Leviticus 22

Chinese TTVR (現代台語譯本羅馬字版)

← Chapter 21 Jump to: Chapter 23 →

1Siōng Chú hoan-hù Mô͘-se

2tùi A-lûn kap i ê kiáⁿ soan-pò͘: Tio̍h kín-sīn chhú-lí Í-sek-lia̍t -lâng hun-pia̍t-choh-sèng kui hō͘ góa ê chè-mi̍h, chiah bián siat-to̍k góa ê sèng-miâ; góa sī Siōng Chú.

3Lín ta̍k sè-tāi ê kiáⁿ-sun, nā ū lâng seng-khu bô chheng-khì, bong-tio̍h Í-sek-lia̍t -lâng hun-pia̍t-choh-sèng kui hō͘ Siōng Chú ê chè-mi̍h, hit-ê lâng chiū éng-oán bōe-ēng-tit tī góa ê bīn-chêng sū-hōng góa. Góa sī Siōng Chú.

4A-lûn ê hō͘-tāi, nā ū lâng tì-tio̍h bâ-hong á-sī hā-siau, tī i kiat-chēng í-chêng m̄-thang chia̍h sèng ê chè-mi̍h. Nā ū lâng bong-tio̍h hō͘ si-thé bak--tio̍h chiâⁿ-chòe bô chheng-khì ê mi̍h, á-sī bong-tio̍h sia̍p-cheng ê lâng,

5á-sī bong-tio̍h teh pê bô chheng-khì ê oa̍h-mi̍h, á-sī bong-tio̍h jīm-hô ōe hō͘ i bô chheng-khì ê lâng;

6só͘-ū bong-tio̍h chiah-ê ê lâng, ji̍t lo̍h í-chêng lóng sī bô chheng-khì; in nā bô sóe seng-khu, chiū m̄-thang chia̍h sèng ê chè-mi̍h.

7Kàu ji̍t lo̍h, in chiah chheng-khì, jiân-āu thang chia̍h chè-mi̍h; in-ūi che sī in ê chia̍h-mi̍h.

8Chū-jiân sí--ê, á-sī hō͘ iá-siù thiah-li̍h--ê, lóng m̄-thang chia̍h, in-ūi che ōe hō͘ lâng bô chheng-khì. Góa sī Siōng Chú.

9Chè-si lóng tio̍h chun-siú góa ê bēng-lēng, chiah bián in siat-to̍k chè-mi̍h, hoān-chōe lâi sí. Góa sī kā in hun-pia̍t-choh-sèng ê Siōng Chú.

10It-poaⁿ-lâng bōe-ēng-tit chia̍h sèng ê chè-mi̍h, liân chè-si ê lâng-kheh á-sī chhiàⁿ-kang mā bōe-ēng-tit chia̍h.

11M̄-kú, chè-si bóe--lâi ê lô͘-lē, kap tī in tau chhut-sì ê lâng thang chia̍h chè-si ê chia̍h-mi̍h.

12Chè-si ê cha-bó͘-kiáⁿ nā kè hō͘ chè-si ka-cho̍k í-gōa ê Í-sek-lia̍t -lâng, m̄-thang chia̍h gia̍h-koân hiàn hō͘ Siōng Chú sèng ê chè-mi̍h.

13M̄-kú chè-si ê cha-bó͘-kiáⁿ nā chiú-kóaⁿ, á-sī lî-hun, bô kiáⁿ-jî, koh tò-lâi āu-thâu-chhù, chiū kap i siàu-liân ê sî kâng-khoán, thang chia̍h in lāu-pē ê chia̍h-mi̍h. Chóng-sī, it-poaⁿ ê lâng m̄-thang chia̍h sèng ê chè-mi̍h.

14Nā ū lâng bô chù-ì chia̍h-tio̍h sèng ê chè-mi̍h, tio̍h chiàu hiah-ê chè-mi̍h ke gō͘-hūn-chi̍t kau hō͘ chè-si.

15M̄-thang sûi-piān hō͘ lâng chia̍h Í-sek-lia̍t -lâng hiàn hō͘ Siōng Chú sèng ê chè-mi̍h, chiah bián in in-ūi siat-to̍k sèng ê chè-mi̍h tì-kàu hoān-chōe; góa sī kā in hun-pia̍t-choh-sèng ê Siōng Chú.

17Siōng Chú hoan-hù Mô͘-se

18tùi A-lûn kap i ê kiáⁿ, í-ki̍p Í-sek-lia̍t chèng-lâng soan-pò͘: Í-sek-lia̍t -lâng, á-sī kià-ku tī Í-sek-lia̍t -lâng tiong-kan ê gōa-cho̍k-lâng, nā hiàn sio-hòa-chè hō͘ Siōng Chú, bô-lūn chhut tī hē-goān á-sī kam-sim hiàn-chè,

19tio̍h hiàn bô hâ-chhû ê gû-káng, mî-iûⁿ-káng, á-sī soaⁿ-iûⁿ-káng, chiah ōe hō͘ Siōng Chú hoaⁿ-hí chiap-la̍p.

20M̄-thang hiàn ū hâ-chhû--ê, in-ūi che bōe tit-tio̍h chiap-la̍p.

21Nā ū lâng beh kam-sim hiàn-chè, á-sī ūi-tio̍h te̍k-pia̍t ê sū siā-goān, hiàn pêng-an-chè hō͘ Siōng Chú, tio̍h soán kiān-khong, bô hâ-chhû ê gû á-sī iûⁿ chòe chè-mi̍h, chiah ōe tit-tio̍h chiap-la̍p.

22Só͘-ū chhiⁿ-mî, tio̍h-siong, chân-hòe, phê-hu teh nōa, siⁿ-sián, siⁿ-chhng ê tōng-bu̍t, lóng m̄-thang tī chè-tôaⁿ téng ēng hé sio hiàn hō͘ Siōng Chú.

23Gû-káng á-sī iûⁿ-á-kiáⁿ nā chi-thé ū ke ū kiám, thang chòe kam-sim hiàn ê chè; m̄-kú nā chòe siā-goān ê chè chiū bōe tit-tio̍h chiap-la̍p.

24Tōng-bu̍t ê lān-hu̍t nā siū-siong, teh-chhùi, phòa-li̍h, á-sī iam--khí-lâi, lóng m̄-thang hiàn hō͘ Siōng Chú. Tī lín ê thó͘-tōe, í-siōng chiah-ê sū lín lóng m̄-thang chòe.

25Lín mā m̄-thang tùi gōa-cho̍k-lâng chiap-siū chit-khoán cheng-siⁿ chòe hiàn hō͘ lín ê Siōng-tè ê chia̍h-mi̍h, in-ūi in ū khoat-hām, ū hâ-chhû, só͘-í bōe tit-tio̍h Siōng Chú chiap-la̍p.

26Siōng Chú koh tùi Mô͘-se kóng,

27“Gû, mî-iûⁿ, á-sī soaⁿ-iûⁿ chhut-sì liáu thang tè i ê bú chhit ji̍t; tē-poeh ji̍t í-āu, chiū thang ēng hé sio chòe chè-mi̍h hiàn hō͘ Siōng Chú, án-ni chiah ōe tit-tio̍h chiap-la̍p.

28Bô-lūn gû á-sī iûⁿ, m̄-thang kâng hit-ji̍t thâi bú kap kiáⁿ.

29Hiàn siā-un-chè hō͘ Siōng Chú, tio̍h chiàu kui-lē hiàn chè-mi̍h thang hō͘ I chiap-la̍p.

30Chè-mi̍h tio̍h tī hiàn hit-ji̍t chia̍h, liân chi̍t-sut-á to m̄-thang lâu kàu keh-chá-khí. Góa sī Siōng Chú.

31“Lín tio̍h chhiat-si̍t chun-hêng góa ê kài-bēng. Góa sī Siōng Chú.

32M̄-thang siat-to̍k góa ê sèng-miâ; góa beh tī Í-sek-lia̍t -lâng ê tiong-kan siū chun chòe sèng. Góa sī kā lín hun-pia̍t-choh-sèng ê Siōng Chú,

33bat chhōa lín chhut Ai-ki̍p, chiâⁿ-chòe lín ê Siōng-tè. Góa sī Siōng Chú.”

← Chapter 21 Jump to: Chapter 23 →