2 Chronicles 30

Zande

← Chapter 29 Jump to: Chapter 31 →

1Izikiya ki kedi pai be asunge fu aYisaraere dunduko na fu aYudo, ki ke awaraga fu aEfuraima a na aManase, ya i ye ku rogo ga Yekova bambu du Yerusarema yo, ka manga pumbo susiri fu Yekova nga ga aYisaraere Mbori.

2Bambiko bakindo arugu pai na gako abazogo na gu gbuu nadu Yerusarema yo, ka manga pumbo susiri rogo ue diwi―

3bambiko i arengba nga ka manga ha ti ndikidi rago ho te, bambiko aboromotumo akpara nga tiyo ni dungu yo narengbe te, ka aboro ata dungura nga tiyo ku Yerusarema yo a ya―

4gu pai re ki ru aru bangiri bakindo na gbuu dunduko.

5Si du i ki rugu gu pai re ki taki pande he dagba aYisaraere dunduko, tona Bera-saba yo ki da kina ku Dana yo, ya aboro ye ka manga pumbo susiri fu Yekova nga ga aYisaraere Mbori, ku Yerusarema yo; bambiko i amanga nga ha ni dungu yo wa gu i aringbisi he te.

6Si du abandu na awaraga ki ndu na agu awaraga re be bakindo na gako abazogo, fu aYisaraere dunduko na aYudo, kuti sangba bakindo. I ki ya, “Ako awiri aYisaraere, oni sá tironi berewe fu Yekova, nga ga Abarayama Mbori, nga ga Yisaka, nga ga Yisaraere ko, ya ko karaga tiko berewe fuo gu yangara roni dagba roni nabati be abakindo aAsuro.

7Ka oni dú nga wa abaroni na wa awirinaroni ya, nati ndika kuti Yekova, nga ga abayo Mbori, si du ko ki mbu yo i du ni aũkiga, wa oni abi he re.

8Ka oni dú nga ni airanyakari wa abaroni adu ya. Ono oni fú tironi ku be Yekova, ki nirimi ku rogo gako Kparakpara ba, nga gu ko akpara ha nye anye kindi, oni ki nimangi pa Yekova gaoni Mbori, gako ngariangaria zinga aria tihe ku sa yo ti roni.

9Bambiko ka oni sá tironi berewe fu Yekova, awirinaroni na awironi abí nunga ti agu yo zi yo yo ni zizi yo, i ki yega berewe ku rogo gi ringara re. Bambiko Yekova gaoni Mbori du na weneringise na inapai, ko asá nga kpakpuko ti roni ku sa yo te, ka oni karaga tironi fuo ko.”

10Si du abandu na awaraga andu ti ni ki tangara abaakporo dunduko ku rogo ringara Efuraima na ga Manase, ki da ku Zeburuna yo. Ono aboro amama yo ni uma yo, ki nisawia yo a.

11Wa si avura du wo, bete agu yo dagba ngbatunga Asera, na ga Manase yo, na ga Zeburuna yo i aumbasi tiyo, ki ye ku Yerusarema yo.

12Be Mbori adu ku ri aYudo ka kpamia kpotoyo yo wa sa, i mangi sangba bakindo na sangba abazogo ni gu pai rugu Yekova.

13Badungu aboro ki dungura tiyo ku Yerusarema yo ka manga pumbo gu kpokuta adu nga na agbooro ti ni ya rogo ue diwi, babakere gbuu ki du.

14I ki guari ka roga agu abamotumo ku sa yo naadu Yerusarema yo, na agu abamotumo dundu ko naadu tipa zo fuõngua, i arogo ho ku sa yo a dũ, ki bafu he ku ngboongboo Kidirona yo.

15I ki imi wiri kandoro nga ga pumbo susiri ru ti 14 rame nga ga ue diwi. Aboromotumo na aRevi adu na zee, ki kpara tiyo, ki ye na zozo amotumo ku rogo ga Yekova bambu yo.

16I ki ru ku ba yo yo wa gayo ringbisiringbisi pai adu kuti sangba ga Mose rugute nangia ga Mbori kumba. Aboromotumo ki migidi kure nga gu i adi be aRevi.

17Bambiko dungu aboro adu rogo gbuu yo naakpara nga tiyo ya; si du si adu be aRevi ti ni ka imo awiri akandoro pumbo susiri tipa aboro ni ba sa sa, nga agu yo naadu nga ni gigiri yo ya, ka sa ha ziazia fu Yekova.

18Mbiko bakere rimbasa aboro nga ga Efuraima yo, na ga Manase yo, na ga Yisasakara yo, na ga Zeburuna yo, agirisa nga tiyo te, ono i ari pumbo susiri ka i amanga nga pa ha wa du he ni ringbisiringbisi he ya. Bambiko Izikiya akpari tipa yo, ki ya, “Yekova du ni wene ko, ko vú yo ni ba sa sa

19nga agu yo naruga kpotoyo yo ka gbata Mbori, nga Yekova nga ga abayo Mbori, ka i avura du nga ni girisigirisi yo kuti pa gu girisatise nga ga ziazia ba ya.”

20Yekova ki gi fugo Izikiya, ki husi aboro.

21Agu awiri aYisaraere nadu Yerusarema yo ki mangi gu kpokuta adu na agbooro ti ni ya rame ki du saba na bakere ngbarago. ARevi na aboromotumo ki nitambua Yekova na auru na auru, nibi bia fu Yekova ni ome na aũworo ahe.

22Izikiya ki gumba pai ni pa wasa fu aRevi dunduko naadu ni abangbasia rogo ga Yekova mangapai yo. Si du aboro ki niri riahe nga ga pumbo rame ki du saba, ki nitumo ni amotumo nga ga zereda ki nifu atambuahe fu Yekova nga ga abayo Mbori.

23Gbuu dunduko ki idi wa sa ka amanga pumbo rame ki du saba berewe. Si du i du i amangi he tipa kura rame berewe saba na ngbarago.

24Bambiko Izikiya bakindo aYudo afu abaabagara fu gbuu tipa amotumo 1,000 na akandoro 7,000, abazogo ki fu abaabagara fu gbuu 1,000, na akandoro 10,000. Aboromotumo ki kpara tiyo ni badungu yo.

25Gu gbuu nga ga aYudo dunduko ki ningi angi, na aboromotumo na aRevi na gu gbuu naye ringara aYisaraere yo dunduko, na gu kungba aboro naye rogo ringara aYisaraere naaraki Yuda yo a.

26Si du bakere ngbarago adu Yerusarema yo, bambiko fuo rago Soromo nangia wiri Dawidi bakindo aYisaraere pai adu nga wa gure Yerusarema yo te.

27Aboromotumo ki ru ku ari na aRevi ka fu maku fu aboro. Mbori ki gi fugoyo, gayo kpe ki da rogo gako kparakpara ziazia baraka du ngbangbaturũ yo.

← Chapter 29 Jump to: Chapter 31 →