1 Kings 17

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 16 Jump to: Chapter 18 →

1Aur Íliyáh Tishbí ne jo Jili‘ád ke pardesiyoṉ meṉ se thá Aḳhíab se kahá, ki Ḳhudáwand Isráíl ke Ḳhudá kí hayát kí qasam, jis ke sámne maiṉ khaṛá húṉ, in barasoṉ meṉ na os paṛegí, na meṉh barsegá, jab tak maiṉ na kahúṉ.

2Aur Ḳhudáwand ká yih kalám us par názil húá, ki

3Yaháṉ se chal de, aur mashriq kí taraf apná ruḳh kar, aur Karít ke nále ke pás jo Yardan ke sámne hai já chhip.

4Aur tú usí nále meṉ se píná; aur maiṉ ne kauwoṉ ko hukm kiyá hai, ki wuh terí parwarish kareṉ.

5So us ne jákar Ḳhudáwand ke kalám ke mutábiq kiyá; kyúṉki wuh gayá, aur Karít ke nále ke pás jo Yardan ke sámne hai rahne lagá.

6Aur kauwe us ke liye subh ko roṭí aur gosht, aur shám ko bhí roṭí aur gosht láte the; aur wuh us nále meṉ se piyá kartá thá.

7Aur kuchh ‘arse ke ba‘d wuh nála súkh gayá, is liye ki us mulk meṉ bárish nahíṉ húí thí.

8Tab Ḳhudáwand ká yih kalám us par názil húá,

9ki Uṭh, aur Saidá ke Sárapat ko já, aur wahíṉ rah; dekh, maiṉ ne ek bewa ‘aurat ko waháṉ hukm diyá hai, ki terí parwarish kare.

10So wuh uṭhkar Sárapat ko gayá. Aur jab wuh shahr ke pháṭak par pahuṉchá, to dekhá, ki ek bewa ‘aurat waháṉ lakṛiyáṉ chun rahí hai; so us ne use pukárkar kahá, Zará mujhe thoṛá sá pání kisí bartan meṉ lá de, ki maiṉ píúṉ

11Aur jab wuh lene chalí, to us ne pukárkar kahá, Zará apne háth meṉ ek ṭukṛá roṭí mere wáste letí áná.

12Us ne kahá, Ḳhudáwand tere Ḳhudá kí hayát kí qasam, mere háṉ roṭí nahíṉ, sirf muṭṭhí bhar áṭá ek maṭke meṉ aur thoṛá sá tel ek kuppí meṉ hai; aur dekh, maiṉ do ek lakṛiyáṉ chun rahí húṉ, táki ghar jákar apne aur apne beṭe ke liye use pakáúṉ, aur ham use kháeṉ, phir mar jáeṉ.

13Aur Íliyáh ne us se kahá, Mat ḍar; já, aur jaisá kahtí hai, kar; par pahle mere liye ek ṭikkiyá us meṉ se banákar mere pás le á; us ke ba‘d apne aur apne beṭe ke liye baná lená.

14Kyúṉki Ḳhudáwand Isráíl ká Ḳhudá yúṉ farmátá hai, ki Us din tak jab tak Ḳhudáwand zamín par meṉh na barsáe, na to áṭe ká maṭká ḳhálí hogá, aur na tel kí kuppí meṉ kamí hogí.

15So us ne jákar Íliyáh ke kahne ke mutábiq kiyá; aur yih, aur wuh, aur us ká kunbá, bahut dinoṉ tak kháte rahe.

16Aur Ḳhudáwand ke kalám ke mutábiq jo us ne Íliyáh kí ma‘rifat farmáyá thá, na to áṭe ká maṭká ḳhálí húá, aur na tel kí kuppí meṉ kamí húí.

17In bátoṉ ke ba‘d us ‘aurat ká beṭá jo us ghar kí málik thí, bímár paṛá, aur us kí bímárí aisí saḳht ho gayí, ki us meṉ dam báqí na rahá.

18So wuh Íliyáh se kahne lagí, Ai mard i Ḳhudá, mujhe tujh se kyá kám? tú mere pás áyá hai, ki mere gunáh yád diláe, aur mere beṭe ko már de?

19Us ne us se kahá, Apná beṭá mujh ko de. Aur wuh use us kí god se lekar us ko báláḳháne par, jaháṉ wuh rahtá thá, le gayá, aur use apne palang par liṭáyá.

20Aur us ne Ḳhudáwand se faryád kí, aur kahá, Ai Ḳhudáwand mere Ḳhudá, kyá tú ne is bewa par bhí, jis ke háṉ maiṉ ṭiká húá húṉ, us ke beṭe ko már ḍálne se balá názil kí?

21Aur us ne apne áp ko tín bár us laṛke par pasárkar Ḳhudáwand se faryád kí, aur kahá, Ai Ḳhudáwand mere Ḳhudá, maiṉ terí minnat kartá húṉ, ki is laṛke kí ján is meṉ phir á jáe.

22Aur Ḳhudáwand ne Íliyáh kí faryád suní, aur laṛke kí ján us meṉ phir á gayí, aur wuh jí uṭhá.

23Tab Íliyáh us laṛke ko uṭhákar báláḳháne par se níche ghar ke andar le gayá, aur use us kí máṉ ke supurd kiyá: aur Íliyáh ne kahá, Dekh, terá beṭá jítá hai

24Tab us ‘aurat ne Íliyáh se kahá, Ab maiṉ ján gayí ki tú mard i Ḳhudá hai, aur Ḳhudáwand ká jo kalám tere muṉh meṉ hai, wuh haqq hai.

← Chapter 16 Jump to: Chapter 18 →