bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Numbers 5
Numbers 5
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 6 →
1
Phir Ḳhudáwand ne Músá se kahá, ki
2
Baní Isráíl ko hukm de, ki wuh har koṛhí ko, aur jiryán ke maríz ko, aur jo murde ke sabab se nápák ho, us ko lashkargáh se báhar kar deṉ;
3
aisoṉ ko, ḳhwáh wuh mard hoṉ, yá ‘aurat, tum nikálkar un ko lashkargáh ke báhar rakkho, táki wuh un kí lashkargáh ko, jis ke darmiyán maiṉ rahtá húṉ, nápák na kareṉ.
4
Chunáṉchi baní Isráíl ne aisá hí kiyá, aur un ko nikálkar lashkargáh ke báhar rakkhá, jaisá Ḳhudáwand ne Músá ko hukm diyá thá, waisá hí baní Isráíl ne kiyá.
5
Aur Ḳhudáwand ne Músá se kahá, ki
6
Baní Isráíl se kah, ki Agar koí mard yá ‘aurat Ḳhudáwand kí hukm‘udúlí karke koí aisá gunáh kare jo ádmí karte haiṉ, aur qusúrwár ho jáe;
7
to jo gunáh us ne kiyá hai, wuh us ká iqrár kare, aur apní taqsír ke mu‘áwaze meṉ púrá dám, aur us meṉ us ká páṉchwáṉ hissa âur milákar us shaḳhs ko de, jis ká us ne qusúr kiyá hai.
8
Lekin agar us shaḳhs ka koí rishtadár na ho, jise us taqsír ká mu‘áwaza diyá jáe, to taqsír ká, jo mu‘áwaza Ḳhudáwand ko diyá jáe, wuh káhin ká ho, ‘aláwa kaffáre ke us meṉḍhe ke jis se us ká kaffára diyá jáe.
9
Aur jitní muqaddas chízeṉ baní Isráíl uṭháne kí qurbání ke taur par káhin ke pás láeṉ, wuh usí kí hoṉ.
10
Aur har shaḳhs kí muqaddas kí húí chízeṉ us kí hoṉ; aur jo chíz koí shaḳhs káhin ko de, wuh bhí usí kí ho.
11
Aur Ḳhudáwand ne Músá se kahá, ki Baní Isráíl se kah, ki
12
Agar kisí kí bíwí gumráh hokar us se bewafáí kare;
13
aur koí dúsrá ádmí us ‘aurat ke sáth mubásharat kare, aur us ke shauhar ko ma‘lúm na ho, balki yih us se poshída rahe, aur wuh nápák ho gayí ho, par na to koí sháhid ho, aur na wuh ‘ain fi‘l ke waqt pakṛí gayí ho;
14
aur us ke shauhar ke dil meṉ g̣airat áe, aur wuh apní bíwí se g̣airat kháne lage, háláṉki wuh nápák húí ho, yá us ke shauhar ke dil meṉ g̣airat áe, aur wuh apní bíwí se g̣airat kháne lage, háláṉki wuh nápák nahíṉ húí;
15
to wuh shaḳhs apní bíwí ko káhin ke pás házir kare, aur us ‘aurat ke chaṛháwe ke liye aifah ke dasweṉ hisse ke barábar jau ká áṭá láe, par us par na tel ḍále, na lubán rakkhe; kyúṉki yih nazr kí qurbání g̣airat kí hai, ya‘ní yih yádgárí kí nazr kí qurbání hai, jis se gunáh yád diláyá játá hai.
16
Tab káhin us ‘aurat ko nazdík lákar Ḳhudáwand ke huzúr khaṛí kare.
17
Aur káhin miṭṭí ke ek básan meṉ muqaddas pání le, aur maskan ke farsh kí gard lekar us pání meṉ ḍále.
18
Phir káhin us ‘aurat ko Ḳhudáwand ke huzúr khaṛí karke us ke sir ke bál khulwá de, aur yádgárí kí nazr kí qurbání ko, jo g̣airat kí nazr kí qurbání hai, us ke háthoṉ par dhare, aur káhin apne háth meṉ us kaṛwe pání ko le, jo la‘nat ko látá hai.
19
Phir káhin us ‘aurat ko qasam khilákar kahe, ki Agar kisí shaḳhs ne tujh se suhbat nahíṉ kí hai, aur tú apne shauhar kí hotí húí nápákí kí taraf máil nahíṉ húí, to tú is kaṛwe pání kí tásír se, jo la‘nat látá hai, bachí rah.
20
Lekin agar tú apne shauhar kí hotí húí gumráh hokar nápák ho gayí hai, aur tere shauhar ke siwá kisí dúsre shaḳhs ne tujh se suhbat kí hai,
21
to káhin us ‘aurat ko la‘nat kí qasam khilákar us se kahe, ki Ḳhudáwand tujhe terí qaum meṉ terí rán ko saṛákar, aur tere peṭ ko phulákar la‘nat aur phiṭkár ká nishána banáe.
22
Aur yih pání, jo la‘nat látá hai terí antṛiyoṉ meṉ jákar tere peṭ ko phuláe aur terí rán ko saṛáe; aur ‘aurat Ámín, Ámín, kahe.
23
Phir káhin un la‘natoṉ ko kisí kitáb meṉ likhkar un ko usí kaṛwe pání meṉ dho ḍále.
24
Aur wuh kaṛwá pání jo la‘nat ko látá hai, us ‘aurat ko piláe; aur wuh pání, jo la‘nat ko látá hai, us ‘aurat ke peṭ meṉ jákar kaṛwá ho jáegá.
25
Aur káhin us ‘aurat ke háth se g̣airat kí nazr kí qurbání ko lekar Ḳhudáwand ke huzúr us ko hiláe, aur use mazbah ke pás láe.
26
Phir káhin us nazr kí qurbání meṉ se, us kí yádgárí ke taur par, ek muṭṭhí lekar use mazbah par jaláe; ba‘d us ke wuh pání us ‘aurat ko piláe.
27
Aur jab wuh use wuh pání pilá chukegá, to aisá hogá, ki agar wuh nápák húí, aur us ne apne shauhar se bewafáí kí, to wuh pání, jo la‘nat ko látá hai, us ke peṭ meṉ jákar kaṛwá ho jáegá, aur us ká peṭ phúl jáegá, aur us kí rán saṛ jáegí, aur wuh ‘aurat apní qaum meṉ la‘nat ká nishána banegí.
28
Par agar wuh nápák nahíṉ húí, balki pák hai, to beilzám ṭhahregí, aur us se aulád hogí.
29
G̣airat ke báre meṉ yihí shara‘ hai, ḳhwáh ‘aurat apne shauhar kí hotí húí gumráh hokar nápák ho jáe, yá mard par g̣airat sawár ho,
30
aur wuh apní bíwí se g̣airat kháne lage; aise hál meṉ wuh us ‘aurat ko Ḳhudáwand ke áge khaṛí kare, aur káhin us par yih sárí sharí‘at ‘amal meṉ láe.
31
Tab mard gunáh se barí ṭhahregá, aur us ‘aurat ká gunáh usí ke sir lagegá.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 6 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36