1 Kings 14

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 13 Jump to: Chapter 15 →

1Us waqt Yarubi‘ám ká beṭá Abiyáh bímár paṛá.

2Aur Yarubi‘ám ne apní bíwí se kahá, Zará uṭhkar apná bhes badal ḍál, táki pahchán na ho sake ki tú Yarubi‘ám kí bíwí hai; aur Sailá ko chalí já; dekh, Aḳhiyáh nabí waháṉ hai jis ne merí bábat kahá thá, kí maiṉ is qaum ká bádsháh húṉgá.

3Aur das roṭiyáṉ, aur papṛiyáṉ, aur shahd ká ek martabán apne sáth le, aur us ke pás já; wuh tujhe batáegá, ki laṛke ká kyá hál hogá.

4So Yarubi‘ám kí bíwí ne aisá hí kiyá, aur uṭhkar Sailá ko gayí, aur Aḳhiyáh ke ghar pahuṉchí. Par Aḳhiyáh ko kuchh nazar nahíṉ átá thá, kyúṉki buṛhápe ke sabab se us kí áṉkheṉ rah gayí thíṉ.

5Aur Ḳhudáwand ne Aḳhiyáh se kahá, Dekh, Yarubi‘ám kí bíwí tujh se apne beṭe kí bábat púchhne á rahí hai, kyúṉki wuh bímár hai; so tú use yúṉ yúṉ kahná; kyúṉki jab wuh andar áegí to apne áp ko dúsrí ‘aurat banáegí.

6Aur jaise hí wuh darwáze se andar áí, aur Aḳhiyáh ne us ke páṉwoṉ kí áhaṭ suní, to us ne us se kahá, Ai Yarubi‘ám kí bíwí, andar á; tú kyúṉ apne ko dúsrí banátí hai? kyúṉki maiṉ to tere hí pás saḳht paig̣ám ke sáth bhejá gayá húṉ.

7So jákar Yarubi‘ám se kah, Ḳhudáwand Isráíl ká Ḳhudá yúṉ farmátá hai, Háláṉki maiṉ ne tujhe logoṉ meṉ se lekar sarfaráz kiyá, aur apní qaum Isráíl par tujhe bádsháh banáyá,

8aur Dáúd ke gharáne se saltanat chhín lí, aur tujhe dí; taubhí tú mere bande Dáúd kí mánind na húá, jis ne mere hukm máne aur apne sáre dil se merí pairawí kí, táki faqat wuhí kare jo merí nazar meṉ ṭhík thá;

9par tú ne un sabhoṉ se jo tujh se pahle húe ziyáda badí kí; aur jákar apne liye âur âur ma‘búd aur ḍhále húe but banáe, táki mujhe g̣ussa diláe, balki tú ne mujhe apní píṭh ke píchhe pheṉká:

10is liye dekh, maiṉ Yarubi‘ám ke gharáne par balá názil karúṉgá, aur Yarubi‘ám kí nasl ko har ek laṛke ko, ya‘ní har ek ko jo Isráíl meṉ band hai aur us ko jo ázád chhúṭá húá hai, káṭ ḍálúṉgá, aur Yarubi‘ám ke gharáne kí safáí kar dúṉgá, jaise koí gobar kí safáí kartá ho, jab tak wuh sab dúr na ho jáe.

11Yarubi‘ám ká jo koí shahr meṉ maregá, use kutte kháeṉge; aur jo maidán meṉ maregá use hawá ke parande chaṭ kar jáeṉge: kyúṉki Ḳhudáwand ne yih farmáyá hai.

12So tú uṭh, aur apne ghar já, aur jaise hí terá qadam shahr meṉ paṛegá, wuh laṛká mar jáegá.

13Aur sárá Isráíl us ke liye roegá, aur use dafn karegá; kyúṉki Yarubi‘ám kí aulád meṉ se faqat usí ko qabr nasíb hogí, is liye ki Yarubi‘ám ke gharáne meṉ se isí meṉ kuchh páyá gayá jo Ḳhudáwand Isráíl ke Ḳhudá ke nazdík bhalá hai.

14‘Aláwa is ke Ḳhudáwand apní taraf se Isráíl ke liye ek aisá bádsháh barpá karegá jo usí din Yarubi‘ám ke gharáne ko káṭ ḍálegá; lekin kab? yih abhí hogá.

15Kyúṉki Ḳhudáwand Isráíl ko aisá máregá, jaise sarkanḍá pání meṉ hiláyá játá hai, aur wuh Isráíl ko is achchhe mulk se jo us ne un ke bápdádá ko diyá thá ukháṛ pheṉkegá, aur un ko daryá e Furát ke pár paráganda karegá; kyúṉki unhoṉ ne apne liye Yasírateṉ banáíṉ, aur Ḳhudáwand ko g̣ussa diláyá hai.

16Aur wuh Isráíl ko Yarubi‘ám ke un gunáhoṉ ke sabab se chhoṛ degá, jo us ne ḳhud kiye, aur jin se us ne Isráíl se gunáh karáyá.

17Aur Yarubi‘ám kí bíwí uṭhkar rawána húí, aur Tirzah meṉ áí; aur jaise hí wuh ghar ke ástáne par pahuṉchí, wuh laṛká mar gayá.

18Aur sáre Isráíl ne, jaisá Ḳhudáwand ne apne bande Aḳhiyáh nabí kí ma‘rifat farmáyá thá, use dafn karke us par nauha kiyá.

19Aur Yarubi‘ám ká báqí hál, ki wuh kis kis tarah laṛá, aur us ne kyúṉkar saltanat kí, wuh Isráíl ke bádsháhoṉ kí tawáríḳh kí kitáb meṉ likhá hai.

20Aur jitní muddat tak Yarubi‘ám ne saltanat kí, wuh báís baras kí thí; aur wuh apne bápdádá ke sáth so gayá, aur us ká beṭá Nadab us kí jagah bádsháh húá.

21Aur Sulaimán ká beṭá Rahubi‘ám Yahúdáh meṉ bádsháh thá. Rahubi‘ám iktálís baras ká thá jab wuh bádsháhí karne lagá, aur us ne Yarúshalem, ya‘ní us shahr meṉ jise Ḳhudáwand ne baní Isráíl ke sab qabíloṉ meṉ se chuná thá táki apná nám waháṉ rakkhe, sattrah baras saltanat kí. Aur us kí máṉ ká nám Na‘mah thá jo ‘Ammoní ‘aurat thí.

22Aur Yahúdáh ne Ḳhudáwand ke huzúr badí kí, aur jo gunáh un ke bápdádá ne kiye the, un se bhí ziyáda unhoṉ ne apne gunáhoṉ se jo un se sarzadd húe us kí g̣airat ko barangeḳhta kiyá.

23Kyúṉki unhoṉ ne apne liye har ek úṉche ṭíle par, aur har ek hare daraḳht ke níche úṉche maqám aur sutún, aur Yasírateṉ banáíṉ.

24Aur us mulk meṉ lútí bhí the; wuh un qaumoṉ ke sab makrúh kám karte the, jin ko Ḳhudáwand ne baní Isráíl ke sámne se nikál diyá thá.

25Aur Rahubi‘ám bádsháh ke páṉchweṉ baras meṉ sháh i Misr Sísaq ne Yarúshalem par chaṛháí kí:

26aur us ne Ḳhudáwand ke ghar ke ḳhazánoṉ aur sháhí mahall ke ḳhazánoṉ ko le liyá; balki us ne sab kuchh le liyá; aur sone kí wuh sab ḍháleṉ bhí le gayá jo Sulaimán ne banáí thíṉ.

27Aur Rahubi‘ám bádsháh ne un ke badle pítal kí ḍháleṉ banáíṉ, aur un ko muháfiz sipáhíoṉ ke sardároṉ ke supurd kiyá jo sháhí mahall ke darwáze par pahra dete the.

28Aur jab bádsháh Ḳhudáwand ke ghar meṉ játá, to wuh sipáhí un ko lekar chalte, aur phir un ko wápas lákar sipáhíoṉ kí koṭhrí meṉ rakh dete the.

29Aur Rahubi‘ám ká báqí hál, aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kitáb meṉ likhá nahíṉ hai?

30Aur Rahubi‘ám aur Yarubi‘ám meṉ barábar jang rahí.

31Aur Rahubi‘ám apne bápdádá ke sáth so gayá, aur Dáúd ke shahr meṉ apne bápdádá ke sáth dafn húá. Us kí máṉ ká nám Na‘mah thá jo ‘Ammoní ‘aurat thí. Aur us ká beṭá Abiyám us kí jagah bádsháh húá.

← Chapter 13 Jump to: Chapter 15 →