2 Chronicles 18

Zande

← Chapter 17 Jump to: Chapter 19 →

1Were Yosafata adu na aũkumuko na irisa gbe; ko ki kpamia tiko kuti Aba wa ko adi wiriko.

2Fuo bete agara ko andu ku Somorona yo ka bi Aba. Aba ki imi akandoro na abaabagara tipa ko ni dungu ra, na tipa agu aboro naadu na ko a. Aba ki zomia ko i ndu na ko kuti Ramotagirada.

3Aba bakindo aYisaraere ki ya fu Yosafata bakindo aYudo, “Ani andú na mo ku Ramota-girada yo?” Ko ki karaga ha fu ko ki ya, “Mi wa kina ro, gimi aboro wa kina gamo aboro. Ani adú na mo rago sovura.”

4Yosafata ki ya fu bakindo aYisaraere, “Mi nazungadi ro, mo sána he tipa sangba Yekova mbata areme.”

5Si du bakindo aYisaraere adungura anebi ti ni wa aboro 400, ki ya fu yo, “Ani ndú ka so vura, kuti Ramota-girada yo, watadu mi nye?” I ki ya, “Oni ndú; bambiko Mbori nikafu he ku be bakindo.”

6Ono Yosafata ki ya, “A nga kura nebi ho nga ga Yekova ni ka ani sana ko, te?”

7Bakindo aYisaraere ki ya fu Yosafata, “Boro ko yo sa ka ani sana Yekova ku ngbani, nga Mikaya wiri Yimera; ono mi nasoga ko, bambiko ko nagumba nga wenepai tipa re te, ono kina gbigbitapai dedede.” Yosafata ki ya, “Ka bakindo gúmba nga ha wo ya.”

8Bakindo aYisaraere ki yambu vuruko sa, ki ya fu ko, “Mo yé na Mikaya ni ipo nga wiri Yimera.”

9Were bakindo aYisaraere na Yosafata bakindo aYudo ki sungu ri gayo ambatabakindo ni ukadiukadi tiyo na gayo aroko; i ki sungu rogo bataka zende ahe ti ngbadimo bakporo Somorona; anebi dunduko ki nigumba pai ku bara bangiriyo.

10Sedekiya nangia wiri Kenana ambakadi agbanga ni marã tipa tiko, ki ya, “Wo poi Yekova re, ‘Mo atúrã aSurio na agi ahe re daho mo ka ba tungayo ni kpakaya’.”

11Anebi dunduko ki gumba pai kina wo, ki ya, “Oni ndu ku Ramota-girada yo, ki u; bambiko Yekova afú he ku be bakindo.”

12Gu sunge naandu ka yamba Mikaya agumba pai fu ko, ki ya, “Mo ngére, agu apai anebi apeka si kusi wenepai fu bakindo wa pai ku ngba boro sa; mi nazungadi ro sangbaro dú wa kina sangba gu ni sa dagba yo mo gúmba kina wenepai a.”

13Ono Mikaya ki ya, “Wa du Yekova ni ungako, gu pai gi Mbori agumba, mi agúmba kina ha.”

14Ho ko ada ni koyo du bakindo ni, bakindo ki ya fu ko, “Mikaya, ani ndú sa vura kuti Ramota-girada yo, watadu ka mi nye?” Ko ki karaga ha ki ya, “Oni ndú, ki u; i afú yo ku be roni.”

15Bakindo ki ya fu ko, “Mi tigimi mi aruga ro bara waĩ mo gúmba kina rengo fere ti rimo Yekova?”

16Mikaya ki ya, “Mi abi aYisaraere ni gbandakagbandaka yo dunduko ri abaagangara, a wa agu akandoro adu nga babandara ti ra ya; Yekova ki ya, ‘Agi yo re adu nga na bairayo ti ni ya; i ga ku kpuyo yo dunduko ngba zereda.’ ”

17Bakindo aYisaraere ki ya fu Yosafata, “Mi nagumba nga ha foro te ya ko agumba nga wenepai tipa re te, kina gbigbitapai?”

18Mikaya ki ya, “Ono mo gí sangba Yekova tie; mi abi Yekova ko nisungu auru gako mbatabakindo, gu rimbasa dunduko nga ga ngbangbaturũ yo ki ru ku kumbabeko na ku garebeko yo;

19Yekova ki ya, ‘Da nikananga Aba bakindo aYisaraere, ko ndu ku Ramota-girada yo ka kpi yo?’ Gu ni ki gumba ha were, gu kura ni ki gumba pai were.

20Toro ki ye ki ru ku bara bangiri Yekova, ki ya, ‘Mi tigimi nikananga ko.’ Yekova ki ya fu ko, ‘Ni gini pai?’

21Ko ki ya, ‘Mi andu ki du wa irazire toro ku ngba gako anebi dunduko.’ Yekova ki ya, ‘Mo anánga ko, si ki di be ko; mo ndú ki mangi he kina wo.’

22Mo ngére tie, si du Yekova moi irazire toro ku ngba gi gamo anebi re yo dunduko; Yekova gumba pa gbigbitapai tipa ro.”

23Sedekiya wiri Kenana ki mbedi ki nari pangba Mikaya, ki ya, “Ga Yekova Toro aguari ti re waĩ ka gumba pai foro?”

24Mikaya ki ya, “Mo ngere, mo abí he ni gu rago mo ka ndu ku rogo vuru bambu yo ka oka tiro.”

25Bakindo aYisaraere ki ya, “Oni zí Mikaya, ki ndu na ko berewe koyo du Amona ni nga bazogo bakporo, na koyo du Yoasa ni nga wiri bakindo;

26ki ya, ‘Ya bakindo wẽ, Oni mói gi boro re ku bambukisa yo, ki nirigi ko na gu kpokuta nga ga rungosi na gu ime nga ga rungosi, daho mi ka yega ni zezeredi.’ ”

27Mikaya ki ya, “Ka mo yega zezeredi, si ngia Yekova agumba nga pai ku ngbare te.” Ko ki ya a, “Aboro gí he, wa du oni dunduko!”

28Si du bakindo aYisaraere andu ti ni na Yosafata bakindo aYudo ku Ramotagirada yo.

29Bakindo aYisaraere ki ya fu Yosafata, “Mi abírika tire ki ndu sa vura, ono mo úkadi tiro na gamo aroko bakindo.” Si du bakindo aYisaraere ki biriki tiko; i ki ndu sa vura.

30Were bakindo aSurio arugu gako abarutiri angbagidavura, ki ya, “Ka oni só nga vura na umba boro watadu bakere boro a ya, kpara kina bakindo aYisaraere sa.”

31Si adu wa gere, ho abarutiri angbagidavura abi Yosafata ni, i ki ya, “Ndikidi bakindo aYisaraere du re.” I asa tiyo fuo ko ka so vura kuti ko; ono Yosafata apoi ku ari, Yekova ki unda ko. Mbori ki wo ti yo i guari pati ko,

32si adu wa gere, ho, abarutiri angbagidavura aini he ni ya bakindo aYisaraere nga ko te, i ki karaga tiyo ngba fuo ko.

33Ono gu boro ki gbe gani mboto ki ba ha ni baringbangba gbua, ki no bakindo aYisaraere dagba ngbazunga ũvura na marãngbaduse; si du bakindo aya ti ni fu barugu gako ngbagidavura, “Mo sá tiro, ki tindi re ku sa yo dagba rimbasa, bambiko mi hõ ahõ ni kere he.”

34Vura ki moi pai ni gu uru re, ono bakindo aYisaraere ki songodi tiko rogo gako ngbagidavura nibi aSurio ki da ku nyemu; ho uru ati ni ko ki kpi.

← Chapter 17 Jump to: Chapter 19 →