2 Chronicles 2

Zande

← Chapter 1 Jump to: Chapter 3 →

1Soromo ki berẽ pa dua bambu tipa rimo Yekova, na bambu ti rimo gako ngbi.

2Soromo ki gedi aboro wa 70,000 ka tinda ahe, na aboro wa 80,000 ni abageteke mbia ri abaagangara yo, na ababi pa sunge wa aboro 3,600 ku ri yo.

3Soromo ki kedi pai koyo du Urama ni nangia bakindo Tura: ki ya, “Wa mo anamanga na buba nangia Dawidi ki nikedi akedara fu ko ko dua bambu na ni ka raka rogo, mo mangi na mi kina wo a.

4Mo ngére, mi nikadua bambu tipa rimo Yekova gi Mbori ka kpara ha fu ko ka zo fuõngua nga ga tome ngua ku bara bangiriko, na tipa kpokuta yugopai i ka amaa ha na uru kindi, na tipa zozo amotumo na awiso na anyemu, ti rago asabiti na ti rago fogo adiwi na ti rago ringbisiringbisi apumbo nga ga Yekova gaani Mbori, a wa i arugu pa ha fu aYisaraere nye anye kindi.

5Gu bambu mi akadua si adu ni babakere he gbe, bambiko gaani Mbori du ni bahe ti ambori dũ.

6Ono da rengbe ka dua bambu fu ko? wa du he nga ngbangbaturũ, na gu ngbangbaturũ nga ga angbangbaturũ arengba nga fu ko dũ te. Da nga mi tie ka dua bambu fu ko, kpara kina ba tipa zo fuõngua ku bara bangiriko?

7Si du awere mo kédi boro birĩ fere namanga sunge rogo dahabu, na rogo ieda, na rogo sirigi, na rogo mará, na rogo ngungungu roko, na rogo zamba ha, na gbaya ha, gu ni du ni bangbasia gbaka zeahe, ni du na agu aboro birĩ du Yuda no na Yerusarema no, nga agu yo Dawidi nangia buba afu yo.

8Mo kédi ngua akedara fere a, na ngua akupuresa, na ngua aruguma Rebanona yo, bambiko mi ini he gamo amoyambu nga abangbasia rogo de sekeseke ngua Rebanona yo. Gimi aborosunge adu na gamo aborosunge,

9ka mbakada sekeseke ngua fere kpaima, bambiko gu bambu mi nikadua ha si adu ni babakere he gbe ni iiriwo ho.

10Mi afu zende nganu wa aritere mirioni saba na 400,000 fu gu gamo aborosunge, nga abasekengua na zende he wa ga mapunga wa aritere mirioni saba na 400,000, na imekakue wa aritere 740,000 na nzeme wa aritere 740,000.”

11Urama nangia bakindo Tura ki karaga ha rogo kekepai yo ko akedi fu Soromo, ki ya, “Bambiko Yekova nakpi nyemu gako aboro si du ko moi ro ni bakindo ku ri yo.”

12Urama ki ya ku ri gure, “I sámbua Yekova ga aYisaraere Mbori, nga gu ko namangi ngbangbaturũ na kpotosende, nafu tatamana gude fu Bakindo Dawidi, ki fu wene berá fu ko na rugatinapai, nga gu ko nikadua bambu tipa Yekova, na bambu tipa gako ngbi.

13“Mi kedi boro biriĩ foro awere, du na rugatinapai, nga Urama-abi,

14ko nga wiri de nangia ngbatunga Dana, bako adu ni boro Tura. Ko ni bangbasia ka manga sunge rogo dahabu, na rogo feda, na rogo sirigi, na rogo marã, na rogo mbia, na sekeseke ngua, rogo ngungungu roko, na gbaya ha, na zamba he, na tutu ndindii giri nzibi, na ka gbaka ngbatunga zeahe a, na ka sanga ngbatunga asunge a i ríngbisi ba fu ko dagba gamo aboro birĩ, nga aboro birĩ nga ga gi gbia yo nga Dawidi nga bamo.

15Were gu nganu na he wa mapunga gi gbia agumba pa ha na nzeme na imekakue, ko kédi he fu gako aborosunge;

16ani adéwa ngua adewa Rebonona yo, ni bakere he wa mo akpi nyemu he, ani ayé na ni foro ni kpakparikpa ha si nindu ri baime ku Yapo yo, mo ki tindi he ku Yerusarema yo.”

17Soromo ki gedi gu kungba aboro dunduko naadu rogo ga aYisaraere ringara, fuo gu geda yo Dawidi nangia bako agedi yo. I abi yo wa aboro 153,600.

18Ko ki ringbisi agu yo 70,000 i nitindi tindiro, na agu yo 80,000 ni abageteke mbia ti abaagangara, na ababi pa sunge wa aboro 3,600 i niringbisi aboro sa sunge.

← Chapter 1 Jump to: Chapter 3 →