Leviticus 24

Chinese TTVR (現代台語譯本羅馬字版)

← Chapter 23 Jump to: Chapter 25 →

1Siōng Chú tùi Mô͘-se kóng:

2Lí tio̍h hoan-hù Í-sek-lia̍t -lâng tòa sûn ê kaⁿ-ná-iû lâi kau hō͘ lí, thang tiám-to̍h hōe-bō͘ lāi ê teng, hō͘ teng put-sî tiám--teh.

3Tùi ē-hng kàu chá-khí, A-lûn tio̍h tī Siōng Chú ê bīn-chêng, chiong hōe-bō͘ lāi-bīn iok-kūi chêng ê tiùⁿ-lî gōa ê teng tiám hō͘ to̍h; che beh chòe lín sè-sè-tāi-tāi éng-oán ê kui-lē.

4A-lûn tio̍h tī Siōng Chú ê bīn-chêng, siông-siông chiàu-kò͘ koán-lí sûn-kim teng-tâi téng-bīn ê teng-hé.

5Lí tio̍h ēng iù mī-hún hang cha̍p-jī tè piáⁿ, ta̍k-tè nn̄g kong-kun.

6Tio̍h chiong piáⁿ pâi chòe nn̄g chōa, múi-chōa la̍k tè, pâi tī Siōng Chú bīn-chêng sûn-kim ê toh téng-bīn.

7Koh tio̍h ēng sûn ê jú-hiuⁿ sám tī ta̍k-chōa piáⁿ ê téng-bīn, tāi-piáu ēng hé sio hiàn hō͘ Siōng Chú ê lé-mi̍h.

8Ta̍k-ê An-hioh-ji̍t, A-lûn tio̍h chiong chiah-ê piáⁿ pâi tī Siōng Chú ê bīn-chêng, m̄-thang làng-chām; che sī Í-sek-lia̍t -lâng éng-oán tio̍h siú ê iok.

9Chiah-ê piáⁿ tio̍h kui hō͘ A-lûn kap i ê kiáⁿ-sun. In tio̍h tī hōe-bō͘ ê tiâⁿ chia̍h, in-ūi che sī ēng hé sio hiàn hō͘ Siōng Chú ê chè-mi̍h tiong-kan chì-sèng ê pō͘-hūn, chòe chè-si éng-oán tit--tio̍h ê hūn-gia̍h.

10Ū chi̍t ê lâng, i ê lāu-pē sī Ai-ki̍p -lâng, lāu-bú sī Í-sek-lia̍t -lâng, sī Tān chi-cho̍k Tí-pek-lī ê cha-bó͘-kiáⁿ Sī-lô-bi̍t. Ū chi̍t ji̍t, i tī iâⁿ-lāi kap chi̍t ê Í-sek-lia̍t -lâng oan-ke, siat-to̍k koh chiù-chó͘ Siōng Chú ê miâ. Ū lâng kā i tòa-khì Mô͘-se hia.

12In kā i koaiⁿ--khí-lâi, thèng-hāu Siōng Chú chí-sī.

13Siōng Chú tùi Mô͘-se kóng,

14“Tio̍h chiong hit-ê lâng tòa-khì iâⁿ-gōa, hō͘ thiaⁿ--tio̍h i chiù-chó͘ ê lâng hōaⁿ-chhiú tī i ê thâu-khak téng, kiàn-chèng i ū-chōe; choân hōe-chiòng tio̍h ēng chio̍h-thâu kā i tìm-sí.

15Lí tio̍h tùi Í-sek-lia̍t -lâng soan-pò͘: Nā ū lâng chiù-chó͘ Siōng-tè, tio̍h tùi ka-kī ê chōe hū chek-jīm.

16Nā ū lâng siat-to̍k Siōng Chú ê miâ, bô-lūn sī chāi-tōe-lâng á-sī gōa-cho̍k-lâng, it-tēng tio̍h hō͘ i sí; choân hōe-chiòng tio̍h ēng chio̍h-thâu kā i tìm-sí.

17“Nā ū lâng phah-sí lâng, it-tēng tio̍h hō͘ i sí.

18Nā phah-sí cheng-siⁿ, tio̍h pê cheng-siⁿ, ēng miā pê miā.

19“Nā ū lâng siong-hāi tông-pau, i án-chóaⁿ kā lâng siong-hāi, mā tio̍h án-ni tùi-thāi i:

20Ēng siong pê siong, ēng ba̍k-chiu pê ba̍k-chiu, ēng chhùi-khí pê chhùi-khí; i án-chóaⁿ kā lâng siong-hāi, chiū án-ni pān i.

21Phah-sí cheng-siⁿ--ê, tio̍h pê cheng-siⁿ; phah-sí lâng--ê, it-tēng tio̍h hō͘ i sí.

22Bô-lūn sī gōa-cho̍k-lâng á-sī chāi-tōe-lâng, lóng tio̍h chiàu kâng-khoán ê hoat-lu̍t chhú-lí. Góa sī Siōng Chú — lín ê Siōng-tè.”

23Mô͘-se chiū kā Í-sek-lia̍t -lâng kóng, in chiū chiong hit-ê chiù-chó͘ Siōng Chú ê lâng tòa-khì iâⁿ-gōa, ēng chio̍h-thâu kā i tìm-sí. Í-sek-lia̍t -lâng chiàu Siōng Chú bēng-lēng Mô͘-se ê ōe khì chòe.

← Chapter 23 Jump to: Chapter 25 →