Leviticus 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Siōng Chú bēng-lēng Mô͘-se

2tio̍h tùi Í-sek-lia̍t -lâng soan-pò͘: Góa sī Siōng Chú — lín ê Siōng-tè.

3Lín bat tòa-kè Ai-ki̍p, hia ê lâng ê hêng-ûi lín m̄-thang o̍h. Góa beh chhōa lín chìn-ji̍p Ka-lâm -tōe, hia ê lâng ê hêng-ûi lín m̄-thang chòe, mā m̄-thang tè in ê hong-sio̍k.

4Lín tio̍h chhiat-si̍t chun-hêng góa ê bēng-lēng kap kui-lē. Góa sī Siōng Chú — lín ê Siōng-tè.

5Lín tio̍h chun-siú góa ê kui-lē kap bēng-lēng; lâng nā chun-siú chiah-ê, chiū ōe tit-tio̍h oa̍h-miā. Góa sī Siōng Chú.

6Lín lóng m̄-thang kap kūn-chhin ū sèng-koan-hē. Góa sī Siōng Chú.

7M̄-thang kap lāu-bú ū sèng-koan-hē, lâi lêng-jio̍k lí ê lāu-pē; i sī lí ê lāu-bú, m̄-thang lō͘-hiān i ê hā-thé.

8M̄-thang kap lí ê lāu-pē kî-tha ê bó͘ ū sèng-koan-hē, lâi lêng-jio̍k lí ê lāu-pē.

9M̄-thang kap lí ê chí-bē ū sèng-koan-hē, bô-lūn sī kâng-pē--ê á-sī kâng-bú--ê, tī chhù-lāi á-sī gōa-bīn siⁿ--ê, lóng m̄-thang lō͘-hiān in ê hā-thé.

10M̄-thang kap lí ê cha-bó͘-sun, bô-lūn sī lāi-sun á-sī gōa-sun ū sèng-koan-hē, in-ūi in ê hā-thé sī lí ka-kī ê hā-thé.

11M̄-thang kap kâng-pē bô kâng-bú ê chí-bē ū sèng-koan-hē.

12M̄-thang kap lí ê a-ko͘ ū sèng-koan-hē; i sī lí ê lāu-pē ê kut-jio̍k chì-chhin.

13M̄-thang kap lí ê a-î ū sèng-koan-hē; i sī lí ê lāu-bú ê kut-jio̍k chì-chhin.

14M̄-thang kap lí ê a-ḿ, a-chím ū sèng-koan-hē.

15M̄-thang kap lí ê sin-pū ū sèng-koan-hē.

16M̄-thang kap lí ê hiaⁿ-só, tē-hū ū sèng-koan-hē.

17Kap lí ū sèng-koan-hē ê cha-bó͘-lâng, lí m̄-thang koh kap i ê cha-bó͘-kiáⁿ ū sèng-koan-hē, mā m̄-thang chhōa hit-ê cha-bó͘-lâng ê cha-bó͘-sun chòe bó͘; in sī i ê kut-jio̍k chì-chhin. Che sī loān-lûn kiàn-siàu ê sū.

18Bó͘ iáu oa̍h--teh, m̄-thang chhōa i ê chí-bē lâi chòe i ê tùi-thâu.

19Hū-jîn-lâng keng-kî tiong bô chheng-khì ê sî, m̄-thang kap i ū sèng-koan-hē.

20M̄-thang kap pa̍t-lâng ê bó͘ ū sèng-koan-hē lâi phah lâ-sâm ka-kī.

21M̄-thang hiàn lí ê kiáⁿ cha-bó͘-kiáⁿ hō͘ Mô͘-lo̍k. M̄-thang siat-to̍k lí ê Siōng-tè ê miâ. Góa sī Siōng Chú.

22M̄-thang kap ta-po͘-lâng ū sèng-koan-hē, chhin-chhiūⁿ kap hū-jîn-lâng kâng-khoán; che sī chin thang iàm-ò͘ⁿ ê tāi-chì.

23M̄-thang kap jīm-hô cheng-siⁿ kau-ha̍p lâi phah lâ-sâm ka-kī; hū-jîn-lâng mā m̄-thang kap cheng-siⁿ kau-ha̍p; che sī ûi-hoán chū-jiân ê tāi-chì.

24Lín m̄-thang chòe í-siōng kìm-chí ê sū lâi phah lâ-sâm ka-kī; in-ūi góa teh-beh tī lín bīn-chêng kóaⁿ--chhut-khì ê gōa-cho̍k-lâng, ū chòe chiah-ê sū lâi phah lâ-sâm ka-kī.

25In án-ni chòe mā ù-jiám thó͘-tōe, só͘-í góa hêng-hoa̍t thó͘-tōe, hō͘ thó͘-tōe chiong hiah-ê chū-bîn thò͘--chhut-khì.

26Só͘-í lín tio̍h chun-siú góa ê kui-lē kap bēng-lēng; chiah-ê thang iàm-ò͘ⁿ ê sū, bô-lūn sī chāi-tōe-lâng, á-sī kià-ku tī lín tiong-kan ê gōa-cho̍k-lâng lóng m̄-thang chòe.

27Tī lín í-chêng chit-ê thó͘-tōe ê chū-bîn ū chòe chiah-ê thang iàm-ò͘ⁿ ê sū, tōe soah siū ù-jiám.

28Lín m̄-thang ù-jiám hit-ê thó͘-tōe, chiah bián tōe chiong lín thò͘--chhut-khì, chhin-chhiūⁿ chiong lín í-chêng ê chū-bîn thò͘--chhut-khì kâng-khoán.

29Nā ū lâng chòe í-siōng kìm-chí ê sū, hit-ê lâng tio̍h tùi jîn-bîn ê tiong-kan kek-chhut.

30Lín tio̍h chun-siú góa ê bēng-lēng, chiah bián lín khì tè í-chêng ê chū-bîn thang iàm-ò͘ⁿ ê hong-sio̍k, soah phah lâ-sâm ka-kī. Góa chiū-sī Siōng Chú — lín ê Siōng-tè.

← Chapter 17 Jump to: Chapter 19 →