Numbers 29

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 28 Jump to: Chapter 30 →

1Aur sátweṉ mahíne kí pahlí táríḳh ko tumhárá muqaddas majma‘ ho; us meṉ koí ḳhádimána kám na karná. Yih tumháre liye narsinge phúṉkne ká din hai.

2Tum soḳhtaní qurbání ke taur par ek bachhṛá, ek meṉḍhá, aur sát be‘aib yaksála nar barre chaṛháná, táki yih Ḳhudáwand ke huzúr ráhatangez ḳhushbú ṭhahre.

3Aur in ke sáth nazr kí qurbání ke taur par tel milá húá maida fí bachhṛá aifah ke tín daháí hisse ke barábar, aur fí meṉḍhá páṉchweṉ hisse ke barábar,

4aur sátoṉ barroṉ meṉ se har barre píchhe aifah ke dasweṉ hisse ke barábar ho.

5Aur ek bakrá ḳhatá kí qurbání ke liye ho, táki tumháre wáste kaffára diyá jáe.

6Naye chánd kí soḳhtaní qurbání aur us kí nazr kí qurbání, aur dáimí soḳhtaní qurbání aur us kí nazr kí qurbání, aur un ke tapáwanoṉ ke ‘aláwa, jo apne apne áín ke mutábiq guzráne jáeṉge, yih bhí ráhatangez ḳhushbú kí átashín qurbání ke taur par Ḳhudáwand ke huzúr chaṛháe jáeṉ.

7Phir usí sátweṉ mahíne kí daswíṉ táríḳh ko tumhárá muqaddas majma‘ ho; tum apní apní ján ko dukh dená, aur kisí tarah ká kám na karná;

8balki soḳhtaní qurbání ke taur par ek bachhṛá, ek meṉḍhá, aur sát yaksála nar barre Ḳhudáwand ke huzúr chaṛháná, táki yih ráhatangez ḳhushbú ṭhahre; yih sab ke sab be‘aib hoṉ:

9aur in ke sáth nazr kí qurbání ke taur par tel milá húá maida fí bachhṛá aifah ke tín daháí hisse ke barábar, aur fí meṉḍhá páṉchweṉ hisse ke barábar;

10aur sátoṉ barroṉ meṉ se har barre píchhe aifah ke dasweṉ hisse ke barábar ho:

11aur ḳhatá kí qurbání ke liye ek bakrá ho; yih bhí us ḳhatá kí qurbání ke ‘aláwa, jo kaffáre ke liye hai, aur dáimí soḳhtaní qurbání, aur us kí nazr kí qurbání, aur tapáwanoṉ ke ‘aláwa chaṛháe jáeṉ.

12Aur sátweṉ mahíne kí pandrahwíṉ táríḳh ko phir tumhárá muqaddas majma‘ ho; us din tum koí ḳhádimána kám na karná; aur sát din tak Ḳhudáwand kí ḳhátir ‘íd manáná.

13Aur tum soḳhtaní qurbání ke taur par terah bachhṛe, do meṉḍhe, aur chaudah yaksála nar barre chaṛháná, táki yih ráhatangez ḳhushbú kí átashín qurbání ṭhahre; yih sab ke sab be‘aib hoṉ.

14Aur in ke sáth nazr kí qurbání ke taur par terah bachhṛoṉ meṉ se har bachhṛe píchhe, tel milá húá maida aifah ke tín daháí hisse ke barábar, aur donoṉ meṉḍhoṉ meṉ se har meṉḍhe píchhe páṉchweṉ hisse ke barábar;

15aur chaudah barroṉ meṉ se har barre píchhe aifah ke dasweṉ hisse ke barábar ho;

16aur ek bakrá ḳhatá kí qurbání ke liye ho. Yih sab dáimí soḳhtaní qurbání aur us kí nazr kí qurbání aur tapáwan ke ‘aláwa chaṛháe jáeṉ.

17Aur dúsre din bárah bachhṛe, do meṉḍhe, aur chaudah be‘aib yaksála nar barre chaṛháná.

18Aur bachhṛoṉ, aur meṉḍhoṉ, aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ:

19aur ek bakrá ḳhatá kí qurbání ke liye ho. Yih sab dáimí soḳhtaní qurbání aur us kí nazr kí qurbání aur tapáwanoṉ ke ‘aláwa chaṛháe jáeṉ.

20Aur tísre din gyárah bachhṛe, do meṉḍhe, aur chaudah yaksála be‘aib nar barre hoṉ.

21Aur bachhṛoṉ, aur meṉḍhoṉ aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ:

22aur ek bakrá ḳhatá kí qurbání ke liye ho. Yih sab dáimí soḳhtaní qurbání aur us kí nazr ki qurbání aur tapáwan ke ‘aláwa chaṛháe jáeṉ.

23Aur chauthe din das bachhṛe, do meṉḍhe aur chaudah yaksála be‘aib nar barre hoṉ.

24Aur bachhṛoṉ, aur meṉḍhoṉ, aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ;

25aur ek bakrá ḳhatá kí qurbání ke liye ho; yih sab dáimí soḳhtaní qurbání aur us kí nazr kí qurbání aur tapáwan ke ‘aláwa chaṛháe jáeṉ.

26Aur páṉchweṉ din nau bachhṛe, do meṉḍhe, aur chaudah yaksála be‘aib nar barre hoṉ.

27Aur bachhṛoṉ, aur meṉḍhoṉ, aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ;

28aur ek bakrá ḳhatá kí qurbání ke liye ho; yih sab dáimí soḳhtaní qurbání aur us kí nazr kí qurbání aur tapáwan ke ‘aláwa chaṛháe jáeṉ.

29Aur chhaṭe din áṭh bachhṛe, do meṉḍhe, aur chaudah yaksála be‘aib nar barre hoṉ.

30Aur bachhṛoṉ aur meṉḍhoṉ, aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ;

31aur ek bakrá ḳhatá kí qurbání ke liye ho; yih sab dáimí soḳhtaní qurbání aur us kí nazr kí qurbání aur tapáwan ke ‘aláwa chaṛháe jáeṉ.

32Aur sátweṉ din sát bachhṛe, do meṉḍhe aur chaudah yaksála be‘aib nar barre hoṉ;

33aur bachhṛoṉ aur meṉḍhoṉ aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ;

34aur ek bakrá ḳhatá kí qurbání ke liye ho; yih sab dáimí soḳhtaní qurbání aur us kí nazr kí qurbání aur tapáwan ke ‘aláwa chaṛháe jáeṉ.

35Aur áṭhweṉ din tumhárá muqaddas majma‘ ho; tum us din koí ḳhádimána kám na karná;

36balki tum ek bachhṛá, ek meṉḍhá aur sát yaksála be‘aib nar barre soḳhtání qurbání ke taur par chaṛháná, táki wuh Ḳhudáwand ke huzúr ráhatangez ḳhushbú kí átashín qurbání ṭhahre.

37Aur bachhṛe aur meṉḍhe aur barroṉ ke sáth, un ke shumár aur áín ke mutábiq, un kí nazr kí qurbání aur tapáwan hoṉ;

38aur ek bakrá ḳhatá kí qurbání ke liye ho; yih sab dáimí soḳhtání qurbání aur us kí nazr kí qurbání aur tapáwan ke ‘aláwa chaṛháe jáeṉ.

39Tum apní muqarrara ‘ídoṉ meṉ apní mannatoṉ aur razá kí qurbáníoṉ ke ‘aláwa yihí soḳhtaní qurbáníáṉ aur nazr kí qurbáníáṉ aur tapáwan aur salámatí kí qurbáníáṉ guzránná.

40Aur jo kuchh Ḳhudáwand ne Músá ko hukm diyá, wuh sab Músá ne baní Isráíl ko batá diyá.

← Chapter 28 Jump to: Chapter 30 →