2 Chronicles 21

Zande

← Chapter 20 Jump to: Chapter 22 →

1Yosafata ki kpi fuo atitako, i ki kpisidi ko fuo atitako rogo ga Dawidi bakporo; Yorama nangia wiriko ki zogo rago ku ba ko.

2Ko adu na awiribako, nangia awiri Yosafata: nga Azaraya, Yiere, Zekaraya, Azaraya, Mikaere, na Sefataya; agi yo re dunduko nangia awiri Yosafata bakindo aYudo.

3Bayo ki fu bakere gamahe fu yo, nga feda, na dahabu, na kikiipaahe, na abaakporo ngapa Yuda yo; ono ko afu ngbi fu Yorama, bambiko ko nangia bambata vungu.

4Ho Yorama adu ni ku ri ga bako ngbi, ki nyakasi tiko, ko ki imi awiribako dunduko ni basape, na agu yo dagba abazogo aYudo a.

5Garã Yorama adu 32 ho ko atona zoga rago ni, ko ki zogo rago Yerusarema yo garã ki du muambi.

6Ko ki nipeke kina agu apai nangia ga abakindo aYisaraere, a wa ngbatunga Aba amangi he; bambiko ko adi wiri Aba ni diako. Ko ki nimangi gu pai nadu ni gbigbita ha bangiri Yekova.

7Ono Yekova akpi nga nyemu ka gbarasa ngbatunga Dawidi te, bambiko gu zungahe ko azunga In Dawidi, wa ko akiao he ka fu imarago fu ko na fu atitako nye anye kindi.

8Ti rago Yorama aEdome asa mungu ti du ku tii be aYudo, i ki moi gayo bakindo ni tiyo ku ri yo.

9Yorama ki susi na gako abazogo, na gako angbagidavura dunduko na ko, Ko ki guari yuru ki mangi agu aEdome naaru nguru pati ko kirikiri, na pati agu abarutirivura nga ga angbagidavura yo.

10Si du aEdome asa mungu ti ni ti du ku tii be aYudo daku areme. Ribina ki sa mungu a ti du ku tii be ko ti kina gu rago re, bambiiko ambu Yekova, ga atitako Mbori.

11Ku ri agi apai re Yorama ki dudua tumbatumba arago rogo ringara abaagangara Yuda, ki ingisi agu aboro nanaraka Yerusarema yo i mangi pai ni sino pa bari, ki niingisi aYudo a.

12Kekepai ki ye yo du Eriya ni nangia nebi, niya, “Ya Yekova wẽ, nga ga Dawidi Mbori nga titaro, ‘Bambiko mo apeka nga sino bamo nangia Yosafata te, na ga Asa sino nangia bakindo aYudo a te,

13ono mo apeke kina sino agu apai nangia ga abakindo aYisaraere, Ki ingisi aboro Yuda na agu aboro nanaraka Yerusarema yo i mangi pai ni sino pa bari, a wa ngbatunga Aba aingisi aYisaraere i mangi pai ni sino pa bari. Mo imi awiribamo a, nga ngbatunga bamo, nangbaki ki susi ro.

14Mo ngére, Yekova ambúsa gamo aboro na bakere gberãngbi, na awiro, na adiaro, na gamo ahe dunduko,

15mo ni tiro adú na bakere kaza rogo rero yo, daho rero ka tiwa atiwa ni be gu kaza nikamanga ro re.’ ”

16Yekova ki zingisi ngbadu aFereseto yo kuti Yorama na aboro Araba nga agu yo nadu mbembedi na aEtiopia.

17I ki ye kuti Yuda, ki rimi koyo, ki tindi agu ahe ku sa yo i abi rogo ga bakindo bambu yo dunduko, na agu awiriko nga akumba na adiako a, ka i ambu nga kumbagude fu ko kina sa ya, kpara kina Yoaza nangia kiaro.

18Fuo agi apai re dunduko Yekova ki fu kaza ree fu ko nga gu ka u nga ya.

19Si ki ta du wa gere wa rago andu ti digida garã ue, reko ki tiwi atiwa be gako kaza dunduko, ko ki kpi be kere ima. Ka gako aboro azo nga he tipa kangbako wa gu he i azo tipa bako, ya.

20Garãko adu 32 ho ko atona zoga rago ni, ko ki zogo rago Yerusarema yo garã ki du muambi; ko ki kpi zanga aboro kpari ko. I ki kpisidi ko rogo ga Dawidi bakporo, ono rogo ga abakindo murã yo te.

← Chapter 20 Jump to: Chapter 22 →