Numbers 28

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 27 Jump to: Chapter 29 →

1Aur Ḳhudáwand ne Músá se kahá, ki

2Baní Isráíl se kah, ki Merá chaṛháwá, ya‘ní merí wuh g̣izá jo ráhatangez ḳhushbú kí átashín qurbání hai, tum yád karke mere huzúr waqt i mu‘aiyan par guzráná karná.

3Tú un se kah de, ki Jo átashín qurbání tum ko Ḳhudáwand ke huzúr guzránní hai, wuh yih hai; ki do be‘aib yaksála nar barre har roz dáimí soḳhtaní qurbání ke liye chaṛháyá karo.

4Ek barra subh, aur dúsrá barra shám ko chaṛháná;

5aur sáth hí aifah ke dasweṉ hisse ke barábar maida, jis meṉ kúṭkar nikálá húá tel chautháí hín ke barábar milá ho, nazr kí qurbání ke taur par guzránná.

6Yih wuhí dáimí soḳhtaní qurbání hai, jo koh i Síná par muqarrar kí gayí, táki Ḳhudáwand ke huzúr ráhatangez ḳhushbú kí átashín qurbání ṭhahre.

7Aur hín kí chautháí ke barábar mai fí barra tapáwan ke liye láná. Maqdis hí meṉ Ḳhudáwand ke huzúr mai ká yih tapáwan chaṛháná.

8Aur dúsre barre ko shám ke waqt chaṛháná, aur us ke sáth bhí subh kí tarah waisí hí nazr kí qurbání aur tapáwan ko, táki yih Ḳhudáwand ke huzúr ráhatangez ḳhushbú kí átashín qurbání ṭhahre.

9Aur sabt ke roz do be‘aib yaksála nar barre, aur nazr kí qurbání ke taur par aifah ke páṉchweṉ hisse ke barábar maida, jis meṉ tel milá ho, tapáwan ke sáth guzránná.

10Dáimí soḳhtaní qurbání aur us ke tapáwan ke ‘aláwa yih har sabt kí soḳhtaní qurbání hai.

11Aur apne mahínoṉ ke shurú‘ meṉ har máh do bachhṛe aur ek meṉḍhá, aur sát be‘aib yaksála nar barre soḳhtaní qurbání ke taur par Ḳhudáwand ke huzúr chaṛháyá karná.

12Aur aifah ke tín daháí hisse ke barábar maida, jis meṉ tel milá ho, har bachhṛe ke sáth, aur aifah ke páṉchweṉ hisse ke barábar maida, jis meṉ tel milá ho, har meṉḍhe ke sáth, aur aifah ke dasweṉ hisse ke barábar maida, jis meṉ tel milá ho,

13har barre ke sáth nazr kí qurbání ke taur par láná; táki yih ráhatangez ḳhushbú kí soḳhtaní qurbání, ya‘ní Ḳhudáwand ke huzúr átashín qurbání ṭhahre.

14Aur in ke sáth tapáwan ke liye mai fí bachhṛá nisf hín ke barábar, aur fí meṉḍhá tiháí hín ke barábar, aur fí barra chautháí hín ke barábar ho. Yih sál bhar ke har mahíne kí soḳhtaní qurbání hai.

15Aur us dáimí soḳhtaní qurbání aur us ke tapáwan ke ‘aláwa ek bakrá ḳhatá kí qurbání ke taur par Ḳhudáwand ke huzúr guzráná jáe.

16Aur pahle mahíne kí chaudahwíṉ táríḳh ko Ḳhudáwand kí fasah húá kare.

17Aur usí mahíne kí pandrahwíṉ táríḳh ko ‘íd ho, aur sát din tak beḳhamírí roṭí kháí jáe.

18Pahle roz logoṉ ká muqaddas majma‘ ho. Tum us din koí ḳhádimána kám na karná,

19balki tum átashín qurbání, ya‘ní Ḳhudáwand ke huzúr soḳhtaní qurbání ke taur par do bachhṛe aur ek meṉḍhá aur sát yaksála nar barre chaṛháná. Yih sab ke sab be‘aib hoṉ.

20Aur un ke sáth nazr kí qurbání ke taur par tel milá húá maida fí bachhṛá aifah ke tín daháí hisse ke barábar, aur fí meṉḍhá páṉchweṉ hisse ke barábar;

21aur sátoṉ barroṉ meṉ se har barra píchhe aifah ke dasweṉ hisse ke barábar guzráná karná.

22Aur ḳhatá kí qurbání ke liye ek bakrá ho, táki us se tumháre liye kaffára diyá jáe.

23Tum subh kí soḳhtaní qurbání ke ‘aláwa, jo dáimí soḳhtaní qurbání hai, in ko bhí guzránná.

24Isí tarah tum roz sát din tak átashín qurbání kí yih g̣izá chaṛháná, táki wuh Ḳhudáwand ke huzúr ráhatangez ḳhushbú ṭhahre. Rozmarra kí dáimí soḳhtaní qurbání aur tapáwan ke ‘aláwa yih bhí guzráná jáe.

25Aur sátweṉ din phir tumhárá muqaddas majma‘ ho; us meṉ koí ḳhádimána kám na karná.

26Aur pahle phaloṉ ke din, jab tum nayí nazr kí qurbání haftoṉ kí ‘íd meṉ Ḳhudáwand ke huzúr guzráno, tab bhí tumhárá muqaddas majma‘ ho; us roz koí ḳhádimána kám na karná:

27balki tum soḳhtaní qurbání ke taur par do bachhṛe, ek meṉḍhá aur sát yaksála nar barre guzránná, táki yih Ḳhudáwand ke huzúr ráhatangez ḳhushbú ho.

28Aur in ke sáth nazr kí qurbání ke taur par tel milá húá maida fí bachhṛá aifah ke tín daháí hisse ke barábar, aur fí meṉḍhá páṉchweṉ hisse ke barábar.

29Aur sátoṉ barroṉ meṉ se har barre píchhe aifah ke dasweṉ hisse ke barábar ho.

30Aur ek bakrá ho táki tumháre liye kaffára diyá jáe.

31Dáimí soḳhtaní qurbání aur us kí nazr kí qurbání ke ‘aláwa tum in ko bhí guzránná. Yih sab be‘aib hoṉ, aur in ke tapáwan sáth hoṉ.

← Chapter 27 Jump to: Chapter 29 →