Leviticus 27

Chinese TTVR (現代台語譯本羅馬字版)

← Chapter 26 Jump to:

1Siōng Chú bēng-lēng Mô͘-se

2tio̍h tùi Í-sek-lia̍t -lâng soan-pò͘: Nā ū lâng hē te̍k-pia̍t ê goān beh hiàn-sin hō͘ Siōng Chú, i tio̍h chiàu lí só͘ kó͘-kè hit-ê lâng ê kè-chîⁿ hōng-hiàn.

3Chiàu sèng-só͘ ê kui-tēng: jī-cha̍p-hè kàu la̍k-cha̍p-hè, ta-po͘-lâng gō͘-pah gō͘-cha̍p kong-khek ê gûn, cha-bó͘-lâng saⁿ-pah sì-cha̍p-jī kong-khek ê gûn; gō͘-hè kàu jī-cha̍p-hè, ta-po͘ gín-á nn̄g-pah jī-cha̍p-poeh kong-khek ê gûn, cha-bó͘ gín-á chi̍t-pah cha̍p-sì kong-khek ê gûn; móa-ge̍h kàu gō͘-hè, ta-po͘ gín-á gō͘-cha̍p-chhit kong-khek ê gûn, cha-bó͘ gín-á saⁿ-cha̍p-sì kong-khek ê gûn; la̍k-cha̍p-hè í-siōng, ta-po͘-lâng chi̍t-pah chhit-cha̍p-it kong-khek ê gûn, cha-bó͘-lâng chi̍t-pah cha̍p-sì kong-khek ê gûn.

8Hē-goān ê lâng nā sàn-chhiah, bōe-tàng chiàu kui-tēng ê kè-chîⁿ hōng-hiàn, chiū tio̍h khì chè-si hia, hō͘ chè-si chiàu hit-ê lâng ê châi-le̍k kā i kó͘-kè.

9Nā ū lâng hiàn cheng-siⁿ chòe lé-mi̍h hō͘ Siōng Chú, tio̍h kā hit-chiah cheng-siⁿ hun-pia̍t-choh-sèng,

10m̄-thang ēng pa̍t-chiah thòe-ōaⁿ, bô-lūn sī ēng hó--ê ōaⁿ bái--ê, á-sī ēng bái--ê ōaⁿ hó--ê; nā ēng cheng-siⁿ thòe-ōaⁿ cheng-siⁿ, nn̄g chiah lóng tio̍h hun-pia̍t-choh-sèng.

11Lâng hiàn hō͘ Siōng Chú chòe lé-mi̍h ê cheng-siⁿ nā bô chheng-khì, chiū tio̍h tòa hit-chiah cheng-siⁿ khì chè-si hia,

12chè-si tio̍h chiàu cheng-siⁿ ê hó bái kó͘-kè; chè-si kó͘-kè jōa-chōe chiū-sī jōa-chōe.

13Hit-ê lâng nā it-tēng beh sio̍k-hôe, chiū tio̍h tī kó͘-kè ê kè-chîⁿ í-gōa ke-thiⁿ gō͘-hūn-chi̍t.

14Nā ū lâng kā chhù hōng-hiàn hō͘ Siōng Chú, chè-si tio̍h chiàu chhù ê hó bái kó͘-kè; chè-si kó͘-kè jōa-chōe chiū-sī jōa-chōe.

15Kā hit-keng chhù hōng-hiàn hō͘ Siōng Chú ê lâng nā beh sio̍k-hôe, chiū tio̍h tī kó͘-kè ê kè-chîⁿ í-gōa ke-thiⁿ gō͘-hūn-chi̍t, chhù chiah thang hêng i.

16Nā ū lâng chiong kè-sêng ê thó͘-tōe ê chi̍t-pō͘-hūn hōng-hiàn hō͘ Siōng Chú, tio̍h chiàu hit-tè tōe ōe-tàng iā jōa-chōe chéng-chí lâi kó͘-kè; nā ōe-tàng iā tōa-be̍h jī-cha̍p kong-kun, kè-chîⁿ chiū-sī gō͘-pah chhit-cha̍p kong-khek ê gûn.

17I nā tī Un-hūi ê Nî chiong tōe hōng-hiàn hō͘ Siōng Chú, hit-tè tōe ê kè-ta̍t chiū-sī chiàu lí kó͘-kè ê kè-chîⁿ.

18I nā tī Un-hūi ê Nî í-āu hōng-hiàn, chè-si tio̍h chiàu hit-nî kàu āu-piàn Un-hūi ê Nî só͘ chhun ê nî-sò͘, tùi goân-lâi só͘ kó͘-kè--ê khàu--khí-lâi.

19Hōng-hiàn ê lâng nā it-tēng beh sio̍k-hôe, chiū tio̍h tī kó͘-kè ê kè-chîⁿ í-gōa ke-thiⁿ gō͘-hūn-chi̍t, tōe chiah thang hêng i.

20I nā bô beh sio̍k-hôe hit-tè tōe, á-sī bōe hō͘ pa̍t-lâng, chiū bōe-tàng koh sio̍k-hôe.

21Kàu Un-hūi ê Nî, hit-tè tōe tio̍h éng-oán kui Siōng Chú, chòe chè-si ê sán-gia̍p.

22Nā-sī i hōng-hiàn hō͘ Siōng Chú ê tōe sī bóe--lâi-ê, m̄-sī kè-sêng--ê,

23chè-si tio̍h chiàu hit-nî kàu Un-hūi ê Nî ê nî-sò͘, kó͘-kè hit-tè tōe ê kè-chîⁿ; hit-ji̍t i tio̍h chiàu kó͘-kè ê kè-chîⁿ hiàn hō͘ Siōng Chú.

24Kàu Un-hūi ê Nî, hit-tè tōe tio̍h kui hō͘ goân-chú, chiū-sī kè-sêng hit-tè tōe ê lâng.

25Chè-si tio̍h chiàu sèng-só͘ ê kong-chhìn kó͘-kè.

26Thâu-chi̍t-the ê cheng-siⁿ, bô-lūn sī gû á-sī iûⁿ, í-keng kui hō͘ Siōng Chú, bōe-ēng-tit koh hiàn hō͘ Siōng Chú.

27Nā-sī thâu-chi̍t-the ê cheng-siⁿ bô chheng-khì, chiū tio̍h chiàu kó͘-kè ê kè-chîⁿ ke gō͘-hūn-chi̍t sio̍k-hôe; nā bô beh sio̍k-hôe, chiū tio̍h chiàu kó͘-kè ê kè-chîⁿ kā bōe-tiāu.

28Nā ū lâng chiong i só͘ ū--ê éng-oán hiàn hō͘ Siōng Chú, bô-lūn sī lâng, sī cheng-siⁿ, á-sī kè-sêng ê thó͘-tōe, lóng bōe-ēng-tit bōe, mā bōe-ēng-tit sio̍k-hôe; i hiàn--ê sī chì-sèng, éng-oán kui Siōng Chú.

29Hiàn hō͘ Siōng Chú tio̍h oân-choân húi-bia̍t ê lâng, bōe-ēng-tit sio̍k-hôe; i it-tēng tio̍h siū chhú-sí.

30Thó͘-tōe chhut-sán ê mi̍h, bô-lūn sī ngó͘-kok, á-sī chhiū-téng ê ké-chí, cha̍p-hūn-chi̍t lóng sī Siōng Chú ê, sī sèng--ê.

31Nā ū lâng beh sio̍k-hôe chit cha̍p-hūn-chi̍t ê mi̍h, tio̍h ke gō͘-hūn-chi̍t.

32Gû-kûn kap iûⁿ-kûn keng-kè bo̍k-chiá koáiⁿ-á ē, ta̍k-piàn sǹg kàu tē-cha̍p chiah, hit-chiah tio̍h hōng-hiàn hō͘ Siōng Chú.

33Bô-lūn hó bái, lóng m̄-thang thòe-ōaⁿ; nā thòe-ōaⁿ, nn̄g chiah lóng tio̍h hun-pia̍t-choh-sèng, bōe-ēng-tit sio̍k-hôe.

34Í-siōng chiah-ê sī Siōng Chú tī Se-nāi-soaⁿ thong-kè Mô͘-se tùi Í-sek-lia̍t -lâng pan-pò͘ ê bēng-lēng.

← Chapter 26 Jump to: