Leviticus 26

Chinese TTVR (現代台語譯本羅馬字版)

← Chapter 25 Jump to: Chapter 27 →

1M̄-thang ūi ka-kī chō jīm-hô sîn-siōng, m̄-thang chhāi tiau-khek ê ngó͘-siōng á-sī thiāu-siōng, mā m̄-thang tī lín ê kéng-lāi an chio̍h-siōng kūi-pài. Góa sī Siōng Chú — lín ê Siōng-tè.

2Lín tio̍h siú góa ê An-hioh-ji̍t, kèng-tiōng góa ê sèng-só͘. Góa sī Siōng Chú.

3Lín nā chhiat-si̍t chun-hêng góa ê kui-lē kap kài-bēng,

4Góa ōe chiàu-sî kā lín lo̍h-hō͘, hō͘ thó͘-tōe seng-sán, hō͘ chhân-iá ê chhiū-ba̍k kiat ké-chí.

5Lín siu-sêng ngó͘-kok beh siu kàu bán phû-tô ê sî, bán phû-tô beh bán kàu iā-chéng ê sî; koh lín ōe ū bí-niû chia̍h kàu pá, tī lín ê thó͘-tōe an-ku-lo̍k-gia̍p.

6Góa beh hō͘ lín sù-kéng-pêng-an; lín tó-teh khùn, bô lâng kā lín heh-kiaⁿ. Góa beh chiong hiong-ok ê iá-siù tùi lín ê tōe kóaⁿ-cháu, koh hō͘ lín bōe tú-tio̍h chiàn-loān.

7Lín beh kā tùi-te̍k kóaⁿ-cháu; in beh sí tī lín ê to-ē.

8Lín gō͘ ê lâng beh kóaⁿ-cháu chi̍t-pah ê, chi̍t-pah ê lâng beh kóaⁿ-cháu chi̍t-bān ê; tùi-te̍k beh sí tī lín ê to-ē.

9Góa beh khòaⁿ-kò͘ lín, hō͘ lín siⁿ-thòaⁿ chin chōe, mā beh kian-li̍p kap lín li̍p ê iok.

10Lín kū ê bí-niû chia̍h iáu-bē liáu, chiū tio̍h kā i sóa-cháu lâi siu-khǹg sin ê niû-si̍t.

11Góa beh tī lín tiong-kan kiàn-li̍p góa ê hōe-bō͘, góa bōe iàm-ò͘ⁿ lín.

12Góa beh put-sî kap lín tông-chāi. Góa beh chòe lín ê Siōng-tè, lín beh chòe góa ê chú-bîn.

13Góa sī Siōng Chú — lín ê Siōng-tè, ū chhōa lín chhut Ai-ki̍p -tōe, hō͘ lín bô koh chòe Ai-ki̍p -lâng ê lô͘-lē. Góa bat kòng-tn̄g lín ê taⁿ, hō͘ lín gia̍h-thâu théng-sin hiòng-chêng kiâⁿ.

14Lín nā m̄ thiaⁿ-thàn góa ê ōe, bô chun-siú góa ê kài-bēng,

15khì-sak góa ê kui-lē, iàm-ò͘ⁿ góa ê bēng-lēng, bô beh si̍t-hêng góa lóng-chóng ê kài-bēng, ûi-pōe góa ê iok,

16góa chiū beh án-ni tùi-thāi lín: Góa it-tēng beh hō͘ lín kiaⁿ-hiâⁿ, tio̍h hì-lô, jia̍t-pīⁿ, tì-kàu sit-bêng, lâng soe-lám; lín iā-chéng bô-chhái-kang, tùi-te̍k ōe kā lín ê siu-sêng chia̍h-liáu-liáu.

17Góa beh tùi lín pìⁿ-bīn, hō͘ tùi-te̍k kā lín phah-pāi, hō͘ oàn-hūn lín--ê kā lín koán-hat; bô lâng kā lín jip, lín mā beh tô-cháu.

18Lín tú-tio̍h chiah-ê tāi-chì nā iáu-kú m̄ thiaⁿ-thàn góa ê ōe, góa chiū beh chiàu lín ê chōe chhit pē chek-hoa̍t lín.

19Góa beh chiong lín khoa-kháu ê sè-le̍k phah-chhùi, koh beh hō͘ lín ê thiⁿ chhin-chhiūⁿ thih bōe lo̍h-hō͘, tōe chhin-chhiūⁿ tâng bōe-tàng chèng-choh.

20Lín ê lô-khó͘ tio̍h-bôa lóng beh lo̍k-khong, in-ūi lín ê thó͘-tōe bōe seng-sán, chhiū-ba̍k bōe kiat ké-chí.

21Lín kiâⁿ-ta̍h nā kap góa choh-tùi, m̄ thiaⁿ-thàn góa, góa chiū beh chiàu lín ê chōe kàng chhit pē chai-hō hō͘ lín.

22Góa beh pàng iá-siù khì lín hia, kā-sí lín ê kiáⁿ-jî, thun-chia̍h lín ê cheng-siⁿ, hō͘ lín ê jîn-kháu kiám-chió, lō͘ hong-hòe.

23Án-ni lín nā iáu m̄ siū-kà lâi kui-ǹg góa, kiâⁿ-ta̍h kap góa choh-tùi,

24góa mā beh kap lín choh-tùi, beh chiàu lín ê chōe chhit pē táⁿ-kek lín.

25Góa beh hō͘ lín tú-tio̍h chiàn-loān, pò-èng lín pōe-iok ê chōe. Lín nā bih tī siâⁿ-lāi, góa beh kàng un-e̍k hō͘ lín, koh chiong lín kau hō͘ tùi-te̍k.

26Góa bô beh koh kiong-kip bí-niû hō͘ lín; hit-sî cha̍p ê hū-jîn-lâng beh kong-ke ēng chi̍t ê hang-lô͘ hang-piáⁿ, chiàu phòe-kip pun hō͘ lín; lín chia̍h, m̄-kú chia̍h bōe pá.

27Keng-kè chiah-ê tāi-chì, lín nā iáu m̄ thiaⁿ-thàn góa, kiâⁿ-ta̍h iáu-kú kap góa choh-tùi,

28góa chiū beh hoat tōa siū-khì, kap lín choh-tùi, beh koh chiàu lín ê chōe ke chhit pē táⁿ-kek lín.

29Lín ōe iau kah chia̍h lín ê kiáⁿ cha-bó͘-kiáⁿ ê bah.

30Góa beh húi-hoāi lín ê soaⁿ-thâu-tôaⁿ, phò-hoāi lín ê hiuⁿ-tôaⁿ, chiong lín ê sin-si hiat tī siū húi-hoāi ê ngó͘-siōng téng-bīn; góa mā beh iàm-ò͘ⁿ lín.

31Góa beh hō͘ lín ê siâⁿ pha-hng, hō͘ lín ê sèng-só͘ hong-hòe; góa bô beh phīⁿ lín ê chè-mi̍h ê phang-bī.

32Góa beh hō͘ lín ê tōe hong-hòe, kā lín chiàm-léng ê tùi-te̍k beh in-ūi án-ni tio̍h-kiaⁿ.

33Góa beh chiong lín kóaⁿ-sòaⁿ khì lia̍t-kok, mā beh pu̍ih to tui-kóaⁿ lín; hō͘ lín ê tōe hong-hòe, hō͘ lín ê siâⁿ pha-hng.

34Lín liû-bông khì lia̍t-kok ê sî, lín ê thó͘-tōe beh in-ūi pha-hng tit-tio̍h an-hioh.

35Án-ni, thó͘-tōe chiū oân-choân hioh-khùn, hióng-siū lín tòa tī hia ê sî bô hō͘ i ê an-hioh.

36Lín tiong-kan só͘ chhun ê lâng, góa beh hō͘ in tī tùi-te̍k ê thó͘-tōe sim-lāi kiaⁿ-hiâⁿ; liân chhiū-hio̍h hō͘ hong chhe tín-tāng ê siaⁿ, mā ōe hō͘ in kiaⁿ kah tô-cháu. Bô lâng kā in jip, in mā ōe chhin-chhiūⁿ teh tô-siám to-kiàm, cháu kah poa̍h-tó.

37Bô lâng kā in tui-kóaⁿ, in mā ōe sio-khoeh poa̍h-tó, chhin-chhiūⁿ lâng beh kā in thâi; lín ōe hō͘ tùi-te̍k oân-choân phah-pāi.

38Lín ōe tùi lia̍t-kok ê tiong-kan siau-sit, hō͘ tùi-te̍k ê tōe thun-bia̍t.

39Lín tòa tī tùi-te̍k ê tōe chhun--lo̍h-lâi ê lâng, ōe in-ūi ka-kī kap chó͘-sian ê chōe soe-bî.

40M̄-kú in nā jīn ka-kī kap chó͘-sian ê chōe, chiū-sī sêng-jīn in ū pōe-poān góa, kap góa choh-tùi,

41tì-kàu góa kap in choh-tùi, hō͘ in siū-lia̍h khì tùi-te̍k ê tōe; hit-sî in kiau-ngō͘ kò͘-chip ê sim nā khiam-pi--lo̍h-lâi, kam-goān siū hêng-hoa̍t,

42góa chiū ōe siūⁿ-tio̍h góa kap A-pek-la-hán, Í-sat, Ngá-kok só͘ li̍p ê iok, mā ōe put-sî siūⁿ-tio̍h hit-tè thó͘-tōe.

43In pàng-sak hit-tè thó͘-tōe, hit-tè tōe tian-tò tī pha-hng ê tiong-kan hióng-siū an-hioh. In kam-goān ūi-tio̍h ka-kī ê chōe siū hêng-hoa̍t, in-ūi in khì-sak góa ê bēng-lēng, iàm-ò͘ⁿ góa ê kui-lē.

44M̄-kú, in hō͘ tùi-te̍k lia̍h--khì ê sî, góa iáu-kú bô pàng-sak in, iàm-ò͘ⁿ in, kā in oân-choân siau-bia̍t, tì-kàu ûi-pōe góa ka-kī kap in li̍p ê iok; in-ūi góa sī Siōng Chú — in ê Siōng-tè.

45Góa beh éng-oán ōe-kì-tit góa kap in ê chó͘-sian só͘ li̍p ê iok. Ūi-tio̍h beh chòe in ê Siōng-tè, góa hō͘ gōa-cho̍k-lâng chhin-ba̍k khòaⁿ-tio̍h góa chiong in tùi Ai-ki̍p -tōe chhōa--chhut-lâi. Góa sī Siōng Chú.

46Í-siōng chiah-ê sī Siōng Chú tī Se-nāi-soaⁿ, thong-kè Mô͘-se tùi Í-sek-lia̍t -lâng pan-pò͘ ê kui-lē, bēng-lēng, kap kà-sī.

← Chapter 25 Jump to: Chapter 27 →