1 Kings 13

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 12 Jump to: Chapter 14 →

1Aur dekho, Ḳhudáwand ke hukm se ek mard i Ḳhudá Yahúdáh se Baitel meṉ áyá: aur Yarubi‘ám baḳhúr jaláne ko mazbah ke pás khaṛá thá.

2Aur wuh Ḳhudáwand ke hukm se mazbah ke ḳhiláf chillákar kahne lagá, Ai mazbah, ai mazbah, Ḳhudáwand yúṉ farmátá hai, ki Dekh, Dáúd ke gharáne se ek laṛká banám Yúsiyáh paidá hogá; so wuh úṉche maqámoṉ ke káhinoṉ kí jo tujh par baḳhúr jaláte haiṉ tujh par qurbání karegá, aur wuh ádmíoṉ kí haḍḍiyáṉ tujh par jaláeṉge.

3Aur us ne usí din ek nishán diyá, aur kahá, Wuh nishán jo Ḳhudáwand ne batáyá hai, yih hai, ki Dekho, mazbah phaṭ jáegá, aur wuh rákh jo us par hai gir jáegí.

4Aur aisá húá, ki jab bádsháh ne us mard i Ḳhudá ká kalám jo us ne Baitel meṉ mazbah ke ḳhiláf chillákar kahá thá suná, to Yarubi‘ám ne mazbah par se apná háth lambá kiyá, aur kahá, ki Use pakaṛ lo. Aur us ká wuh háth jo us ne us kí taraf baṛháyá thá ḳhushk ho gayá, aisá ki wuh use phir apní taraf kheṉch na saká.

5Aur us nishán ke mutábiq jo us mard i Ḳhudá ne Ḳhudáwand ke hukm se diyá thá, wuh mazbah bhí phaṭ gayá, aur rákh mazbah par se gir gayí.

6Tab bádsháh ne us mard i Ḳhudá se kahá, ki Ab Ḳhudáwand apne Ḳhudá se iltijá kar, aur mere liye du‘á máṉg, táki merá háth mere liye phir bahál ho jáe. Tab us mard i Ḳhudá ne Ḳhudáwand se iltijá kí, aur bádsháh ká háth us ke liye bahál húá, aur jaisá pahle thá, waisá hí ho gayá.

7Aur bádsháh ne us mard i Ḳhudá se kahá, ki Mere sáth ghar chal, aur tázadam ho, aur maiṉ tujhe in‘ám dúṉgá.

8Us mard i Ḳhudá ne bádsháh ko jawáb diyá, ki Agar tú apná ádhá ghar bhí mujhe de, taubhí maiṉ tere sáth nahíṉ jáne ká, aur na maiṉ is jagah roṭí kháúṉ, aur na pání píúṉ:

9kyúṉki Ḳhudáwand ká hukm mujhe tákíd ke sáth yih húá hai, ki Tú na roṭí kháná, na pání píná, na us ráh se lauṭná jis se tú jáe.

10So wuh dúsre ráste se gayá, aur jis ráh se Baitel meṉ áyá thá, us se na lauṭá.

11Aur Baitel meṉ ek buḍḍhá nabí rahtá thá; so us ke beṭoṉ meṉ se ek ne ákar wuh sab kám jo us mard i Ḳhudá ne us roz Baitel meṉ kiye use batáe: aur jo báteṉ us ne bádsháh se kahí thíṉ, un ko bhí apne báp se bayán kiyá.

12Aur un ke báp ne un se kahá, Wuh kis ráh se gayá? Us ke beṭoṉ ne dekh liyá thá, ki wuh mard i Ḳhudá jo Yahúdáh se áyá thá, kis ráh se gayá hai.

13So us ne apne beṭoṉ se kahá, Mere liye gadhe par zín kas do. Pas unhoṉ ne us ke liye gadhe par zín kas diyá: aur wuh us par sawár húá,

14aur us mard i Ḳhudá ke píchhe chalá; aur use balút ke ek daraḳht ke níche baiṭhe páyá. Tab us ne us se kahá, Kyá tú wuhí mard i Ḳhudá hai jo Yahúdáh se áyá thá? Us ne kahá, Háṉ.

15Tab us ne us se kahá, Mere sáth ghar chal, aur roṭí khá.

16Us ne kahá, Maiṉ tere sáth lauṭ nahíṉ saktá, aur na tere ghar já saktá húṉ, aur maiṉ tere sáth is jagah na roṭí kháúṉ, na pání píúṉ:

17kyúṉki Ḳhudáwand ká mujh ko yúṉ hukm húá hai, ki Tú waháṉ na roṭí kháná, na pání píná, aur na us ráste se hokar lauṭná, jis se tú jáe.

18Tab us ne us se kahá, Maiṉ bhí terí tarah nabí húṉ; aur Ḳhudáwand ke hukm se ek firishte ne mujh se yih kahá, ki Use apne sáth apne ghar meṉ lauṭákar le á, táki wuh roṭí kháe aur pání piye. Lekin us ne us se jhúṭh kahá.

19So wuh us ke sáth lauṭ gayá, aur us ke ghar meṉ roṭí kháí, aur pání piyá.

20Aur jab wuh dastarḳhwán par baiṭhe the, to Ḳhudáwand ká kalám us nabí par jo use lauṭá láyá thá názil húá:

21aur us ne us mard i Ḳhudá se jo Yahúdáh se áyá thá chillákar kahá, Ḳhudáwand yúṉ farmátá hai, Is liye ki tú ne Ḳhudáwand ke kalám se náfarmání kí, aur us hukm ko nahíṉ máná jo Ḳhudáwand tere Ḳhudá ne tujhe diyá thá;

22balki tú lauṭ áyá, aur tú ne usí jagah, jis kí bábat Ḳhudáwand ne tujhe farmáyá thá, ki Na roṭí kháná, na pání píná, roṭí bhí kháí, aur pání bhí piyá; so terí lásh tere bápdádá kí qabr tak nahíṉ pahuṉchegí.

23Aur jab wuh roṭí khá chuká aur pání pí chuká, to us ne us ke liye, ya‘ní us nabí ke liye jise wuh lauṭá láyá thá, gadhe par zín kas diyá.

24Aur jab wuh rawána húá, to ráh meṉ use ek sher milá jis ne use már ḍálá: so us kí lásh ráh meṉ paṛí rahí, aur gadhá us ke pás khaṛá rahá, aur sher bhí us lásh ke pás khaṛá rahá.

25Aur log udhar se guzre aur dekhá, ki lásh ráh meṉ paṛí hai, aur sher lásh ke pás khaṛá hai; so unhoṉ ne us shahr meṉ, jaháṉ wuh buḍḍhá nabí rahtá thá, yih batáyá.

26Aur jab us nabí ne jo use ráh se lauṭá láyá thá yih suná to kahá, Yih wuhí mard i Ḳhudá hai jis ne Ḳhudáwand ke kalám kí náfarmání kí: isí liye Ḳhudáwand ne us ko sher ke hawále kar diyá, aur us ne Ḳhudáwand ke us suḳhan ke mutábiq jo us ne us se kahá thá use pháṛá aur már ḍálá.

27Phir us ne apne beṭoṉ se kahá, ki Mere liye gadhe par zín kas do. So unhoṉ ne zín kas diyá.

28Tab wuh gayá, aur us ne us kí lásh ráh meṉ paṛí húí, aur gadhe aur sher ko lásh ke pás khaṛe páyá; kyúṉki sher ne na lásh ko kháyá, aur na gadhe ko pháṛá thá.

29So us nabí ne us mard i Ḳhudá kí lásh uṭhákar use gadhe par rakkhá, aur le áyá: aur wuh buḍḍhá nabí us par mátam karne aur use dafn karne ko apne shahr meṉ áyá.

30Aur us ne us kí lásh ko apní qabr meṉ rakkhá; aur unhoṉ ne us par mátam kiyá, aur kahá, Háe, mere bháí!

31Aur jab wuh use dafn kar chuká, to us ne apne beṭoṉ se kahá, ki Jab maiṉ mar jáúṉ, to mujh ko usí qabr meṉ dafn karná jis meṉ yih mard i Ḳhudá dafn húá hai; merí haḍḍiyáṉ us kí haḍḍiyoṉ ke barábar rakhná:

32is liye ki wuh bát jo us ne Ḳhudáwand ke hukm se Baitel ke mazbah ke ḳhiláf, aur un sab úṉche maqámoṉ ke gharoṉ ke ḳhiláf jo Sámariya ke qasboṉ meṉ haiṉ kahí hai, zarúr púrí hogí.

33Is májare ke ba‘d bhí Yarubi‘ám apní burí ráh se báz na áyá; balki us ne ‘awámm meṉ se úṉche maqámoṉ ke káhin ṭhahráe: jis kisí ne cháhá, use us ne maḳhsús kiyá, táki úṉche maqámoṉ ke liye káhin hoṉ.

34Aur yih fi‘l Yarubi‘ám ke gharáne ke liye use káṭ ḍálne aur use rú e zamín par se nest o nábúd karne ke liye gunáh ṭhahrá.

← Chapter 12 Jump to: Chapter 14 →