Leviticus 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Siōng Chú hoan-hù Mô͘-se tùi A-lûn ê hō͘-tāi chòe chè-si--ê soan-pò͘: Jîn-bîn ê tiong-kan nā ū lâng sí, chè-si m̄-thang in-ūi i phah lâ-sâm ka-kī,

2chí-ū thang ūi-tio̍h ka-kī ê pē-bú, kiáⁿ cha-bó͘-kiáⁿ, hiaⁿ-tī, í-ki̍p iáu-bē chhut-kè ê chāi-sek-lú chí-bē, chiah-ê kut-jio̍k chì-chhin, bong in ê si-thé lâi phah lâ-sâm ka-kī.

4Chè-si nā í-keng kiat-hun, m̄-thang in-ūi bó͘ ê āu-thâu-chhù ū lâng sí lâi phah lâ-sâm ka-kī, hō͘ ka-kī bô chheng-khì.

5Chè-si m̄-thang thâu-khak thì-kng-kng; m̄-thang siu chhùi-chhiu; m̄-thang koah-siong ka-kī ê seng-khu.

6Tio̍h sèng-hòa kui Siōng-tè; m̄-thang siat-to̍k Siōng-tè ê miâ; in-ūi in ēng hé sio chia̍h-mi̍h hiàn hō͘ Siōng Chú — in ê Siōng-tè, só͘-í in tio̍h chiâⁿ-chòe sèng.

7M̄-thang chhōa chòe ki-lú phah lâ-sâm ka-kī ê hū-jîn-lâng; m̄-thang chhōa lî-hun--kè ê hū-jîn-lâng; in-ūi chè-si í-keng sèng-hòa kui Siōng-tè.

8Jîn-bîn tio̍h khòaⁿ chè-si chòe sèng, in-ūi hōng-hiàn hō͘ lín ê Siōng-tè ê chia̍h-mi̍h sī in hiàn--ê. Góa sī kā lín hun-pia̍t-choh-sèng ê Siōng Chú, sī sèng; lín tio̍h khòaⁿ chè-si chòe sèng.

9Chè-si ê cha-bó͘-kiáⁿ nā chòe ki-lú phah lâ-sâm ka-kī, sī bú-jio̍k i ê lāu-pē, tio̍h ēng hé kā i sio-sí.

10Tī hiaⁿ-tī ê tiong-kan chòe tōa-chè-si--ê, sī siū boah-iû siat-li̍p, chhēng lé-ho̍k, tam-tng sèng-chit; m̄-thang kā thâu-mn̂g phah-sàm, mā m̄-thang thiah-li̍h saⁿ.

11M̄-thang óa-kūn si-thé, sīm-chì ka-kī ê pē-bú sí, mā m̄-thang óa-kūn lâi phah lâ-sâm ka-kī.

12M̄-thang lī-khui sèng-só͘ khì chham-ka song-lé, chiah bián siat-to̍k Siōng-tè ê sèng-só͘, in-ūi i ê seng-khu ū Siōng-tè boah-iû siat-li̍p ê kì-hō. Góa sī Siōng Chú.

13I tio̍h chhōa chāi-sek-lú chòe bó͘.

14M̄-thang chhōa kóaⁿ-hū, á-sī lî-hun ê hū-jîn-lâng, á-sī chòe ki-lú phah lâ-sâm ka-kī ê hū-jîn-lâng, chí-ū thang chhōa pún-cho̍k ê chāi-sek-lú,

15chiah bián i ê hō͘-tāi tī jîn-bîn ê tiong-kan siū bú-jio̍k, in-ūi góa sī kā i hun-pia̍t-choh-sèng ê Siōng Chú.

16Siōng Chú hoan-hù Mô͘-se

17tùi A-lûn kóng: Lí ta̍k sè-tāi ê kiáⁿ-sun sin-thé ū khoat-hām--ê, lóng m̄-thang chìn-chêng hōng-hiàn chia̍h-mi̍h hō͘ in ê Siōng-tè.

18Sin-thé ū khoat-hām, bô-lūn sī sit-bêng, kha-pái, nah-phīⁿ, kî-hêng,

19tn̄g-kha tn̄g-chhiú,

20ún-ku, óe-lâng, ba̍k-chiu ū mô͘-pīⁿ, siⁿ-sián, siⁿ-chhng, á-sī lān-hu̍t siū-siong, chit-khoán lâng lóng m̄-thang lâi kàu Siōng-tè ê bīn-chêng hiàn-chè.

21Chè-si A-lûn ê hō͘-tāi, seng-khu ū khoat-hām--ê, lóng m̄-thang ēng hé sio chè-mi̍h hiàn hō͘ Siōng Chú, in-ūi i ū hâ-chhû, bōe-ēng-tit hōng-hiàn chia̍h-mi̍h hō͘ in ê Siōng-tè.

22Hiàn hō͘ Siōng-tè ê chia̍h-mi̍h, bô-lūn sī chì-sèng--ê, á-sī sèng--ê, i lóng thang chia̍h.

23In-ūi i ū khoat-hām, só͘-í m̄-thang lâi kàu tiùⁿ-lî chêng, mā m̄-thang óa-kūn chè-tôaⁿ, chiah bián siat-to̍k góa ê sèng-só͘. Góa sī kā in hun-pia̍t-choh-sèng ê Siōng Chú.

24Mô͘-se chiū chiàu án-ni tùi A-lûn kap i hiah-ê kiáⁿ, í-ki̍p Í-sek-lia̍t chèng-lâng soan-pò͘.

← Chapter 20 Jump to: Chapter 22 →