Leviticus 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Nā ū lâng siū iau-kiû tī kong-chiòng ê bīn-chêng, ūi-tio̍h só͘ thiaⁿ--tio̍h, só͘ khòaⁿ--tio̍h chiù-chōa ê sū choh-chèng, m̄-kú i m̄-khéng, i chiū ū chōe, tio̍h tùi ka-kī ê chōe hū chek-jīm.

2Nā ū lâng bong-tio̍h bô chheng-khì ê mi̍h, bô-lūn sī iá-siù, cheng-siⁿ, á-sī thâng-thōa ê sin-si, sui-jiân i m̄ chai, i mā-sī bô chheng-khì, iû-goân ū chōe.

3Nā ū lâng bong-tio̍h jīm-hô hō͘ lâng bô chheng-khì ê mi̍h, sui-jiân i m̄ chai, kàu i chi̍t-ē chai, chiū ū chōe.

4Nā ū lâng sûi-piān chiù-chōa, bô-lūn chhut tī siān-ì á-sī ok-ì, sui-jiân i bô ì-sek-tio̍h ka-kī sûi-piān chiù-chōa, kàu i chi̍t-ē chai, chiū ū chōe.

5Nā ū lâng hoān-tio̍h í-siōng chiah-ê sū ê jīm-hô chi̍t hāng, chiū tio̍h sêng-jīn ka-kī hoān--tio̍h ê chōe;

6mā tio̍h in-ūi só͘ hoān ê chōe, chiong pê-chōe-chè ê chè-mi̍h tòa-lâi Siōng Chú bīn-chêng, chiū-sī tùi iûⁿ-kûn ê tiong-kan kéng chi̍t chiah mî-iûⁿ-bú á-sī soaⁿ-iûⁿ-bú chòe sio̍k-chōe-chè. Chè-si tio̍h ūi-tio̍h hit-ê lâng sio̍k-chōe.

7I nā bô-kàu-la̍t thang hiàn iûⁿ-á, chiū tio̍h in-ūi ka-kī hoān ê chōe, ēng nn̄g chiah pan-kah á-sī nn̄g chiah hún-chiáu-á-kiáⁿ, tòa-lâi kàu Siōng Chú bīn-chêng chòe pê-chōe-chè; chi̍t chiah chòe sio̍k-chōe-chè, chi̍t chiah chòe sio-hòa-chè.

8I tio̍h chiong chiah-ê tòa-khì chè-si hia; chè-si tio̍h seng hiàn sio̍k-chōe-chè, chūn-tn̄g chiáu-á ê ām-kún, m̄-kú m̄-thang hō͘ thâu lī-khui seng-khu.

9Koh tio̍h chiong chiáu-á ê huih hiù tī chè-tôaⁿ piⁿ, hō͘ chhun ê huih tih tī chè-tôaⁿ kha. Che sī sio̍k-chōe-chè.

10Sòa-chiap, i tio̍h chiàu kui-lē hiàn tē-jī chiah chòe sio-hòa-chè. Chè-si án-ni ūi hit-ê lâng sio̍k-chōe, i chiū tit-tio̍h sià-bián.

11I nā bô-kàu-la̍t thang hiàn nn̄g chiah pan-kah á-sī nn̄g chiah hún-chiáu-á-kiáⁿ, chiū tio̍h in-ūi i só͘ hoān ê chōe, hiàn chi̍t kong-kun ê iù mī-hún chòe sio̍k-chōe-chè; m̄-thang hē iû, mā m̄-thang chham jú-hiuⁿ, in-ūi che sī sio̍k-chōe-chè.

12I tio̍h chiong chè-mi̍h tòa-khì chè-si hia; chè-si tio̍h mi chi̍t tōa-pé hē tī chè-tôaⁿ téng, tāi-piáu só͘ hiàn ê sio̍k-chōe-chè, ēng hé sio chòe chè-mi̍h hiàn hō͘ Siōng Chú. Che sī sio̍k-chōe-chè.

13I tī chit kúi hāng sū ê tiong-kan ū hoān-tio̍h chi̍t hāng, chè-si tio̍h án-ni kā i sio̍k-chōe, i chiū tit-tio̍h sià-bián; kap sò͘-chè siâng-khoán, só͘ hiàn chhun ê iù mī-hún lóng kui hō͘ chè-si.

14Siōng Chú koh bēng-lēng Mô͘-se pan-pò͘ í-hā chiah-ê tiâu-lē:

15Nā ū lâng m̄-sī thiau-kò͘-ì, bô hiàn eng-kai hiàn hō͘ Siōng Chú ê chè-mi̍h tì-kàu hoān-chōe, tio̍h tùi iûⁿ-kûn tiong hōng-hiàn chi̍t chiah bô hâ-chhû ê mî-iûⁿ-káng, á-sī kun-kù sèng-só͘ ê kong-chhìn, hiàn kap hit-chiah iûⁿ kâng-khoán kè-ta̍t ê gûn chòe pê-chōe-chè;

16koh in-ūi i tī beh hiàn hō͘ Siōng Chú ê chè-mi̍h hoān-chōe, tio̍h ke gō͘-hūn-chi̍t kau hō͘ chè-si, pó͘ i ê kè-sit. Chè-si tio̍h ēng pê-chōe-chè ê mî-iûⁿ-káng thòe i sio̍k-chōe, i chiū tit-tio̍h sià-bián.

17Nā ū lâng bô-ì-tiong hoān-chōe, ûi-hoān jīm-hô chi̍t hāng Siōng Chú só͘ bēng-lēng bōe-ēng-tit chòe ê sū, i sui-jiân m̄ chai, mā ū chōe, chiū tio̍h tùi ka-kī ê chōe hū chek-jīm.

18I tio̍h chiàu sèng-só͘ ê kui-tēng, tùi iûⁿ-kûn tiong chhú chi̍t chiah bô hâ-chhû ê mî-iûⁿ-káng lâi, kau hō͘ chè-si chòe pê-chōe-chè, in-ūi i bô-ì-tiong hoān-chōe. Chè-si tio̍h thòe i sio̍k-chōe, i chiū tit-tio̍h sià-bián.

19Che sī pê-chōe-chè, in-ūi i ū ûi-hoān Siōng Chú ê bēng-lēng.

← Chapter 4 Jump to: Chapter 6 →