Leviticus 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Siōng Chú koh bēng-lēng Mô͘-se pan-pò͘ í-hā chiah-ê tiâu-lē:

2Nā ū lâng hoān-chōe tek-chōe Siōng Chú, bô-lūn tī tông-pau kià mi̍h-kiāⁿ á-sī tí-ah mi̍h-kiāⁿ ê sū bô siú sìn-iōng, á-sī chhiúⁿ lâng ê châi-bu̍t, á-sī khi-ap tông-pau,

3á-sī khioh-tio̍h mi̍h-kiāⁿ, phiàn--lâng koh chiù-chōa kóng sī i ê; lâng nā ū chòe jīm-hô chi̍t hāng chiah-ê sū, i chiū ū chōe.

4I kì-jiân hoān-tio̍h téng-bīn chiah-ê chōe, chiū tio̍h chiong só͘ chhiúⁿ--ê, khi-ap tit--tio̍h-ê, lâng kià i--ê, khioh--tio̍h-ê,

5pe̍h-chha̍t chiù-chōa tit--tio̍h-ê, choân-pō͘ hêng lâng, lēng-gōa koh ke gō͘-hūn-chi̍t; tī hō͘ lâng chhâ-chhut i ū kè-sit ê ji̍t, tio̍h hêng goân-lâi ê chú-lâng.

6I mā tio̍h tùi iûⁿ-kûn tiong chhú chi̍t chiah bô hâ-chhû ê mî-iûⁿ-káng, á-sī chiàu sèng-só͘ ê kong-chhìn kó͘-kè iûⁿ ê kè-ta̍t, kau hō͘ chè-si, chòe pê-chōe-chè hiàn hō͘ Siōng Chú.

7Chè-si tio̍h tī Siōng Chú ê bīn-chêng thòe i sio̍k-chōe; i só͘ chòe jīm-hô chi̍t hāng kè-sit, lóng ōe tit-tio̍h sià-bián.

8Siōng Chú koh bēng-lēng Mô͘-se

9hoan-hù A-lûn kap i ê kiáⁿ-sun pan-pò͘ sio-hòa-chè ê tiâu-lē: Sio-hòa-chè tio̍h tī chè-tôaⁿ téng sio; m̄-thang hō͘ tôaⁿ-téng ê hé hoa--khì, tio̍h kui-mî sio kàu thiⁿ-kng.

10Chè-si tio̍h chhēng iù-môa-pò͘ ê saⁿ kap khò͘, chiong chè-tôaⁿ sio sio-hòa-chè ê hé-hu siu--khí-lâi, hē tī tôaⁿ-piⁿ.

11Āu-lâi tio̍h ōaⁿ-saⁿ, chiong hé-hu tòa chhut-khì iâⁿ-gōa, tò tī lé-gî-siōng chheng-khì ê só͘-chāi.

12Tôaⁿ-téng ê hé tio̍h put-sî hō͘ to̍h, m̄-thang hoa--khì. Chè-si tio̍h ta̍k chá-khí tī tôaⁿ-téng thiⁿ chhâ, koh chiong sio-hòa-chè pâi tī teh to̍h ê chhâ téng-bīn, mā tī hit téng-bīn sio pêng-an-chè ê iû.

13Tôaⁿ-téng ê hé tio̍h put-sî hō͘ to̍h, m̄-thang hoa--khì.

14Ē-bīn sī sò͘-chè ê tiâu-lē: A-lûn ê kiáⁿ-sun tio̍h chiong sò͘-chè the̍h-lâi chè-tôaⁿ chêng, hiàn hō͘ Siōng Chú.

15I tio̍h tùi sò͘-chè mi chi̍t tōa-pé iù mī-hún, the̍h chi̍t-kóa iû kap só͘-ū ê jú-hiuⁿ, hē tī chè-tôaⁿ téng sio, tāi-piáu só͘ hiàn ê sò͘-chè, chòe phang-phang ê chè-mi̍h hiàn hō͘ Siōng Chú.

16A-lûn kap i ê kiáⁿ-sun tio̍h chia̍h hiàn chhun ê sò͘-chè; m̄-thang chham kàⁿ chia̍h, koh tio̍h tī sèng ê só͘-chāi, chiū-sī hōe-bō͘ ê tiâⁿ chia̍h.

17Hang-piáⁿ m̄-thang chham kàⁿ. Sò͘-chè ēng hé sio hōng-hiàn lâu--lo̍h-lâi ê chè-mi̍h, góa siúⁿ-sù hō͘ chè-si; kap sio̍k-chōe-chè, pê-chōe-chè kâng-khoán sī chì-sèng.

18Chiah-ê ēng hé sio hiàn hō͘ Siōng Chú lâu--lo̍h-lâi ê mi̍h-kiāⁿ, A-lûn ê hō͘-tāi só͘-ū ê ta-po͘ kiáⁿ-sun lóng thang chia̍h, che sī in sè-sè-tāi-tāi èng-tit ê hūn-gia̍h. Só͘-ū chiap-chhiok-tio̍h chiah-ê chè-mi̍h--ê, lóng beh chiâⁿ-chòe sèng.

19Siōng Chú bēng-lēng Mô͘-se,

20tī A-lûn kap i ê kiáⁿ-sun siū boah-iû siat-li̍p chòe chè-si ê sî, tio̍h chiàu ta̍k-ji̍t teh hiàn ê sò͘-chè, hōng-hiàn chi̍t kong-kun ê iù mī-hún hō͘ Siōng Chú; chá-khí-sî chi̍t-pòaⁿ, ē-hng-sî chi̍t-pòaⁿ.

21Iù mī-hún tio̍h tī chian-pôaⁿ chhiau-iû, chhiau hō͘ chiâu, the̍h-khì hang, pun-chòe chi̍t-tè chi̍t-tè, hiàn hō͘ Siōng Chú chòe phang-phang ê sò͘-chè.

22A-lûn ê kiáⁿ-sun sòa-chiap i siū boah-iû siat-li̍p chòe tōa-chè-si--ê, tio̍h hiàn chit-ê chè, choân-pō͘ ēng hé sio hiàn hō͘ Siōng Chú. Che sī éng-oán ê kui-lē.

23Chè-si hōng-hiàn ê sò͘-chè tio̍h choân-pō͘ sio, bōe-ēng-tit chia̍h.

24Siōng Chú bēng-lēng Mô͘-se

25tio̍h hoan-hù A-lûn kap i ê kiáⁿ-sun pan-pò͘ sio̍k-chōe-chè ê tiâu-lē: Tio̍h tī Siōng Chú ê bīn-chêng, tī chè-tôaⁿ ê pak-pêng, thâi sio-hòa-chè cheng-siⁿ ê só͘-chāi, thâi sio̍k-chōe-chè ê cheng-siⁿ; che sī chì-sèng ê chè-mi̍h.

26Hiàn sio̍k-chōe-chè ê chè-si tio̍h tī sèng ê só͘-chāi, chiū-sī tī hōe-bō͘ ê tiâⁿ chia̍h chè-mi̍h.

27Só͘-ū chiap-chhiok-tio̍h chiah-ê chè-mi̍h--ê, lóng chiâⁿ-chòe sèng. Nā ū saⁿ tih-tio̍h cheng-siⁿ ê huih, tio̍h tī hōe-bō͘ lāi sóe.

28Nā ēng chho͘-hûi chú chè-bah, chú-liáu tio̍h kā kòng-phòa; nā ēng tâng ê khì-khū chú, chú-liáu chit-ê khì-khū tio̍h lù--kè, koh ēng chúi sóe--kè.

29Chè-si ka-sio̍k ê ta-po͘-lâng lóng thang chia̍h chè-bah; che sī chì-sèng ê mi̍h.

30M̄-kú sio̍k-chōe-chè ê huih nā tòa-ji̍p hōe-bō͘ ê sèng-só͘ chòe sio̍k-chōe ê lō͘-ēng, hiah-ê chè-bah m̄-thang chia̍h, tio̍h ēng hé sio.

← Chapter 5 Jump to: Chapter 7 →