2 Chronicles 32

Zande

← Chapter 31 Jump to: Chapter 33 →

1Fuo agi apai re na fuo gu yososo mangapai re, Saneriba bakindo aAsuro ki ye ki rimi ku Yuda yo ki zi abataya kuti agu abaakporo ngapa, ki niberẽ pa dia ha ni gako.

2Ho Izikiya abi he ni ya Saneriba ima ye nibere pa so vura kuti Yerusarema,

3ko ki rugu pai na gako abazogo na gako airanyaka tipa kisa ime agugaabi naadu zegi gii bakporo yo; i ki unda ko.

4Si du dungu aboro adu yo naadungura tiyo, i ki kisi agugaabi dunduko, na gu wiridi nafu bebere ringara, ki ya, “Tipagine ka abakindo aAsuro ye ti ni kono ki bi bakere ime ho?”

5Izikiya ki ngarãsi tiko, ki dua gu ngapa bakporo dunduko nakua ku sande ki dua kirikiri gbata kuti ni, na gu kura ngapa bakporo gii he yo a. Ko ki nyakasi Miro rogo gu bakporo nga ga Dawidi. Ko ki mangi aũvura a na avurakube ni dungu he.

6Ko ki ringbisi abarutirivura nga ga sovura yo ku ri aboro, ki dungura yo koyo du ko ni ku rogo gu barago nadu pa ngbadimo bakporo ki gumba pai fu yo ni pa wasa, ki ya,

7“Oni dú nyanyaki ki ngarã angarã. Ka oni gúnde nga ya, ka oni yúngura nga be bakindo aAsuro a ya, na tipa gu bakere rimbasa du na ko dunduko a ya; bambiko bakere rimbasa du na ani susi gu du na ko.

8Rikavura nga ga be borose du na ko; ono Yekova du na ani ka unda rani nga gaani Mbori, ka so gaani vura fu rani a.” Aboro ki songodi tiyo ku be gu pai nga ga Izikiya bakindo aYudo.

9Fuo gere Saneriba bakindo aAsuro ki kedi avuruko ku Yerusarema yo, koyo du Izikiya bakindo aYudo ni, na agu aboro Yuda dunduko nga agu yo nadu Yerusarema yo. Ono ko tigako aru nguru kuti Rakisa na gako rikavura na ko dunduko. I ki ya,

10“Ya Saneriba bakindo aAsuro wé, ‘Oni nakida kuti da, nye oni ti ni ni zizi roni ku Yerusarema yo?

11A nga Izikiya nazomia roni te, ka fu roni oni kpiki be ngbongi na gomoro ime, wa ya ko. “Yekova gaani Mbori nikabatasa rani be bakindo aAsuro”?

12A nga ko du re nga Izikiya naagbataka gako tumbatumba rago ku sa yo na abamotumo, te? ki ya fu Yuda na fu Yerusarema. “Oni afú irisa barangba kina gi bamotumo re, ku ri he oni ka zo gaoni amotumo ni a.”

13Oni aina nga gu pai ani anamanga na atitare fu aboro kura aringara te? Agu ambori nga ga gu arikaaboro nga ga gu aringara re arengbe ka batasa gayo ringara be re?

14Gini ambori dagba agu ambori dunduko nga ga agu arikaaboro re nga agu yo atitare agbarasi yo kpakaya naarengbe ka batasa gayo aboro be re, ka gaoni Mbori batasi roni be re?

15Si du ka oni ídi nga ha fu Izikiya ko nángi roni ya, ka ko zomia nga roni na gi pai re a ya, ka oni ídi nga gu pai gumba ko a ya, bambiko a nga ga gu rikaaboro mbori watadu ngbi arengbe ka batasa gaha aboro be re te, watadu be atitare a te. Waĩ ka kina gaoni Mbori batasi roni be re?’ ”

16Avuruko ki nigumba pai kindi kuti Gbia MBORI na kuti gako moyambu nga Izikiya.

17Ko ki ke awaraga a ka gberã ngbako yo fu Yekova nga ga aYisaraere Mbori, ka gumba pai kuti ko, ki ya, “Wa ga agu arikaaboro ambori nga ga agu aringara abátasa nga gayo aboro be re, ya, kina wo ga Izikiya Mbori abatasa nga gako aboro be re te.”

18I ki poi ku ari ni wawa rogo pa aYudo yo fu aboro Yerusarema nadu ri vuro ngapa bakporo, ka gundesi yo na ka fuda yo, ya i di bakporo be yo.

19I ki gumba pa gu Mbori nga ga Yerusarema ko wa pa agu ambori nga ga aboro kpotosende, nangia ũsunge be aboro.

20Izikiya nangia bakindo na Yesaya nangia nebi, nangia wiri Amosa, ki kpari tipa gi pai re, ki poi ku ari fu ngbangbaturũ.

21Yekova ki kedi maraika nabafu airanyaka nga ngangarã aboro dunduko ku sa yo na abarumbatayo na abarutirivura rogo ga bakindo aAsuro bataya. Si du ko ki karaga tiko na zee ti kpakpuko ku rogo gako ringara. Ho ko ada ni ku rogo ga gako mbori bambu yo, kina agu yo nangia ndikidi awiriko ki imi ko ni basape.

22Si du Yekova ki batasi Izikiya na agu aboro nanaraka Yerusarema yo be Saneriba bakindo aAsuro, na be avurako dunduko; ki fu zereda fu yo rogo arago dunduko.

23Dungu aboro ki niye na gamahe fu Yekova ku Yerusarema yo na kikiipaahe fu Izikiya bakindo aYudo, si du ko ki du ni kiisikiisi pa ko ku bangiri arikaaboro dunduko ku mbata yo kindi.

24Ti agu arago re Izikiya adu na kaza naandu sa kina kpio, ko ki kpari fu Yekova; Yekova ki karaga pai fu ko, ki fu yuguyugupai fu ko.

25Ono Izikiya amanga nga wenepai berewe wa Yekova amangi wenepai fu ko te, bambiko kpotoko yo adu na abiatise. Si du zinga ki ye ku ri ko na ku ri Yuda na Yerusarema a.

26Ono Izikiya aumbasi tiko tipa gu abiatise nadu kpotoko yo, ko na agu yo nanaraka Yerusarema yo, si du ga Yekova zinga aye nga ti ni ku ri yo, ti rago Izikiya ya.

27Izikiya adu na ũkumuko be ko ki susi na irisa; ko ki mbakadi abambu igaahe tipa feda, na tipa dahabu, na tipa kikiipa ambia, na tipa wene fuõngua, na tipa avurakube, na tipa angbatunga wene aũsunge dũ.

28Ko ki mbakadi bambu igaahe a tipa zende ahe, na imekakue, na nzeme; na bambu tipa ngbatunga zogozogo anya dũ, na tma rimbasa akandoro.

29Ku ri agi apai re, ko adudua abaakporo tipa ko, ki du na rimbasa akandoro na rimbasa zogozogo anya ni dungu ra kpaima; bambiko Mbori afu ahe fu ko ni bakere he gbe.

30Gi Izikiya re nga gu ko nakisi agu agugaabi nadu ku ngbi yo nga Giona ki rugu genehe ime ki ye rogo ho ku rogo ga Dawidi bakporo pavuru rago ku dioyo. Izikiya ki u rogo gako sunge dunduko.

31Ono rogo gu pai nga ga abakusi gumbapai nga ga abazogo nga ga Babera yo i akedi yo koyo du ko ni ka sana ko tipa gu iiriwo yuguyugupai namangi rogo ringara, Mbori ambu ko ka asada ko, ka ina agu apai dunduko nadu kpotoko yo.

32Were pa kura ga Izikiya apai, na pa gako weneringise, mo ngére, si ni keke he rogo gu yuguyugupai nga ga Yesaya nangia wiri Amosa, nangia nebi rogo gu Kitabu nga ga pa Abakindo aYudo na aYisaraere.

33Izikiya ki kpi fuo atitako, i ki kpisidi ko rogo gu murã ku ngbi yo nga ga awiri Dawidi; aYudo dunduko airisi ko rago kpio ko gbe na araki Yerusarema yo a. Manase nangia wiriko ki zogo rago ku ba ko.

← Chapter 31 Jump to: Chapter 33 →