Ásá bádsháh ne un ko sháh i Arám Bin Hadad ke pás jo Hazyún ke beṭe Tábrimmún ká beṭá thá aur Damishq meṉ rahtá thá, rawána kiyá aur kahlá bhejá,
19
ki Mere aur tere darmiyán, aur mere báp aur tere báp ke darmiyán ‘ahd o paimán hai: dekh, maiṉ ne tere liye chándí aur sone ká hadya bhejá hai; so tú ákar sháh i Isráíl Ba‘shá se ‘ahdshikaní kar táki wuh mere pás se chalá jáe.
20
Aur Bin Hadad ne Ásá bádsháh kí bát mání, aur apne lashkar ke sardároṉ ko Isráílí shahroṉ par chaṛháí karne ko bhejá, aur ‘Aiyún, aur Dán, aur Abíl Bait Ma‘kah, aur sáre Kinnarat aur Naftálí ke sáre mulk ko márá.
21
Jab Ba‘shá ne yih suná, to Rámah ke banáne se háth kheṉchá, aur Tirzah meṉ rahne lagá.
22
Tab Ásá bádsháh ne sáre Yahúdáh meṉ manádí karáí, aur koí ma‘zúr na rakkhá gayá; so wuh Rámah ke patthar ko aur us kí lakṛiyoṉ ko, jin se Ba‘shá use ta‘mír kar rahá thá, uṭhá le gaye; aur Ásá bádsháh ne un se Binyamín ke Jibi‘ah aur Misfáh ko banáyá.
23
Aur Ásá ká báqí sab hál aur us kí sárí quwwat, aur sab kuchh jo us ne kiyá, aur jo shahr us ne banáe, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ haiṉ? Lekin us ke buṛhápe ke waqt meṉ use páṉwoṉ ká rog lag gayá.
24
Aur Ásá apne bápdádá ke sáth so gayá, aur apne bápdádá ke sáth apne báp Dáúd ke shahr meṉ dafn húá: aur us ká beṭá Yahúsafat us kí jagah bádsháh húá.
25
Aur sháh i Yahúdáh Ásá kí saltanat ke dúsre sál se Yarubi‘ám ká beṭá Nadab Isráíl par saltanat karne lagá, aur us ne Isráíl par do baras saltanat kí.
26
Aur us ne Ḳhudáwand kí nazar meṉ badí kí, aur apne báp kí, aur us ke gunáh kí rawish iḳhtiyár kí, jis se us ne Isráíl se gunáh karáyá thá.
27
Aur Aḳhiyáh ke beṭe Ba‘shá ne jo Ishkár ke gharáne ká thá us ke ḳhiláf sázish kí, aur Ba‘shá ne Jibbatún meṉ jo Filistíoṉ ká thá use qatl kiyá; kyúṉki Nadab aur sáre Isráíl ne Jibbatún ká muhásara kar rakkhá thá.
28
Sháh i Yahúdáh Ásá ke tísre hí sál Ba‘shá ne use qatl kiyá, aur us kí jagah saltanat karne lagá.
29
Aur júṉhí wuh bádsháh húá, us ne Yarubi‘ám ke sáre gharáne ko qatl kiyá; aur jaisá Ḳhudáwand ne apne ḳhádim Aḳhiyáh Sailání kí ma‘rifat farmáyá thá, us ne Yarubi‘ám ke liye kisí sáṉs lenewále ko bhí, jab tak use halák na kar ḍálá na chhoṛá;
30
Yarubi‘ám ke un gunáhoṉ ke sabab se jo us ne áp kiye, aur jin se us ne Isráíl se gunáh karáyá; aur us ke us g̣ussa diláne ke sabab se jis se us ne Ḳhudáwand Isráíl ke Ḳhudá ke g̣azab ko bhaṛkáyá.
31
Aur Nadab ká báqí hál, aur sab kuchh jo us ne kiyá, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ?
32
Aur Ásá aur sháh i Isráíl Ba‘shá ke darmiyán un kí ‘umr bhar jang rahí.
33
Aur sháh i Yahúdáh Ásá ke tísre sál se Aḳhiyáh ká beṭá Ba‘shá Tirzah meṉ sáre Isráíl par bádsháhí karne lagá, aur us ne chaubís baras saltanat kí.
34
Aur us ne Ḳhudáwand kí nazar meṉ badí kí, aur Yarubi‘ám kí ráh, aur us ke gunáh kí rawish iḳhtiyár kí, jis se us ne Isráíl se gunáh karáyá.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22