Leviticus 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1A-lûn ê kiáⁿ Ná-tap kap A-pí-hō͘, the̍h in ka-kī ê hiuⁿ-lô͘, tóe hé kap hiuⁿ, tī Siōng Chú ê bīn-chêng hiàn bô sîn-sèng ê hé, m̄-sī Siōng Chú bēng-lēng in--ê.

2Ū hé tùi Siōng Chú hoat-chhut, kā in sio-sí tī Siōng Chú ê bīn-chêng.

3Mô͘-se tùi A-lûn kóng, “Siōng Chú bat án-ni kóng, ‘Chhin-kūn góa ê lâng tio̍h chun góa chòe sèng; tī choân-thé jîn-bîn ê bīn-chêng, góa beh tit-tio̍h êng-kng.’” A-lûn tiām-tiām bô kóng-ōe.

4Mô͘-se kiò A-lûn ê a-chek O͘-siat ê kiáⁿ Bí-sa-lī kap Í-lī-sat-hoán lâi, kā in kóng, “Lín lâi, kā lín chit nn̄g ê chhin-lâng tùi sèng-só͘ lêng chhut-khì iâⁿ-gōa.”

5In nn̄g lâng chiū lâi, chiàu Mô͘-se ê hoan-hù, giú hit nn̄g ê si-thé ê phàu, kā in lêng chhut-khì iâⁿ-gōa.

6Mô͘-se tùi A-lûn kap i ê kiáⁿ Í-lī-a-sat, Í-tha-má kóng, “Lín m̄-thang kā thâu-mn̂g phah-sàm, m̄-thang thiah-li̍h saⁿ ai-siong, lín chiah bián sí, koh bián hō͘ Siōng Chú tùi hōe-chiòng hoat siū-khì; m̄-kú lín ê tông-pau Í-sek-lia̍t -lâng thang ūi-tio̍h Siōng Chú hoat-chhut ê hé ai-khàu.

7Lín mā m̄-thang lī-khui hōe-bō͘, lín chiah bián sí, in-ūi lín sī hō͘ Siōng Chú boah-iû siat-li̍p--ê.” In chiū chiàu Mô͘-se ê ōe chòe.

8Siōng Chú hoan-hù A-lûn kóng,

9“Lí kap lí ê kiáⁿ ji̍p hōe-bō͘ ê sî, po̍h-chiú kāu-chiú lóng m̄-thang lim, lín chiah bián sí; che beh chòe lín sè-sè-tāi-tāi éng-oán ê kui-lē,

10hō͘ lín thang hun-pia̍t sèng á-sī sio̍k, chheng-khì á-sī bô chheng-khì;

11koh hō͘ lín thang chiong Siōng Chú thong-kè Mô͘-se bēng-lēng Í-sek-lia̍t -lâng it-chhè ê kui-lē kà-sī in.”

12Mô͘-se tùi A-lûn kap i só͘ chhun ê kiáⁿ Í-lī-a-sat kap Í-tha-má kóng, “Lín ēng hé sio hiàn hō͘ Siōng Chú ê sò͘-chè só͘ chhun--ê, tio̍h tī chè-tôaⁿ piⁿ chia̍h chiah-ê bô chham kàⁿ ê piáⁿ, in-ūi che sī chì-sèng--ê.

13Lín tio̍h tī sèng ê só͘-chāi, chiū-sī hōe-bō͘ ê tiâⁿ chia̍h, in-ūi che sī ēng hé sio hiàn hō͘ Siōng Chú ê chè-mi̍h tiong-kan, lí kap lí ê kiáⁿ èng-tit ê hūn-gia̍h; che sī Siōng Chú hō͘ góa ê bēng-lēng.

14Iô--kè hiàn hō͘ Siōng Chú ê heng-khám-bah kap gia̍h-koân hiàn hō͘ Siōng Chú ê tōa-thúi, lí kap lí ê kiáⁿ, cha-bó͘-kiáⁿ lóng thang tī lé-gî-siōng chheng-khì ê só͘-chāi chòe-hé chia̍h; in-ūi chiah-ê sī Í-sek-lia̍t -lâng pêng-an-chè ê tiong-kan, lí kap lí ê kiáⁿ èng-tit ê hūn-gia̍h.

15In tio̍h chiong gia̍h-koân ê tōa-thúi, iô--kè ê heng-khám-bah, kap ēng hé sio hiàn hō͘ Siōng Chú ê chè-mi̍h ê iû chòe-hé tòa--lâi, iô-iô--leh hiàn hō͘ Siōng Chú; chiah-ê éng-oán chòe lí kap lí ê kiáⁿ èng-tit ê hūn-gia̍h; che sī Siōng Chú hō͘ góa ê bēng-lēng.”

16Āu-lâi, Mô͘-se kip beh chhē hit-chiah chòe sio̍k-chōe-chè ê soaⁿ-iûⁿ-káng. Ná chai, í-keng sio--khì lah. Mô͘-se chiū tùi A-lûn iáu oa̍h--teh ê kiáⁿ Í-lī-a-sat kap Í-tha-má hoat siū-khì, kóng,

17“Lín sī-án-chóaⁿ bô tī sèng ê só͘-chāi chia̍h chit-ê sio̍k-chōe-chè? Chit-ê sī chì-sèng--ê. Siōng Chú í-keng chiong chit-ê hō͘ lín, beh tû-khì hōe-chiòng ê chōe-kò, tī Siōng Chú ê bīn-chêng kā in sio̍k-chōe.

18Kì-jiân chè-mi̍h ê huih bô tòa-ji̍p sèng-só͘, lín chiū tio̍h chiàu góa ê bēng-lēng chia̍h.”

19A-lûn tùi Mô͘-se kóng, “Kin-á-ji̍t in tī Siōng Chú ê bīn-chêng hiàn sio̍k-chōe-chè kap sio-hòa-chè, m̄-kú góa ū tú-tio̍h pi-chhám ê tāi-chì, nā chia̍h sio̍k-chōe-chè, Siōng Chú kiám ōe hoaⁿ-hí?”

20Mô͘-se thiaⁿ-liáu, mā kám-kak ha̍p-lí.

← Chapter 9 Jump to: Chapter 11 →