Leviticus 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1A-lûn nn̄g ê kiáⁿ in-ūi bô chiàu kui-lē óa-kūn Siōng Chú, sí--khì; āu-lâi, Siōng Chú bēng-lēng Mô͘-se,

2kóng: Tio̍h kā lí ê hiaⁿ-ko A-lûn kóng, m̄-thang tī kui-tēng ê sî-kan í-gōa ji̍p-khì sèng-só͘ ê tiùⁿ-lî lāi, kàu iok-kūi téng-bīn si-un-chō ê thâu-chêng, chiah bián sí; in-ūi góa beh tī si-un-chō téng-bīn ê hûn-tiong hián-hiān.

3A-lûn beh ji̍p sèng-só͘ tio̍h chiàu án-ni chòe: Tòa chi̍t chiah gû-káng-á chòe sio̍k-chōe-chè, chi̍t chiah mî-iûⁿ-káng chòe sio-hòa-chè.

4I tio̍h sóe seng-khu, jiân-āu chhēng chè-si sèng ê lé-ho̍k, chiū-sī iù-môa-pò͘ ê lāi-phàu kap khò͘, hâ iù-môa-pò͘ ê tòa, tì iù-môa-pò͘ ê lé-bō.

5A-lûn tio̍h tùi Í-sek-lia̍t hōe-chiòng ê tiong-kan chhú nn̄g chiah soaⁿ-iûⁿ-káng chòe sio̍k-chōe-chè, chi̍t chiah mî-iûⁿ-káng chòe sio-hòa-chè.

6I tio̍h ūi ka-kī kap i ê ka-cho̍k hiàn chi̍t chiah gû-káng chòe sio̍k-chōe-chè,

7koh chiong hit nn̄g chiah soaⁿ-iûⁿ-káng khan-lâi hōe-bō͘ mn̂g-kháu, Siōng Chú ê bīn-chêng.

8A-lûn tio̍h ūi-tio̍h hit nn̄g chiah soaⁿ-iûⁿ-káng thiu-chhiam; chi̍t ki chhiam siá “Kui hō͘ Siōng Chú”, lēng-gōa chi̍t ki siá “Kui hō͘ A-sat-sià-le̍k ”.

9A-lûn tio̍h chiong hit-chiah thiu--tio̍h kui hō͘ Siōng Chú ê soaⁿ-iûⁿ-káng, hiàn chòe sio̍k-chōe-chè.

10Hit-chiah thiu--tio̍h kui hō͘ A-sat-sià-le̍k ê soaⁿ-iûⁿ-káng, tio̍h oa̍h-oa̍h khan-lâi Siōng Chú ê bīn-chêng, ēng lâi sio̍k-chōe, kā i pàng-khì khòng-iá kui hō͘ A-sat-sià-le̍k.

11A-lûn tio̍h chiong hit-chiah beh ūi ka-kī kap i ê ka-cho̍k hiàn chòe sio̍k-chōe-chè ê gû-káng-á khan-lâi thâi;

12koh tio̍h tùi Siōng Chú bīn-chêng ê chè-tôaⁿ the̍h tóe-móa teh to̍h ê hé-thòaⁿ ê hiuⁿ-lô͘, tòa chi̍t phóng géng kah iù-iù ê hiuⁿ-liāu, ji̍p-khì sèng-só͘ ê tiùⁿ-lî lāi;

13jiân-āu tī Siōng Chú ê bīn-chêng sio hiuⁿ-liāu, hō͘ hiuⁿ-ian jia iok-kūi téng ê si-un-chō, chiah bián i khòaⁿ--tio̍h lâi sí.

14I tio̍h the̍h chi̍t-kóa gû-káng-á ê huih, ēng chńg-thâu-á ùn huih hiù si-un-chō ê tang-pêng, koh tùi si-un-chō ê chiàⁿ-bīn hiù chhit piàn.

15A-lûn tio̍h koh thâi hit-chiah ūi-tio̍h jîn-bîn chòe sio̍k-chōe-chè ê soaⁿ-iûⁿ-káng, tòa i ê huih ji̍p-khì tiùⁿ-lî lāi, chiong huih hiù tī si-un-chō ê téng-bīn kap thâu-chêng, kap hiù gû-káng ê huih kâng-khoán.

16Koh tio̍h in-ūi Í-sek-lia̍t -lâng ê bô chheng-khì kap pōe-poān, chiū-sī in só͘-ū ê chōe, kā sèng-só͘ kiat-chēng; mā tio̍h chiàu án-ni kā hōe-bō͘ kiat-chēng, in-ūi hōe-bō͘ ū hō͘ in ê bô chheng-khì bak--tio̍h.

17A-lûn ji̍p-khì sèng-só͘ sio̍k-chōe iáu-bē chhut--lâi í-chêng, hōe-bō͘ lāi m̄-thang ū lâng; i tio̍h tī sèng-só͘ lāi-bīn ūi-tio̍h ka-kī, i ê ka-cho̍k, kap Í-sek-lia̍t choân hōe-chiòng sio̍k-chōe.

18Jiân-āu, i chhut-lâi Siōng Chú bīn-chêng ê chè-tôaⁿ hia, kā chè-tôaⁿ kiat-chēng. I tio̍h the̍h chi̍t-kóa gû-káng-á kap soaⁿ-iûⁿ-káng ê huih, boah tī chè-tôaⁿ téng hit sì ki khiàu--khí-lâi ê kak;

19koh tio̍h ēng chńg-thâu-á ùn huih tùi chè-tôaⁿ hiù chhit piàn, kā i kiat-chēng, thoat-lī Í-sek-lia̍t -lâng ê bô chheng-khì, koh kā i hun-pia̍t-choh-sèng.

20A-lûn ūi-tio̍h sèng-só͘, hōe-bō͘, chè-tôaⁿ kiâⁿ kiat-chēng-lé liáu-āu, tio̍h khan hit-chiah oa̍h ê soaⁿ-iûⁿ-káng lâi.

21A-lûn tio̍h siang-chhiú hōaⁿ tī iûⁿ ê thâu-khak téng, sêng-jīn Í-sek-lia̍t -lâng só͘-ū ê chōe-gia̍t kap pōe-poān, hō͘ in só͘ hoān ê chōe lóng kui tī hit-chiah iûⁿ ê thâu-khak, jiân-āu phài lâng kā i sàng-khì khòng-iá.

22Hit-chiah soaⁿ-iûⁿ-káng beh tòa Í-sek-lia̍t -lâng só͘-ū ê chōe khì kàu bô lâng tòa ê só͘-chāi; hit-chiah iûⁿ chiū pàng tī khòng-iá.

23Āu-lâi, A-lûn tio̍h ji̍p hōe-bō͘, chiong i ji̍p sèng-só͘ ê sî só͘ chhēng iù-môa-pò͘ ê lé-ho̍k thǹg--khí-lâi, lâu tī hia;

24koh tio̍h tī hōe-bō͘ ê tiâⁿ sóe seng-khu, chhēng i ka-kī ê saⁿ chhut--lâi, hiàn i kap jîn-bîn ê sio-hòa-chè, ūi-tio̍h ka-kī kap jîn-bîn sio̍k-chōe.

25Sio̍k-chōe-chè ê iû tio̍h tī chè-tôaⁿ téng sio.

26Hit-ê pàng soaⁿ-iûⁿ-káng kui hō͘ A-sat-sià-le̍k ê lâng, tio̍h sóe i ê saⁿ, sóe seng-khu, chiah thang ji̍p iâⁿ-lāi.

27Chòe sio̍k-chōe-chè ê gû-káng kap soaⁿ-iûⁿ-káng, in ê huih tòa-ji̍p Chì-sèng-só͘ sio̍k-chōe liáu-āu, tio̍h kā in poaⁿ chhut-khì iâⁿ-gōa, chiong phê, bah, kap pùn ēng hé sio-tiāu.

28Sio chiah-ê mi̍h ê lâng tio̍h sóe i ê saⁿ, sóe seng-khu, chiah thang ji̍p iâⁿ-lāi.

29Múi-nî ê chhit-ge̍h chhoe-cha̍p, lín tio̍h kìm-chia̍h khek-khó͘, bô-lūn sī chāi-tōe-lâng, á-sī kià-ku tī lín tiong-kan ê gōa-cho̍k-lâng, jīm-hô ê kang-chok lóng m̄-thang chòe; che beh chòe lín éng-oán ê kui-lē.

30Tī chit-ji̍t beh kā lín sio̍k-chōe; lín beh tī Siōng Chú ê bīn-chêng tit-tio̍h chheng-khì, só͘-ū ê chōe lóng tit-tio̍h kiat-chēng.

31Chit-ji̍t lín tio̍h kā i khòaⁿ-chòe oân-choân hioh-khùn ê An-hioh-ji̍t, tio̍h kìm-chia̍h khek-khó͘; che beh chòe lín éng-oán ê kui-lē.

32Hit-ê siū boah-iû siat-li̍p, sòa-chiap i ê lāu-pē chòe tōa-chè-si--ê, tio̍h chhēng iù-môa-pò͘ sèng ê lé-ho̍k, chip-hêng sio̍k-chōe-lé.

33I tio̍h ūi-tio̍h Chì-sèng-só͘, hōe-bō͘ kap chè-tôaⁿ kiâⁿ kiat-chēng-lé, koh ūi-tio̍h chè-si kap choân-thé hōe-chiòng sio̍k-chōe.

34Che tio̍h chòe lín éng-oán ê kui-lē, in-ūi Í-sek-lia̍t -lâng só͘-ū ê chōe, chi̍t nî chi̍t piàn beh tit-tio̍h kiat-chēng. A-lûn chiū chiàu Siōng Chú bēng-lēng Mô͘-se --ê khì chòe.

← Chapter 15 Jump to: Chapter 17 →