2 Chronicles 11

Zande

← Chapter 10 Jump to: Chapter 12 →

1Ho Rabama ada ni ku Yerusarema yo, ko ki dungura ngbatunga Yuda, na ngbatunga Benyamina, nangia siasia akumba wa 180,000 nadu ni aborosovura, i so vura kuti aYisaraere, ka karaga ngbi berewe fu Rabama.

2Ono sangba Yekova ki ye koyo du Semaya ni nangia ga Mbori kumba ki ya;

3“Mo gúmba pai fu Rabama nga wiri Soromo nga bakindo aYudo, na fu aYisaraere dunduko du Yuda yo na fu agu yo du ku Benyamina yo a, ki ya,

4‘Ya Yekova wẽ, Ka oni ndú nga ya, ka oni só nga vura kuti awirinaroni a ya. Oni káraga tironi dunduko ku kpuroni yo, bambiko gi pai re ye he be re.’ ” Si du i agi sangba Yekova ti ni, ki karaga tiyo berewe, ka i andu nga na vura kuti Yerobama ya.

5Rabama ki niraki Yerusarema yo, ki dudua abaakporo tipa nyakasa bandatise Yuda yo.

6Ko ki dua Betereme, na Etama, na Tekua,

7na Bete-zura, na Soko, na Adurama,

8na Gata, na Maresa, na Zifi,

9na Adoraima, na Rakisa, na Azeka,

10na Zora, na Ayorana, na Eburone, nga gu naadu Yuda yo na Benyamina yo a ni abaakporo ngapa.

11Ko ki nyakasi gu nyanyaki aba, ki moi abarutirivura rogo ho, ki igi riahe yo, na nzeme, na imekakue.

12Ko ki moi bakikii avurakube rogo abaakporo dunduko na abaso a, ki nyakasi he anyakasa ki susi. Ringara Yuda na Benyamina ki du ni gako.

13Agu aboromotumo na agu aRevi naadu rogo ringara Yisaraere dunduko akaraga tiyo koyo du ko ni ti gayo abaraka dũ.

14Bambiko aRevi ambu gayo ringara banambu na gayo ahe ki ye ku Yuda yo na ku Yerusarema yo, bambiko Yerobama na awiriko aba yo ku sa yo ti manga pa gu sunge nga ga aboromotumo fu Yekova.

15Yerobama ki ringbisi aboro ni tiko ni aboromotumo tipa tumbatumba arago, na tipa kpia abaameme, na tipa kpia wiri abagara nga agu ahe ko amangi he.

16Agu yo namoi ngbaduyo ka gbata Yekova ga aYisaraere Mbori dagba ngbatunga aYisaraere dunduko, i aye fuo aboromotumo na aRevi ku Yerusarema yo ka fu amotumo fu Yekova, nga ga abayo Mbori.

17Si du i ki ninyakasi pa ga Yuda ngbi, ki ninyakasi pa Rabama wiri Soromo nyanyaki a, garã ki du biata, bambiko i apeke fuo ga Dawidi pai na fuo ga Soromo pai garã ki du biata.

18Rabama ki di de nangia Marata wiri Yerimota, Yerimota angia wiri Dawidi, nari nangia Abayaira wiri Eriaba, Eriaba angia wiri Yisai;

19ri ki vungu akumbagude fu ko, nangia Yusa, Semaraya, na Zama.

20Fuo ri ko ki di Maka wiri Abisaroma, ri ki batika Abiya fu ko, na Atai, Ziza, na Seromita.

21Rabama ki nikpi nyemu Maka wiri Abisaroma ki susi adiako dũ na gako adebadia, bambiko adiako adu 18 na gako adebadia wa 60, ko ki batika akumbagude 28 na adegude wa 60.

22Rabama ki moi Abiya wiri Maka ko du ni barumbatayo ni bazogo dagba awiribako, bambiko ko abere pa maa ko ni bakindo.

23Ko ki mangi pai ni tatamana, ki gbandaka awiriko dunduko ku rogo ringara Yuda na ga Benyamina, ku rogo abaakporo ngapa dunduko; ko ki fu aũngba fu yo kpaima, ki rogo dungu ade fu yo ni adiayo.

← Chapter 10 Jump to: Chapter 12 →