Leviticus 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Nā ū lâng beh hiàn sò͘-chè hō͘ Siōng Chú, tio̍h ēng iù mī-hún chòe chè-mi̍h; tio̍h thîn iû tī mī-hún téng-bīn, koh hē jú-hiuⁿ.

2I tio̍h chiong chiah-ê tòa-khì A-lûn ê hō͘-tāi chòe chè-si--ê hia; chè-si tio̍h mi chi̍t tōa-pé iù mī-hún, the̍h chi̍t-kóa iû kap só͘-ū ê jú-hiuⁿ, hē tī chè-tôaⁿ téng, tāi-piáu só͘ hiàn ê sò͘-chè, ēng hé sio chòe phang-phang ê chè-mi̍h hiàn hō͘ Siōng Chú.

3Sò͘-chè só͘ chhun--ê tio̍h kui hō͘ A-lûn kap i ê kiáⁿ-sun; che sī chì-sèng--ê, in-ūi sī tùi ēng hé sio hiàn hō͘ Siōng Chú ê chè-mi̍h lâu--lo̍h-lâi--ê.

4Lí nā beh hiàn hé-lô͘ hang--kè ê chè-mi̍h chòe sò͘-chè, tio̍h ēng chhiau-iû ê iù mī-hún chòe ê bô-kàⁿ-piáⁿ, á-sī boah-iû ê bô-kàⁿ po̍h-piáⁿ.

5Nā beh hiàn chian-pôaⁿ chian--kè ê chè-mi̍h chòe sò͘-chè, tio̍h ēng chhiau-iû ê iù mī-hún chian ê bô-kàⁿ-piáⁿ.

6Tio̍h kā i peh chòe sòe-tè sòe-tè, thîn iû tī téng-bīn; che sī sò͘-chè.

7Nā beh hiàn tiáⁿ-á chian ê chè-mi̍h chòe sò͘-chè, tio̍h ēng chhiau-iû ê iù mī-hún chòe.

8Tio̍h chiong chiah-ê sò͘-chè tòa-khì Siōng Chú ê bīn-chêng, kau-tài chè-si, hō͘ i tòa kàu chè-tôaⁿ.

9Chè-si tio̍h tùi sò͘-chè ê tiong-kan the̍h chi̍t-pō͘-hūn hē tī chè-tôaⁿ téng, tāi-piáu só͘ hiàn ê sò͘-chè, ēng hé sio chòe phang-phang ê chè-mi̍h hiàn hō͘ Siōng Chú.

10Sò͘-chè só͘ chhun--ê tio̍h kui hō͘ A-lûn kap i ê kiáⁿ-sun; che sī chì-sèng--ê, in-ūi sī tùi ēng hé sio hiàn hō͘ Siōng Chú ê chè-mi̍h lâu--lo̍h-lâi--ê.

11Lín beh hiàn hō͘ Siōng Chú ê sò͘-chè m̄-thang chham kàⁿ; in-ūi kàⁿ kap bi̍t lóng bōe-ēng-tit ēng hé sio chòe chè-mi̍h hiàn hō͘ Siōng Chú.

12Chiah-ê mi̍h lín thang hiàn hō͘ Siōng Chú chòe khí-thâu-se̍k ê chè-mi̍h, m̄-kú m̄-thang tī chè-tôaⁿ téng kā i sio chòe phang-phang ê chè-mi̍h hiàn hō͘ Siōng Chú.

13Sò͘-chè tio̍h ēng iâm tiâu-hô; só͘-ū ê sò͘-chè lóng tio̍h lām iâm, in-ūi iâm sī Siōng-tè kap lín li̍p-iok ê kì-hō. Só͘-ū ê chè-mi̍h lóng tio̍h ū iâm.

14Lín nā ēng khí-thâu-se̍k ê ngó͘-kok chòe sò͘-chè hiàn hō͘ Siōng Chú, tio̍h ēng hang--kè sin ê be̍h-sūi, á-sī lún--kè sin ê ngó͘-kok.

15Tio̍h thîn iû tī hit téng-bīn, koh hē jú-hiuⁿ; che sī sò͘-chè.

16Chè-si chiū tùi hit tiong-kan the̍h chi̍t-pō͘-hūn lún--kè sin ê ngó͘-kok, kap iû, í-ki̍p só͘-ū ê jú-hiuⁿ, tāi-piáu só͘ hiàn ê sò͘-chè, ēng hé sio chòe chè-mi̍h hiàn hō͘ Siōng Chú.

← Chapter 1 Jump to: Chapter 3 →

推荐阅读

注释 Leviticus 注释书 → 灵修 Leviticus 灵修指南 → 购买此圣经 TTVR (現代台語譯本羅馬字版) 研读本圣经 →