2 Chronicles 28

Zande

← Chapter 27 Jump to: Chapter 29 →

1Garã Aza adu 20 ho ko atona zoga rago ni, ko azogo rago Yerusarema yo tipa garã 16. Ko amanga nga gu pai naru aru bangiri Yekova, wa Dawidi nangia titako anamanga te.

2Ono ko apeke fuo kina agu apai nangia ga abakindo aYisaraere. Ko ki mbakadi zaragasizaragasi kpiahe tipa aBara;

3ko ki nizo fuõngua a rogo gu ngboongboorago nga ga wiri Inomi, ki zo awiriko ni motumo ku we yo, ni gu kere gbegberẽ sino nangia ga arikaaboro nga agu yo Yekova ado yo ku sa yo barangba awiri aYisaraere.

4Ko ki ta tumo nizo fuõngua ri tumbatumba arago, na ri agangara, na tii agu angua dunduko du na fogo kpehe.

5Si du Yekova gako Mbori afu ko ti ni ku be bakindo aSurio, i ki mangi ko ki ga na rimbasa gako aboro ni zizi yo ki ye na yo ku Damaseke yo. I ki fu ko a ku be bakindo aYisaraere, naamangi ko ni bakere imo aboro.

6Bambiko Peka wiri Remaraya aimi aboro Yuda yo wa 120,000 rogo uru sa, i nangia eerẽ aboro dunduko, bambiko wa i ambu Yekova, nga ga abayo Mbori.

7Zikiri nangia iranyaka ni boro Efuraima ki imi Mesaya wiri bakindo, na Azurikana bazogo aborokporo, na Erikana naadu ni bambata boro fuo bakindo.

8Awiri aYisaraere ki ga na zizi awirinayo wa 200,000, nga ade, na awiriyo nga akumbagude, na awiriyo nga adegude; i ki rogo badungu gbugbu ahe be yo ki yega na gu gbugbu ahe re ku Somorona yo.

9Ono ga Yekova nebi adu yo, rimoko angia Odede. Ko akuru ka ndu ka gbia gu rimbasa aborovura naye ku Somorona yo, ki ya fu yo, “Oni ngére, bambiko Yekova, nga ga abaroni Mbori adu na zinga kuti Yuda, si du ko afu yo ti ni ku be roni. Ono oni aimi yo rogo bakere zinga nga gu da ku ngbangbaturũ yo.

10Awere oni naberã pa zia aboro Yuda na Yerusarema fu roni ni akanga nga akumba, na akanga nga ade. Ono a nga tiandika ho nga gaoni dagba roni na Yekova gaoni Mbori, te?

11Awere oni gí pai ngbare, oni káraga gu zizi yo re, nga agu yo oni azi yo ni zizi yo dagba awirinaroni yo, bambiko gu ngariangaria zinga nga ga Yekova du ri roni.”

12Agu yo dagba abarukuri awiri Efuraima ki ru nangia Azaraya nangia wiri Yoanana, na Berekaya wiri Mesiremata, na Yizikiya wiri Saruma, na Amosa wiri Adarai, i ki zingi kuti agu yo naaye ti ngba vura yo.

13I ki ya fu yo, “Oni ayé nga na zizi aboro kono te, bambiko oni aberẽ pa manga gu pai nikaye na pa tiandika ku ri rani bangiri Yekova, ka kiisa pa gaani ingaapai na gaani tiandika. Ba mbiko gaani tiandika du ni bakere he, bakere ngariangaria zinga du a kuti aYisaraere.”

14Si du aborosovura ki mbu gu zizi yo na gu gbugbu ahe ku bangiri abazogo na gbuu dunduko.

15Agu akumba yambu yo rimoyo i ki mo ku ari ki rogo gu zizi yo, ki ukadi agu yo dunduko naadu ni kundiri yo dagba yo na gbugbu aroko; i ki ukadi yo, ki moi katara ku nduyo yo, ki fu riahe fu yo na mbirimbiri he a, ki mbedi yo ni nzeme. I ki tindi gu rurungbura yo auru anadongi, ki ye na yo dunduko fu agumeyo ku Yereo yo, gu bakporo nga ga mbiro. I ki karaga tiyo ku Somorona yo.

16Ti gu rago re Bakindo Aza akedi sunge koyo du bakindo aAsuro ni i unda ko.

17Bambiko aEdome aye berewe ki mangi aYudo, ki ga na agu yo ni zizi yo.

18AFereseto ki ye ki zuba abaakporo a du ngboongboorago yo, na gu nangia Yuda ku Negebe yo, ki di Bete-semese, na Ayarona, na Gederote, na Soko na gaha akporo, na Timena na gaha akporo, Gimezo a na gaha akporo; i ki niraki yo tigayo.

19Bambiko Yekova aumbasi pa Yuda bambiko ga Aza bakindo aYisaraere pai, bambiko ko amangi wasiwasi pai Yuda yo, ki ti andika ni kere he kuti Yekova.

20Si du Tirigatapirenesera bakindo aAsuro ki ye koyo du ko ni, ki mangi ko ka ko anyakasa nga ko ya.

21Bambiko Aza arogo bete agu ahe naadu rogo ga Yekova bambu na rogo ga bakindo bambu na rogo ga abazogo bambu yo a, ki fu he ni rũhe fu bakindo aAsuro; ka si aunda nga ko a ya.

22Ti rago gako fudifudiapai ko ati ndika ki susi kuti Yekova ― nga kina gu Bakindo Aza re.

23Bambiko ko atumo fu agu ambori nga ga Damaseke naamangi ko. Ko aya, “Bambiko wa agu ambori nga ga abakindo aSurio aunda yo, si du mi nikatumo fu he, ya si unda re a.” Ono si adu ni ũgbarasa ko, na aYisaraere dunduko a.

24Aza ki dungura agu aũsunge nangia ga ga Mbori bambu ki yepe aũsunge mbusumbusu nangia ga ga Mbori bambu, ki kisi angbadimo ga Yekova bambu. Ko ki mbakadi abamotumo ni gako ti atukpu Yerusarema dunduko.

25Ko ki mbakadi tumbatumba arago rogo dungu abaakporo Yuda yo ka azo fuõngua ri he fu kura ambori, ki gara ga Yekova zinga ku ri ko, nangia ga abako Mbori.

26Were pa kura gako apai, na gako mangaapai dunduko, bambata ha na yangara ha, mo ngére, si ni keke he rogo gu Kitabu Peka pa Abakindo aYudo na aYisaraere.

27Aza ki kpi fuo atitako, i ki kpisidi ko bakporo yo, kina Yerusarema yo, bambiko i aye nga na kangbako ku rogo amurã abakindo aYisaraere yo te. Izikiya nangia wiriko ki zogo rago ku ba ko.

← Chapter 27 Jump to: Chapter 29 →