Numbers 6

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 5 Jump to: Chapter 7 →

1Phir Ḳhudáwand ne Músá se kahá, ki

2Baní Isráíl se kah, ki Jab koí mard yá ‘aurat nazír kí mannat, ya‘ní apne áp ko Ḳhudáwand ke liye alag rakhne kí ḳháss mannat máne,

3to wuh mai aur sharáb se parhez kare, aur mai ká yá sharáb ká sirka na píe, aur na angúr ká ras píe, aur na táza yá ḳhushk angúr kháe.

4Aur apní nazárat ke tamám aiyám meṉ, bíj se lekar chhilke tak, jo kuchh angúr ke daraḳht meṉ paidá ho use na kháe.

5Aur us kí nazárat kí mannat ke dinoṉ meṉ us ke sir par ustura na pherá jáe: jab tak wuh muddat, jis ke liye wuh Ḳhudáwand ká nazír baná hai púrí na ho, tab tak wuh muqaddas rahe aur apne sir ke báloṉ kí laṭoṉ ko baṛhne de.

6Un tamám aiyám meṉ jab wuh Ḳhudáwand ká nazír ho wuh kisí lásh ke nazdík na jáe.

7Wuh apne báp, yá maṉ, yá bháí, yá bahin kí ḳhátir bhí jab wuh mareṉ, apne áp ko najis na kare; kyúṉki us kí nazárat, jo Ḳhudá ke liye hai, us ke sir par hai.

8Wuh apní nazárat kí púrí muddat tak Ḳhudáwand ke liye muqaddas hai.

9Aur agar koí ádmí nágahán us ke pás hí mar jáe, aur us kí nazárat ke sir ko nápák kar de; to wuh apne pák hone ke din apná sir munḍwáe, ya‘ní sátweṉ din sir munḍwáe.

10Aur áṭhweṉ roz do qumríáṉ, yá kabútar ke do bachche, ḳhaima e ijtimá‘ ke darwáze par káhin ke pás láe.

11Aur káhin ek ko ḳhatá kí qurbání ke liye, aur dúsre ko soḳhtaní qurbání ke liye guzráne aur us ke liye kaffára de, kyúṉki wuh murde ke sabab se gunahgár ṭhahrá hai; aur us ke sir ko usí din muqaddas kare.

12Phir wuh apní nazárat kí muddat ko Ḳhudáwand ke liye muqaddas kare, aur ek yaksála nar barra jurm kí qurbání ke liye láe; lekin jo din guzar gaye haiṉ, wuh gine nahíṉ jáeṉge, kyúṉki us kí nazárat nápák ho gayí thí.

13Aur nazír ke liye shara‘ yih hai, ki jab us kí nazárat ke din púre ho jáeṉ, to wuh ḳhaima e ijtimá‘ ke darwáze par házir kiyá jáe.

14Aur wuh Ḳhudáwand ke huzúr apná chaṛháwá chaṛháe, ya‘ní soḳhtaní qurbání ke liye ek be‘aib yaksála nar barra, aur ḳhatá kí qurbání ke liye ek be‘aib yaksála máda barra, aur salámatí kí qurbání ke liye ek be‘aib meṉḍhá;

15aur beḳhamírí roṭiyoṉ kí ek ṭokrí, aur tel mile húe maide ke kulche, aur tel chupṛí húí beḳhamírí roṭiyáṉ, aur un kí nazr kí qurbání aur un ke tapáwan láe.

16Aur káhin un ko Ḳhudáwand ke huzúr lákar us kí taraf se ḳhatá kí qurbání aur soḳhtaní qurbání guzráne.

17Aur us meṉḍhe ko, beḳhamírí roṭiyoṉ kí ṭokrí ke sáth, Ḳhudáwand ke huzúr salámatí kí qurbání ke taur par guzráne, aur káhin us kí nazr kí qurbání aur us ká tapáwan bhí chaṛháe.

18Phir wuh nazír ḳhaima e ijtimá‘ ke darwáze par apní nazárat ke bál munḍwáe, aur nazárat ke báloṉ ko, us ág meṉ ḍál de, jo salámatí kí qurbání ke níche hogí.

19Aur jab nazír apní nazárat ke bál munḍwá chuke, to káhin us meṉḍhe ká ubálá húá shána, aur ek beḳhamírí roṭí ṭokrí meṉ se aur ek beḳhamírí kulcha lekar us nazír ke háthoṉ par un ko dhare.

20Phir káhin un ko hiláne kí qurbání ke taur par Ḳhudáwand ke huzúr hiláe. Hiláne kí qurbání ke síne aur uṭháne kí qurbání ke sháne ke sáth yih bhí káhin ke liye muqaddas haiṉ. Is ke ba‘d nazír mai pí sakegá.

21Nazír jo mannat máne, aur jo chaṛháwá apní nazárat ke liye Ḳhudáwand ke huzúr láe, ‘aláwa us ke jis ká use maqdúr ho, un sabhoṉ ke báre meṉ shara‘ yih hai. Jaisí mannat us ne mání ho, waisá hí us ko nazárat kí shara‘ ke mutábiq ‘amal karná paṛegá.

22Aur Ḳhudáwand ne Músá se kahá, ki

23Hárún aur us ke beṭoṉ se kah, ki Tum baní Isráíl ko is tarah du‘á diyá karná. Tum un se kahná,

24Ḳhudáwand tujhe barakat de, aur tujhe mahfúz rakkhe.

25Ḳhudáwand apná chihra tujh par jalwagar farmáe, aur tujh par mihrbán rahe.

26Ḳhudáwand apná chihra terí taraf mutawajjih kare, aur tujhe salámatí baḳhshe.

27Is tarah wuh mere nám ko baní Isráíl par rakkheṉ, aur maiṉ un ko barakat baḳhshúṉgá.

← Chapter 5 Jump to: Chapter 7 →