2 Chronicles 1

Zande

Jump to: Chapter 2 →

1Soromo wiri Dawidi anyakasi tiko rogo gako ngbi, Yekova nga gako Mbori adu na ko ki nikiisi pa ko ni bakere he.

2Soromo ki gumba pai fu aYisaraere dunduko, fu abarutirivura nga ga akutu yo na abarutirivura nga ga akama yo, na fu abasapungbanga, na fu abazogo dunduko Yisaraere yo, nangia abarumbatayo fu angbatunga abayo.

3Si du Soromo andu ti ni na gbuu dunduko na ko, ku ri gu tumbatumba rago naadu Gibona yo; bambiko yo bamburoko dungurati adu ni nga ga Mbori, nga gu Mose nga ga Yekova moyambu amangi he ngbakungba yo.

4Ono ga Mbori sanduki Dawidi ayega na ni Kiriyatayarima yo ku rogo gu ba Dawidi ambakadi tipa ha, bambiko ko adua bamburoko tipa ha Yerusarema yo.

5Gu bamotumo sirigi nangia gu Besarere amangi nangia wiri Uri, Uri angia wiri Uru, si adu yo barangba ga Yekova banye. Yo Soromo na gbuu asana Yekova ni.

6Soromo ki ndu koyo du bamotumo sirigi ni ku bara bangiri Yekova, naadu ku bamburoko dungurati yo, ko ki tumo ni zozo amotumo 1,000 auru he.

7Ni gu yuru re Mbori ayugu tiko fu Soromo, ki ya fu ko. “Mo sana he tipa gu he mi ka fu foro.”

8Soromo ki ya fu Mbori, “Mo ayugu bakere weneringise fu buba nangia Dawidi, mo ki moi re ni bakindo ku ba ko.

9Ako Yekova Mbori, mo nyákasi ga kidohe awere mo akido fu buba nangia Dawidi, bambiko kina mo namoi re ni bakindo ku ri aboro du ni badungu yo wa nvutu auru kpotosende.

10Mo fú tatamana fere awere na inahe mi ki ta kura sa pai ki niyega ku bangiri agi aboro re, bambiko da rengbe ka sara ngbanga gi gamo aboro du ni badungu yo re?”

11Mbori ki karaga pai fu Soromo, “Bambiko gere nadu kpotoro yo, wa mo asana nga he tipa ũkumuko, na akumuko a ya, watadu tipa irisa na tipa unga avuraro a ya, wa mo asana nga he tipa ungaro si du ni gbanga ha ya, ono mo nisana he tipa kina tatamana tipa ro na inahe ka sara ngbanga gimi aboro nga agu yo mi amoi ro ni bakindo ku ri yo,

12mi idi pa tatamana foro na inahe. Mi afú ũkumuko foro, na akumuko, na irisa, ngbatunga agi apai re adu nga wo fu agu abakindo naadu foro mbata te, gu ni adu nga na ni wa mo fuo ro a te.”

13Soromo ki yega ti gako nunguro tumbatumba rago Gibona yo barangba bamburoko dungurati ku Yerusarema yo. Ko ki zogo aYisaraere.

14Soromo ki dungura angbagidavura na abanduri afarasi; angbagidavura adu be ko wa 1,400, abanduri afarasi ki du wa 12,000. Ko ki moi yo ku rogo agu abaakporo i akpara tipa pa angbagidavura, na ku pati bakindo a Yerusarema yo.

15Ti rago Soromo feda na dahabu ki du Yerusarema yo wa kina zekere mbia, na angua akedara ni ngenge he ki du wa ngua wa vurumo ngboongbooragoyo.

16Ga Soromo afarasi aye Ezipeta yo, ga bakindo ababagiahe angbera kuti ringbisiringbisi genora.

17Geno gu ngbagidavura sa naye Ezipeta yo adu wa asekere feda 600, geno gu farasi sa ki du wa asekere 150. Ga bakindo ababagiahe ki bagi he berewe fu abakindo aIto dunduko na abakindo aSurio a.

Jump to: Chapter 2 →