Leviticus 1

Chinese TTVR (現代台語譯本羅馬字版)

Jump to: Chapter 2 →

1Siōng Chú tùi hōe-bō͘ kiò Mô͘-se, bēng-lēng i

2tùi Í-sek-lia̍t -lâng pan-pò͘ ē-bīn ê tiâu-lē: Lín nā ū lâng beh hiàn cheng-siⁿ chòe lé-mi̍h hō͘ Siōng Chú, tio̍h tùi gû-kûn iûⁿ-kûn ê tiong-kan chhú-lâi hiàn.

3I nā beh hiàn gû chòe sio-hòa-chè, tio̍h khan chi̍t chiah bô hâ-chhû ê gû-káng lâi, tī hōe-bō͘ ê mn̂g-kháu hiàn, chiū ōe tit-tio̍h Siōng Chú chiap-la̍p.

4I tio̍h hōaⁿ-chhiú tī sio-hòa-chè ê cheng-siⁿ ê thâu-khak téng, án-ni sio-hòa-chè chiū siū chiap-la̍p, thòe i sio̍k-chōe.

5I tio̍h tī Siōng Chú ê bīn-chêng thâi hit-chiah gû-káng-á; A-lûn ê hō͘-tāi chòe chè-si--ê tio̍h hiàn hiah-ê huih, chiong huih hiù tī hōe-bō͘ mn̂g-kháu chè-tôaⁿ ê sì-chiu-ûi.

6Hit-ê lâng tio̍h chiong sio-hòa-chè ê cheng-siⁿ ê phê pak--khí-lâi, kā bah chhiat-chòe chi̍t-tè chi̍t-tè.

7A-lûn ê hō͘-tāi chòe chè-si--ê tio̍h tī chè-tôaⁿ téng khí-hé, kā chhâ pâi tī hé ê téng-bīn,

8koh chiong bah, thâu, iû pâi tī tôaⁿ-téng teh to̍h ê chhâ téng-bīn.

9Hōng-hiàn ê lâng tio̍h chiong chè-mi̍h ê pak-lāi kap thúi ēng chúi sóe chheng-khì, chè-si chiū chiong kui-ê chè-mi̍h lóng hē tī tôaⁿ-téng chòe sio-hòa-chè, ēng hé sio chòe phang-phang ê chè-mi̍h hiàn hō͘ Siōng Chú.

10Lâng nā beh hiàn mî-iûⁿ á-sī soaⁿ-iûⁿ chòe sio-hòa-chè, tio̍h hiàn chi̍t chiah bô hâ-chhû ê iûⁿ-káng.

11I tio̍h tī Siōng Chú ê bīn-chêng, tī chè-tôaⁿ ê pak-pêng thâi hit-chiah iûⁿ; A-lûn ê hō͘-tāi chòe chè-si--ê tio̍h chiong iûⁿ ê huih hiù tī tôaⁿ ê sì-chiu-ûi.

12Hit-ê lâng tio̍h kā hit-chiah iûⁿ chhiat-chòe chi̍t-tè chi̍t-tè. Āu-lâi, chè-si chiong hiah-ê bah liân thâu kap iû, pâi tī chè-tôaⁿ teh to̍h ê chhâ téng-bīn.

13Hōng-hiàn ê lâng tio̍h chiong chè-mi̍h ê pak-lāi kap thúi ēng chúi sóe chheng-khì, chè-si chiū chiong kui-ê chè-mi̍h lóng hē tī chè-tôaⁿ téng, ēng hé sio chòe phang-phang ê sio-hòa-chè hiàn hō͘ Siōng Chú.

14Lâng nā beh hiàn chiáu-á chòe sio-hòa-chè hō͘ Siōng Chú, tio̍h hiàn pan-kah á-sī hún-chiáu-á-kiáⁿ.

15Chè-si tio̍h tòa chiáu-á lâi chè-tôaⁿ chêng, chūn-tn̄g i ê thâu, kā thâu sio tī tôaⁿ-téng; hō͘ chiáu-á ê huih tih tī tôaⁿ-piⁿ.

16Koh tio̍h chiong chiáu-á ê kui kap lāi-bīn ê mi̍h-kiāⁿ, hiat tī tôaⁿ-piⁿ ê tang-pêng piàⁿ hé-hu ê só͘-chāi.

17Tio̍h kā chiáu-á nn̄g ki si̍t the̍h--teh, chiong chiáu-á thiah-khui, m̄-kú m̄-thang thiah-tn̄g; chè-si tio̍h chiong chiáu-á pâi tī chè-tôaⁿ teh to̍h ê chhâ téng-bīn, ēng hé sio chòe phang-phang ê sio-hòa-chè hiàn hō͘ Siōng Chú.

Jump to: Chapter 2 →