Leviticus 13 — Chinese TTVR (現代台語譯本羅馬字版)

1Siōng Chú tùi Mô͘-se kap A-lûn kóng:

2Lâng ê phê-hu nā chéng, á-sī siⁿ-sián, á-sī piàn-sek, khó-lêng pìⁿ-chòe bâ-hong-pīⁿ, tio̍h kā i chhōa-khì chè-si A-lûn, á-sī A-lûn ê kiáⁿ-sun tiong chòe chè-si--ê hia.

3Chè-si tio̍h giām hit-ê lâng phê-hu ê chèng-thâu; ū chèng-thâu ê só͘-chāi, mn̂g nā í-keng pìⁿ-pe̍h, chèng-thâu chhim ji̍p-khì bah-lāi, che chiū-sī bâ-hong-pīⁿ; chè-si kā i kiám-cha liáu, tio̍h soan-pò͘ i bô chheng-khì.

4Hit-ê lâng ê phê-hu nā ū pe̍h-sek ê pan, khòaⁿ--khí-lâi bô chhim ji̍p-khì bah-lāi, i ê mn̂g mā bô pìⁿ-pe̍h, chè-si tio̍h chiong hit-ê lâng keh-lī chhit ji̍t.

5Kàu tē-chhit ji̍t, chè-si tio̍h koh kā i kiám-cha; nā chèng-thâu bô thòaⁿ-khui, chè-si tio̍h koh kā i keh-lī chhit ji̍t.

6Kàu tē-chhit ji̍t, chè-si tio̍h koh giām i; nā chèng-thâu khah siau, bô koh thòaⁿ-khui, chè-si tio̍h soan-pò͘ i chheng-khì, sī sián nā-tiāⁿ. Hit-ê lâng tio̍h sóe ka-kī ê saⁿ, chiū sǹg-chòe chheng-khì.

7M̄-kú i hō͘ chè-si giām--kè, soan-pò͘ chheng-khì liáu-āu, sián nā thòaⁿ-khui, i tio̍h koh khì hō͘ chè-si kiám-cha.

8Chè-si kā i kiám-cha, hoat-kiàn sián í-keng thòaⁿ-khui, chiū tio̍h soan-pò͘ i bô chheng-khì, sī bâ-hong.

9Nā ū lâng í-keng ū bâ-hong ê chèng-thâu, chiū tio̍h chhōa i khì chè-si hia.

10Chè-si tio̍h kā i kiám-cha; phê-hu nā ū só͘-chāi chéng koh pe̍h-pe̍h, mn̂g mā pìⁿ-pe̍h, tī chéng ê só͘-chāi siⁿ sin ê bah;

11che chiū-sī bān-sèng ê bâ-hong. Chè-si tio̍h soan-pò͘ i bô chheng-khì, m̄-bián koh kā i keh-lī koan-chhat.

12Bâ-hong nā thòaⁿ-khui, chè-si khòaⁿ ōe tio̍h ê só͘-chāi lóng thòaⁿ-khui,

13chè-si tio̍h kā i siông-sè kiám-cha; nā hoat-kiàn i choân-sin ê phê-hu lóng pìⁿ-pe̍h, chiū tio̍h soan-pò͘ i chheng-khì.

14I ê seng-khu nā chi̍t-ē chhut-hiān sin ê bah, i chiū bô chheng-khì.

15Chè-si nā giām-tio̍h hit-ê lâng ū sin ê bah, tio̍h soan-pò͘ i bô chheng-khì, in-ūi sin ê bah sī bô chheng-khì, sī bâ-hong.

16M̄-kú, sin ê bah nā ho̍k-goân pìⁿ-pe̍h, hit-ê lâng tio̍h lâi kìⁿ chè-si.

17Chè-si tio̍h kā i kiám-cha; nā hoat-kiàn kám-jiám ê só͘-chāi í-keng pìⁿ-pe̍h, chè-si chiū tio̍h soan-pò͘ hit-ê lâng chòe chheng-khì; hit-ê lâng chiū chheng-khì.

18Lâng nā siⁿ lia̍p-á ū i-hó,

19āu-lâi siⁿ lia̍p-á ê só͘-chāi chéng koh pe̍h-pe̍h, á-sī pìⁿ hún-âng-á-sek, chiū tio̍h hō͘ chè-si giām.

20Chè-si tio̍h kā i kiám-cha; nā hoat-kiàn chèng-thâu thòaⁿ-ji̍p bah-lāi, mn̂g pìⁿ-pe̍h, chè-si tio̍h soan-pò͘ i bô chheng-khì, sī bâ-hong siⁿ tī lia̍p-á lāi.

21Chè-si kā i kiám-cha, nā hoat-kiàn hit téng-bīn ê mn̂g bô pìⁿ-pe̍h, mā bô thòaⁿ-ji̍p bah-lāi, koh ū khah siau, chè-si chiū tio̍h kā i keh-lī chhit ji̍t.

22Chè-si nā hoat-kiàn pīⁿ ū tī phê-hu thòaⁿ-khui, chè-si tio̍h soan-pò͘ i bô chheng-khì, i ū tì-pīⁿ.

23Hún-âng-á-sek ê pan nā bô thòaⁿ-khui, sī lia̍p-á ê jiah, chè-si chiū tio̍h soan-pò͘ i chheng-khì.

24Nā ū lâng phê-hu hō͘ hé sio--tio̍h, sio--tio̍h ê só͘-chāi siⁿ sin ê bah, bah ū piàn-sek, bô-lūn sī pe̍h-sek tài hún-âng-á-sek, á-sī choân-pō͘ pe̍h-sek,

25chè-si chiū tio̍h kā i kiám-cha; nā hoat-kiàn piàn-sek ê phê-hu ê mn̂g pìⁿ-pe̍h, koh chhim ji̍p-khì phê-hu lāi, che sī bâ-hong tī hé sio--tio̍h ê só͘-chāi hoat--khí-lâi, chè-si tio̍h soan-pò͘ i bô chheng-khì.

26Chè-si kiám-cha liáu, nā piàn-sek ê só͘-chāi bô pe̍h-mn̂g, mā bô chhim ji̍p-khì phê-hu lāi, koh ū khah siau, chè-si chiū tio̍h kā i keh-lī koan-chhat chhit ji̍t.

27Kàu tē-chhit ji̍t, chè-si tio̍h koh kā i kiám-cha; nā í-keng thòaⁿ-khui, sī tì-tio̍h bâ-hong, chè-si chiū tio̍h soan-pò͘ i bô chheng-khì.

28Pe̍h-sek ê pan nā iáu tī goân-lâi ê só͘-chāi, bô thòaⁿ-khui, koh ū khah siau, sī hō͘ hé sio--tio̍h chéng--khí-lâi--ê, put-kò sī hé sio--tio̍h ê jiah, chè-si tio̍h soan-pò͘ i chheng-khì.

29Bô-lūn lâm-lú, nā tī thâu-khak á-sī ē-hâi ū tì chèng-thâu,

30chè-si tio̍h kā i kiám-cha; chèng-thâu nā chhim ji̍p-khì bah-lāi, hit-ūi ê mn̂g khah n̂g khah se, chè-si tio̍h soan-pò͘ i bô chheng-khì; che sī sián, chiū-sī thâu-khak á-sī ē-hâi ê bâ-hong.

31Chè-si kiám-cha hit-ê sián, nā bô chhim ji̍p-khì bah-lāi, hit só͘-chāi mā bô o͘ ê thâu-mn̂g á-sī chhùi-chhiu, chè-si tio̍h kā hit-ê lâng keh-lī koan-chhat chhit ji̍t.

32Kàu tē-chhit ji̍t, chè-si tio̍h koh kiám-cha chèng-thâu, sián nā bô thòaⁿ-khui, hit-ê só͘-chāi bô n̂g-sek ê thâu-mn̂g á-sī chhùi-chhiu, sián koh bô chhim ji̍p-khì bah-lāi,

33hit-ê lâng tio̍h thì thâu-mn̂g á-sī chhùi-chhiu, m̄-kú m̄-thang thì-tio̍h sián; chè-si tio̍h koh kā i keh-lī chhit ji̍t.

34Kàu tē-chhit ji̍t, chè-si tio̍h koh kiám-cha hit-ê sián; nā bô thòaⁿ-khui, mā bô chhim ji̍p-khì bah-lāi, chè-si chiū tio̍h soan-pò͘ i chheng-khì; hit-ê lâng tio̍h sóe ka-kī ê saⁿ, i chiū chheng-khì.

35M̄-kú i chheng-khì í-āu, sián nā thòaⁿ-khui,

36chè-si tio̍h koh kā i kiám-cha; sián nā í-keng thòaⁿ-khui, m̄-bián koh chhē n̂g ê thâu-mn̂g á-sī chhùi-chhiu, in-ūi hit-ê lâng í-keng bô chheng-khì.

37Chiàu chè-si ê koan-chhat, sián nā bô thòaⁿ-khui, hit só͘-chāi ū hoat o͘ ê thâu-mn̂g á-sī chhùi-chhiu, sián í-keng hó, hit-ê lâng sī chheng-khì--ê; chè-si chiū tio̍h soan-pò͘ i chòe chheng-khì.

38Bô-lūn lâm-lú, phê-hu nā khí pe̍h-pan,

39chè-si tio̍h kā i kiám-cha; pe̍h-pan nā-sī hé-hu-sek, che sī pe̍h-tiō, hit-ê lâng sī chheng-khì--ê.

40Nā ū lâng lak thâu-mn̂g, bô-lūn sī thuh-thâu á-sī thuh-hia̍h, iáu-sī chheng-khì.

42Thuh-thâu á-sī thuh-hia̍h ê só͘-chāi nā chhut-hiān hún-âng-á-sek, sī bâ-hong siⁿ tī thâu-khak.

43Chè-si tio̍h kā i kiám-cha; nā hoat-kiàn i ê thâu-khak bô mn̂g ê só͘-chāi chhut-hiān hún-âng-á-sek koh chéng-chéng, kap bâ-hong ê chèng-thâu kâng-khoán,

44hit-ê lâng chiū-sī tì-tio̍h bâ-hong, sī bô chheng-khì; chè-si tio̍h soan-pò͘ i bô chheng-khì; i ê chèng-thâu siⁿ tī thâu-khak.

45Tì-tio̍h bâ-hong ê lâng, saⁿ tio̍h thiah-li̍h, thâu-mn̂g tio̍h phah-sàm, ng-chhùi, hoah kóng, “Bô chheng-khì! Bô chheng-khì!”

46I ê seng-khu nā iáu ū chèng-thâu, i chiū-sī bô chheng-khì; kì-jiân bô chheng-khì, i tio̍h tī iâⁿ-gōa ka-kī tòa.

47Saⁿ nā siⁿ-ko͘, bô-lūn sī iûⁿ-mn̂g chhiah--ê, á-sī môa-se chit--ê, á-sī phê kap ēng phê chòe ê mi̍h-kiāⁿ,

49nā siⁿ chhiⁿ-sek á-sī âng-sek ê ko͘, tio̍h hō͘ chè-si giām.

50Chè-si tio̍h kā i kiám-cha, chiong siⁿ-ko͘ ê mi̍h-kiāⁿ lēng-gōa siu-khǹg chhit ji̍t.

51Kàu tē-chhit ji̍t, chè-si tio̍h koh kā i kiám-cha; ko͘ nā tī chiah-ê mi̍h-kiāⁿ thòaⁿ-khui, sī siⁿ ok-sèng ê ko͘, lóng sī bô chheng-khì.

52Hiah-ê siⁿ-ko͘ ê saⁿ, bô-lūn sī iûⁿ-mn̂g chhiah--ê, môa-se chit--ê, phê chòe--ê, á-sī ēng phê chòe ê mi̍h-kiāⁿ, lóng tio̍h sio-tiāu; che sī ok-sèng ê ko͘, it-tēng tio̍h ēng hé sio-tiāu.

53Chè-si koh kā i kiám-cha; ko͘ nā bô tī iûⁿ-mn̂g chhiah ê saⁿ, môa-se chit ê saⁿ, phê chòe ê saⁿ, á-sī tī ēng phê chòe ê mi̍h-kiāⁿ thòaⁿ-khui,

54chè-si tio̍h hoan-hù lâng sóe hiah-ê siⁿ-ko͘ ê mi̍h-kiāⁿ, koh kā in hun-khui siu-khǹg chhit ji̍t.

55Siⁿ-ko͘ ê só͘-chāi sóe liáu-āu, chè-si tio̍h koh kā i kiám-cha; nā siⁿ-ko͘ ê só͘-chāi sek bô piàn, sui-jiân bô thòaⁿ-khui, hiah-ê iû-goân bô chheng-khì; bô-lūn ok-sèng ê ko͘ siⁿ tī lāi-bīn á-sī gōa-bīn, kui-ê mi̍h-kiāⁿ lóng tio̍h ēng hé sio-tiāu.

56M̄-kú sóe liáu-āu, chè-si kā i kiám-cha; nā sek ū khah chhián, chè-si tio̍h chiong siⁿ-ko͘ ê só͘-chāi tùi saⁿ, bô-lūn sī iûⁿ-mn̂g chhiah--ê á-sī môa-se chit--ê, á-sī phê chòe--ê, kā thiah--khí-lâi.

57Nā saⁿ iáu ū ko͘, bô-lūn sī chit--ê, chhiah--ê, á-sī phê chòe ê mi̍h-kiāⁿ, tio̍h ēng hé sio hiah-ê siⁿ-ko͘ ê mi̍h-kiāⁿ.

58Lí sóe--kè ê saⁿ, bô-lūn sī chit--ê á-sī chhiah--ê, á-sī phê chòe ê mi̍h-kiāⁿ, nā ko͘ í-keng bô--khì, tio̍h koh-chài sóe, chiū chheng-khì.

59Í-siōng sī iú-koan ēng iûⁿ-mn̂g chhiah á-sī môa-se chit ê saⁿ, á-sī ēng phê chòe ê mi̍h-kiāⁿ siⁿ-ko͘ ê tiâu-lē, ēng lâi phòaⁿ-toàn chheng-khì á-sī bô chheng-khì.