2 Chronicles 16

Zande

← Chapter 15 Jump to: Chapter 17 →

1Ti gu 36 garã zogarago nga ga Asa, Basa bakindo aYisaraere ki ndu ka so vura kuti Yuda, ki dua Rama, ya ka boro kuru nga watadu rima ka ndu koyo du Asa ni nangia bakindo aYudo ya.

2Asa ki kusi feda na dahabu dagba gu kikiipaahe naadu rogo ga Yekova bambu na rogo ga bakindo bambu yo, ki kedi he fu Benadada bakindo aSurio, naaraka Damaseke yo, ki ya,

3“Mozunga dú dagba rani na mo, a wa si adu dagba buba na bamo; mo ngére, mi kedi feda na dahabu foro; mo ndú, ki mbu gu ga mozunga du dagba roni na Basa bakindo aYisaraere, ko guari ti re.”

4Benadada ki gi sangba Bakindo Asa, ki kedi abarutiri gako rimbasaavura kuti ga aYisaraere abaakporo, ki mangi Iyona, na Dana, na Abere-maima, na abaakporo baigaahe dunduko ringara Nafatari yo.

5Si adu wa gere, ho Basa agi he ni, ko ki mbu dua Rama, ki mbu gako sunge.

6Bakindo Asa ki rogo aYudo dunduko, i ki tindi agu ambia nadu Rama yo, na gu ngua nangia gaha, nga gu Basa adua bambu na ni, ko ki dua Geba na ni na Misipa.

7Ti gu rago re Anani nangia babiapai aye koyo du Asa ni nangia bakindo aYudo, ki ya fu ko, “Bambiko mo kida kuti bakindo aSurio, ka mo akida nga kuti Yekova ga Mbori ya, si du du gu rimbasa aborovura ti ni nga ga bakindo aSurio ni merẽmeré yo be ro.

8Gu rimbasa aborovura nangia ga Etiopia yo na aRibia adu nga ni babakere he, te? na angbagidavura na abanduri afarasi ni dungu yo ki susi, te? Ono wa mo akida kuti Yekova, ko afu yo ku be ro.

9Bambiko bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni. Mo amangi pai ti gere ni mumungo ho; si du mo adu na avura kindi tona awere na ku mbata yo a.”

10Asa ki du na zinga fu babiapai, ki ba ko ku bambukisa yo, bambiko ko adu na bakere erã fu ko tipa gi pai re. Asa ki rungosi bete aboro ni gu rago re.

11Agu mangaapai nga ga Asa, bambata ha na yangara ha, si ni keke he rogo gu Kitabu Peka pa Abakindo aYudo na aYisaraere.

12Ti gu 39 garã zogarago nga ga Asa, kaza azi nduko, gako kaza adu ni bakere he ki susi; ono ko agbata nga Yekova rago gako kaza te, ono ko anandu kina koyo au abinza ni.

13Asa ki kpi fuo atitako, rogo gako garã zogarago 41.

14I ki kpisidi ko kina rogo gako murã ko age tipa ko rogo gu bakporo nga ga Dawidi. I ki pigi kangbako auru gu raga nahi ahi be wene fuõahe na rika angbatunga ahe nga gu abangbasia angua amangi ni tatamana. I ki zo bakere fuõahe gbe tipa irisa ko.

← Chapter 15 Jump to: Chapter 17 →