Leviticus 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Siōng Chú hoan-hù Mô͘-se, kóng,

2“Lí tio̍h chhōa A-lûn kap i ê kiáⁿ lâi góa chia, mā tòa lé-ho̍k, thang boah ê sèng-iû, sio̍k-chōe-chè ê gû-káng chi̍t chiah, kap mî-iûⁿ-káng nn̄g chiah, bô-kàⁿ-piáⁿ chi̍t nâ lâi.

3Koh tiàu-chi̍p choân-thé hōe-chiòng lâi hōe-bō͘ mn̂g-kháu.”

4Mô͘-se chiàu Siōng Chú ê bēng-lēng chòe, hōe-chiòng chiū chū-chi̍p tī hōe-bō͘ mn̂g-kháu.

5Mô͘-se kā hōe-chiòng kóng, “Ē-bīn sī Siōng Chú bēng-lēng lán tio̍h chòe ê sū.”

6Mô͘-se chhōa A-lûn kap i ê kiáⁿ lâi, ēng chúi kā in sóe.

7Mô͘-se kā A-lûn chhēng lāi-phàu, hâ io-tòa, chhēng gōa-phàu, tha̍h í-hut-tek, chiong ēng kî-khá ê chhiú-lō͘ chit ê í-hut-tek ê tòa kā i hâ, kā í-hut-tek pa̍k tī i ê seng-khu;

8koh kā i tha̍h heng-tē, chiong O͘-lêng kap Thó͘-bêng hē tī heng-tē lāi-bīn,

9kā i tì lé-bō, tī lé-bō ê téng-bīn an kim-pâi, hō͘ lé-bō chiâⁿ-chòe sèng-bō. Mô͘-se lóng chiàu Siōng Chú ê bēng-lēng án-ni chòe.

10Mô͘-se ēng thang boah ê sèng-iû boah hōe-bō͘ kap lāi-bīn só͘-ū ê khì-khū, kā in hun-pia̍t-choh-sèng;

11koh ēng hit-ê iû hiù chè-tôaⁿ ê téng-bīn chhit piàn, boah chè-tôaⁿ kap i só͘-ū ê khì-khū, sóe-tn̄g ê phûn kap phûn-chō, kā in hun-pia̍t-choh-sèng;

12koh ēng sèng-iû tò tī A-lûn ê thâu-khak téng, kā i àn-li̍p, hun-pia̍t-choh-sèng.

13Mô͘-se chhōa A-lûn ê kiáⁿ lâi, kā in chhēng lāi-phàu, hâ io-tòa, pau thâu-kun. Mô͘-se lóng chiàu Siōng Chú ê bēng-lēng án-ni chòe.

14Mô͘-se khan sio̍k-chōe-chè ê gû-káng-á lâi; A-lûn kap i ê kiáⁿ hōaⁿ-chhiú tī hit-chiah gû-káng-á ê thâu-khak.

15Mô͘-se chiū thâi hit-chiah gû, jiân-āu ēng chńg-thâu-á ùn huih, boah tī chè-tôaⁿ téng-bīn sì ki khiàu--khí-lâi ê kak, hō͘ tôaⁿ chheng-khì; chiong chhun ê huih tò tī chè-tôaⁿ kha, hun-pia̍t-choh-sèng, kā i kiat-chēng.

16Mô͘-se koh chiong gû-káng-á pak-lāi só͘-ū ê iû, koaⁿ ê bāng-se, nn̄g lia̍p io-chí, í-ki̍p io-chí téng-bīn ê iû, lóng hē tī tôaⁿ-téng sio.

17Gû-káng-á ê phê, bah, kap pùn, i lóng tòa chhut-khì iâⁿ-gōa sio. Mô͘-se lóng chiàu Siōng Chú ê bēng-lēng án-ni chòe.

18Mô͘-se khan sio-hòa-chè ê mî-iûⁿ-káng lâi; A-lûn kap i ê kiáⁿ hōaⁿ-chhiú tī hit-chiah mî-iûⁿ-káng ê thâu-khak.

19Mô͘-se chiū thâi hit-chiah iûⁿ-káng, chiong iûⁿ ê huih hiù tī chè-tôaⁿ sì-chiu-ûi,

20kā iûⁿ chhiat chi̍t-tè chi̍t-tè; chiong thâu, kap kui-tè kui-tè ê bah, í-ki̍p iû lóng the̍h-khì sio.

21I koh kā pak-lāi kap thúi ēng chúi sóe chheng-khì, chiong kui-chiah iûⁿ hē tī chè-tôaⁿ téng sio; che sī sio-hòa-chè, sī ēng hé sio hiàn hō͘ Siōng Chú phang-phang ê chè-mi̍h. Mô͘-se lóng chiàu Siōng Chú ê bēng-lēng chòe.

22Mô͘-se koh khan tē-jī chiah mî-iûⁿ-káng lâi, chòe chè-si siū-chit-lé ê lō͘-ēng; A-lûn kap i ê kiáⁿ hōaⁿ-chhiú tī iûⁿ ê thâu-khak.

23Mô͘-se chiū thâi hit-chiah iûⁿ-káng, the̍h chi̍t-kóa huih boah tī A-lûn chiàⁿ-pêng ê hī-chu, koh boah tī i chiàⁿ-chhiú kap chiàⁿ-kha ê tōa-thâu-bú.

24I koh chhōa A-lûn ê kiáⁿ lâi, ēng chi̍t-kóa huih boah tī in chiàⁿ-pêng ê hī-chu, chiàⁿ-chhiú kap chiàⁿ-kha ê tōa-thâu-bú; jiân-āu chiong chhun ê huih hiù tī chè-tôaⁿ ê sì-chiu-ûi.

25I koh chhú iû, pûi ê bé, pak-lāi ê iû, koaⁿ ê bāng-se, nn̄g lia̍p io-chí kap io-chí ê iû, í-ki̍p chiàⁿ-thúi.

26Koh tùi hit-kha hē tī Siōng Chú bīn-chêng tóe bô-kàⁿ-piáⁿ ê nâ-á, the̍h chi̍t tè bô-kàⁿ-piáⁿ, chi̍t tè kiáu-iû ê piáⁿ, kap chi̍t tè po̍h-piáⁿ, hē tī iû kap chiàⁿ-pêng tōa-thúi ê téng-bīn.

27Mô͘-se chiong chiah-ê hē tī A-lûn kap i hiah-ê kiáⁿ ê chhiú, hō͘ in tī Siōng Chú ê bīn-chêng iô-iô--leh chòe chè-mi̍h.

28Mô͘-se tùi in ê chhiú chiap--kè-lâi, hē tī tôaⁿ-téng sio-hòa-chè ê téng-bīn sio. Che sī tī siū-chit-lé, ēng hé sio hiàn hō͘ Siōng Chú phang-phang ê chè-mi̍h.

29Mô͘-se the̍h iûⁿ ê heng-khám-bah, tī Siōng Chú ê bīn-chêng iô-iô--leh chòe chè-mi̍h; che sī siū-chit-lé ê iûⁿ ê tiong-kan, Mô͘-se èng-tit ê hūn-gia̍h. Mô͘-se lóng chiàu Siōng Chú ê bēng-lēng chòe.

30Mô͘-se the̍h thang boah ê sèng-iû kap chi̍t-kóa tôaⁿ-téng ê huih, hiù tī A-lûn kap i ê kiáⁿ, í-ki̍p in ê saⁿ, kā in kap in ê saⁿ hun-pia̍t-choh-sèng.

31Mô͘-se tùi A-lûn kap i ê kiáⁿ kóng, “Lín tio̍h chiàu Siōng Chú ê bēng-lēng, tī hōe-bō͘ ê ji̍p-kháu chú chiah-ê bah, kap chè-si siū-chit-lé nâ-á lāi ê piáⁿ tī hia chòe-hé chia̍h.

32Chia̍h chhun ê bah kap piáⁿ, lín tio̍h sio-tiāu.

33Lín chhit ji̍t kú lóng m̄-thang lī-khui hōe-bō͘, ti̍t-kàu lín siū-chit-lé ê ji̍t-kî móa, in-ūi siū-chit-lé su-iàu chhit ji̍t.

34Lín kin-á-ji̍t só͘ chòe--ê, sī chiàu Siōng Chú ê bēng-lēng, ūi-tio̍h beh kā lín sio̍k-chōe.

35Chhit ji̍t kú lín tio̍h lâu tī hōe-bō͘ ji̍p-kháu, mî-ji̍t lóng tī hia; chun-siú Siōng Chú ê bēng-lēng, lín chiah bián sí. Siōng Chú án-ni bēng-lēng góa.”

36A-lûn kap i ê kiáⁿ chiū chun-hêng Siōng Chú thong-kè Mô͘-se hō͘ in ê bēng-lēng.

← Chapter 7 Jump to: Chapter 9 →