1 Kings 12

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 11 Jump to: Chapter 13 →

1Aur Rahubi‘ám Sikm ko gayá, kyúṉki sárá Isráíl use bádsháh banáne ko Sikm ko gayá thá.

2Aur jab Nabát ke beṭe Yarubi‘ám ne jo hanoz Misr meṉ thá yih suná; (kyúṉki Yarubi‘ám Sulaimán ke huzúr se bhág gayá thá, aur wuh Misr meṉ rahtá thá;

3so unhoṉ ne log bhejkar use bulwáyá:) to Yarubi‘ám aur Isráíl kí sárí jamá‘at ákar Rahubi‘ám se yúṉ kahne lagí,

4ki Tere báp ne hamárá júá saḳht kar diyá thá; so tú ab apne báp kí us saḳht ḳhidmat ko, aur us bhárí júe ko jo us ne ham par rakkhá, halká kar de, aur ham terí ḳhidmat kareṉge.

5Tab us ne un se kahá, Abhí tum tín roz ke liye chale jáo, tab phir mere pás áná. So wuh log chale gaye.

6Aur Rahubi‘ám bádsháh ne un ‘umrrasída logoṉ se jo us ke báp Sulaimán ke jíte jí us ke huzúr khaṛe rahte the, mashwarat lí, aur kahá, ki In logoṉ ko jawáb dene ke liye tum mujhe kyá saláh dete ho?

7Unhoṉ ne us se yih kahá, ki Agar tú áj ke din is qaum ká ḳhádim ban jáe, aur un kí ḳhidmat kare, aur un ko jawáb de, aur un se míṭhí báteṉ kare, to wuh sadá tere ḳhádim bane raheṉge.

8Par us ne un ‘umrrasída logoṉ kí mashwarat jo unhoṉ ne use dí, chhoṛkar un jawánoṉ se jo us ke sáth baṛhe húe the, aur us ke huzúr khaṛe the, mashwarat lí:

9aur un se púchhá, ki Tum kyá saláh dete ho, táki ham in logoṉ ko jawáb de sakeṉ, jinhoṉ ne mujh se yúṉ kahá hai, ki Us júe ko jo tere báp ne ham par rakkhá, halká kar de?

10In jawánoṉ ne jo us ke sáth baṛhe húe the us se kahá, Tú un logoṉ ko yúṉ jawáb dená, jinhoṉ ne tujh se kahá hai, ki Tere báp ne hamáre júe ko bhárí kiyá, tú us ko hamáre liye halká kar de; so tú un se yúṉ kahná, ki Merí chhingulí mere báp kí kamar se bhí moṭí hai:

11aur ab go mere báp ne bhárí júá tum par rakkhá hai, taubhí maiṉ tumháre júe ko âur ziyáda bhárí karúṉgá: mere báp ne tum ko koṛoṉ se ṭhík kiyá, maiṉ tum ko bichchhúoṉ se ṭhík banáúṉgá.

12So Yarubi‘ám aur sab log tísre din Rahubi‘ám ke pás házir húe, jaisá bádsháh ne un ko hukm diyá thá, ki Tísre din mere pás phir áná.

13Aur bádsháh ne un logoṉ ko saḳht jawáb diyá, aur ‘umrrasída logoṉ kí us mashwarat ko jo unhoṉ ne use dí thí, tark kiyá;

14aur jawánoṉ kí saláh ke muwáfiq un se yih kahá, ki Mere báp ne to tum par bhárí júá rakkhá, lekin maiṉ tumháre júe ko ziyáda bhárí karúṉgá: mere báp ne tum ko koṛoṉ se ṭhík kiyá, par maiṉ tum ko bichchhúoṉ se ṭhík banáúṉgá.

15So bádsháh ne logoṉ kí na suní; kyúṉki yih mu‘ámala Ḳhudáwand kí taraf se thá, táki Ḳhudáwand apní bát ko jo us ne Sailání Aḳhiyáh kí ma‘rifat Nabát ke beṭe Yarubi‘ám se kahí thí púrá kare.

16Aur jab sáre Isráíl ne dekhá ki bádsháh ne un kí na suní, to unhoṉ ne bádsháh ko yúṉ jawáb diyá, ki Dáúd meṉ hamárá kyá hissa hai? Yassí ke beṭe meṉ hamárí mírás nahíṉ: ai Isráíl, apne ḍeroṉ ko chale jáo; aur ab, ai Dáúd, tú apne ghar ko sambhál. So Isráílí apne ḍeroṉ ko chal diye.

17Lekin jitne Isráílí Yahúdáh ke shahroṉ meṉ rahte the, un par Rahubi‘ám saltanat kartá rahá.

18Phir Rahubi‘ám bádsháh ne Adúrám ko bhejá jo begáríoṉ ke úpar thá, aur sáre Isráíl ne use saṉgsár kiyá, aur wuh mar gayá. Tab Rahubi‘ám bádsháh ne apne rath par sawár hone meṉ jaldí kí, táki Yarúshalem ko bhág jáe.

19Yúṉ Isráíl Dáúd ke gharáne se bág̣í húá, aur áj tak hai.

20Aur jab sáre Isráíl ne suná, ki Yarubi‘ám lauṭ áyá hai, to unhoṉ ne log bhejkar use jamá‘at meṉ bulwáyá, aur use sáre Isráíl ká bádsháh banáyá; aur Yahúdáh ke qabíle ke siwá kisí ne Dáúd ke ghárane kí pairawí na kí.

21Aur jab Rahubi‘ám Yarúshalem meṉ pahuṉchá, to us ne Yahúdáh ke sáre gharáne aur Binyamín ke qabíle ko jo sab ek lákh assí hazár chune húe jangí mard the ikaṭṭhá kiyá, táki wuh Isráíl ke gharáne se laṛkar saltanat ko phir Sulaimán ke beṭe Rahubi‘ám ke qabze meṉ kará deṉ.

22Lekin Sama‘iyáh ko jo mard i Ḳhudá thá Ḳhudá ká yih paig̣ám áyá,

23ki Yahúdáh ke bádsháh Sulaimán ke beṭe Rahubi‘ám, aur Yahúdáh aur Binyamín ke sáre gharáne, aur qaum ke báqí logoṉ se kah, ki

24Ḳhudáwand yúṉ farmátá hai, ki Tum chaṛháí na karo, aur na apne bháiyoṉ baní Isráíl se laṛo; balki har shaḳhs apne ghar ko lauṭe; kyúṉki yih bát merí taraf se hai. So unhoṉ ne Ḳhudáwand kí bát mání, aur Ḳhudáwand ke hukm ke mutábiq lauṭe, aur apná rásta liyá.

25Tab Yarubi‘ám ne Ifráím ke kohistání mulk meṉ Sikm ko ta‘mír kiyá, aur us meṉ rahne lagá; aur waháṉ se nikalkar us ne Fanúel ko ta‘mír kiyá.

26Aur Yarubi‘ám ne apne dil meṉ kahá, ki Ab saltanat Dáúd ke gharáne meṉ phir chalí jáegí:

27agar yih log Yarúshalem meṉ Ḳhudáwand ke ghar meṉ qurbání guzránne ko jáyá kareṉ, to in ke dil apne málik ya‘ní Yahúdáh ke bádsháh Rahubi‘ám kí taraf máil hoṉge, aur wuh mujh ko qatl karke sháh i Yahúdáh Rahubi‘ám kí taraf phir jáeṉge.

28Is liye us bádsháh ne mashwarat lekar sone ke do bachhṛe banáe, aur logoṉ se kahá, Yarúshalem ko jáná tumhárí táqat se báhar hai: ai Isráíl, apne deotáoṉ ko dekh jo tujhe mulk i Misr se nikál láe.

29Aur us ne ek ko Baitel meṉ qáim kiyá, aur dúsre ko Dán meṉ rakkhá.

30Aur yih gunáh ká bá‘is ṭhahrá; kyúṉki log us ek kí parastish karne ke liye Dán tak jáne lage.

31Aur us ne úṉchí jagahoṉ ke ghar banáe, aur ‘awámm meṉ se jo baní Láwí na the káhin banáe.

32Aur Yarubi‘ám ne áṭhweṉ mahíne kí pandrahwíṉ táríḳh ke liye us ‘íd kí tarah jo Yahúdáh meṉ hotí hai, ek ‘íd ṭhahráí, aur us mazbah ke pás gayá; aisá hí us ne Baitel meṉ kiyá, aur un bachhṛoṉ ke liye jo us ne banáe the qurbání guzrání; aur us ne Baitel meṉ apne banáe húe úṉche maqámoṉ ke liye káhinoṉ ko rakkhá.

33Aur áṭhweṉ mahíne kí pandrahwíṉ táríḳh ko, ya‘ní us mahíne meṉ jise us ne apne hí dil se ṭhahráyá thá, wuh us mazbah ke pás jo us ne Baitel meṉ banáyá thá gayá; aur baní Isráíl ke liye ‘íd ṭhahráí, aur baḳhúr jaláne ko mazbah ke pás gayá.

← Chapter 11 Jump to: Chapter 13 →