2 Chronicles 35

Zande

← Chapter 34 Jump to: Chapter 36 →

1Yosiya ki mangi pumbo susiri fu Yekova Yerusarema yo; i ki imi wiri kandoro tipa pumbo susiri ti 14 rame ti bambata diwi.

2Ko ki ringbisi aboromotumo na gayo asunge ki ningarãsi yo tipa manga pa ga Yekova bambu.

3Ko ki ya fu aRevi naadu ni kparakpara yo ziazia fu Yekova, nga agu yo nayugu pai fu aYisaraere dunduko, “Oni mói ga Yekova ziazia sanduki ku rogo gu bambu Soromo wiri Dawidi, bakindo aYisaraere adua ha. Oni atínda nga ha berewe ni tindiro pagoroni te. Oni mángi pa Yekova gaoni Mbori awere na pa gako aboro nga aYisaraere.

4Oni mbákadi tironi ni arikaroni wa angbatunga abaroni adu, ku sangba gu pai Dawidi ake nangia bakindo aYisaraere, na kuti gu keke apai Soromo ake nangia wiriko.

5Oni ru rogo kparakpara ziazia ba yo wa du pa kparakakparaka roni ni angbatunga abaroni dagba awirinaroni nangia awiri aboro, rengbe na gu kparaka nga ga angbatunga atita aRevi ni ba sa sa.

6Oni ki imi wiri kandoro nga ga pumbo susiri ru, ki kpara tironi ziazia, ki mbakadi pai tipa awirinaroni, ka amanga pai ku sangba Yekova yo ku ngba Mose.”

7Yosiya ki fu anya fu aboro, dagba rimbasa anya nga wiri akandoro na wiri ameme ami dunduko tipa amotumo pumbo susiri, tipa agu yo nadu ho dunduko, gedigedi ra adu wa 30,000, na abaabagara 3,000; agi ra re adu ni ndikidi ga bakindo ra.

8Ono gako abazogo afu gamahe zaza ni nyemuhe fu aboro, fu aboromotumo, na fu aRevi a. Erikiya, na Zekaraya, na Yiere, nangia abazogo pa ga Mbori bambu, i afu wiri akandoro na wiri ameme fu aboromotumo tipa amotumo pumbo susiri wa 2,600 na abaabagara wa 300.

9Konania a, na Semaya na Natanere na awirinako, na Asabeya na Yiere na Yozabada, nangia abaakumba aRevi i ki fu wiri akandoro na wiri ameme fu aRevi tipa amotumo pumbo susiri wa 5,000 na abaabagara 500.

10Si du ho i ambakadi pa gu mangapai ni re, aboromotumo ki rundu rogo gayo aba, na aRevi ngba rikayo ku sangba ga bakindo rugute yo.

11I ki imi awiri akandoro pumbo susiri, aboromotumo ki nimigidi gu kure i adi he be aRevi ho i ayuku ra ni.

12I ki kpara zozo amotumo ku bani ka fu he wa kparakakparaka angbatunga abayo adu dagba awiri aboro, i fu he fu Yekova, wa du he ni keke he rogo ga Mose kitabu. Kina wo i amangi na abaabagara a.

13I ki pasi awiri akandoro pumbo susiri apasa ngba we wa du he rogo pa rugapai yo; na gu kparakakparaka ziazia amotumo i apasi he pere yo, na rogo aakoro, na rogo asaani, ki nindu na ni ni ipo fu awiri aboro dunduko.

14I ki mbakadi he tipa tiyo giza, na tipa aboromotumo bambiko aboromotumo nangia awiri Arona adu fuo yo na pa sunge zozo amotumo na pa nzeme ki da ku yuru. Si du aRevi ambakadi he ti ni tipa yo na tipa aboromotumo nangia awiri Arona.

15Abayango nangia awiri Asafa adu kina ku ba yo ku sangba ga Dawidi rugute yo, na Asafa, na Emana, na Yedutuna nangia ga bakindo babiapai. Ababanda angbadimo ki du pati angbadimo ni ba sa sa; ka i aguari nga pati gayo mangapai ya, bambiko awirinayo nangia aRevi ambakadi he tipa yo.

16Si du gu mangapai dunduko nga ga Yekova i ambakadi he kina rogo gu uru re, ka ka kuti manga pumbo susiri na ka fu zozo amotumo ri ga Yekova bamotumo, kuti ga Bakindo Yosiya rugute.

17Agu awiri aYisaraere nadu ho ni gu rago re i ki ka kuti manga pumbo susiri, na pumbo gu kpokuta adu nga na agbooro ti ni ya rame ki du saba.

18I amanga nga pumbo susiri wa gure mbata dagba aYisaraere fuo rago Samuere nangia nebi wa sa te; a nga gu bakindo aYisaraere ho sa namangi ngbatunga pumbo susiri wa gu Yosiya amangi he te re, na aboromotumo na aRevi, na agu aboro Yuda dunduko na agu aYisaraere nadu ho, na araki Yerusarema yo a te.

19I amangi gu pumbo susiri re ti gu 18 garã zogarago nangia ga Yosiya.

20Fuo agi apai dunduko re, ho Yosiya anyasi mbakada yekaru ni, Neko nangia bakindo aEzipeto ki kuru ka so vura kuti bakporo Karekimisa pavuru gu di nga Ferata, Yosiya ki ndu kuti ko.

21Ono Neko akedi asunge koyo du ko ni, ki ya, “Sa gaani na mo, mo bakindo aYudo? Mi aye nga sa ro ni gi uru te re, ono kuti kina gu kporo moi mi vura kuti ni. Ono Mbori rugu re mi ipisi tire. Mo mbú pa tikango na Mbori, nga gu ko du na mi, ka ko gbarasi ro.”

22Wa si avura du wo, Yosiya adia nga bangiriko yo du ko ni te, ono ko ki biriki tiko ka so vura kuti ko. Ka ko adega nga tuko sa agu apai Neko agumba nga gu naye ngba Mbori yo ya, ono ko ki ndu ka so vura rogo gu ngboongboorago du Megido yo.

23Abaaguanza ki no bakindo Yosiya; bakindo ki ya fu gako amoyambu, “Oni ga na mi ku sa yo, bambiko mi hõ ahõ ni kere he.”

24Si du gako amoyambu ki kusi ko ngbagidavura yo ki moi ko ku rogo gu ue ngbagidavura nadu be ko ki ye na ko ku Yerusarema yo. Ko ki kpi yo, i ki kpisidi ko ku rogo ga atitako murã yo. Aboro Yuda na aboro Yerusarema dunduko ki kpari Yosiya.

25Yeremaya ki kpari kpe tipa Yosiya a; ababibia dunduko na anabibia ki nigumba pa Yosiya rogo gayo abiakpe daku areme. I aringbisi agu abiakpe re ni rugapai Yisaraere yo; mo ngére, si ni keke he rogo Kitabu Abiakpe yo.

26Were pa kura ga Yosiya apai, na pa gako weneringise ku sangba gu du ni keke he rogo ga Yekova rugute yo,

27na gako mangaapai, bambata ha na yangara ha, mo ngere, si ni keke he rogo gu Kitabu Peka pa Abakindo aYisaraere na aYudo.

← Chapter 34 Jump to: Chapter 36 →