Romans 1

Ahirani (आहिराणी नवा करार) - No Year

Jump to: Chapter 2 →

1मी पौल, येशु ख्रिस्त ना दास शे, आणि परमेश्वर ना कळून प्रेषित होवा साठे बलावामा एयेल शे आणि तेनी सुवार्ता ना प्रचार करासाठे निवाळा मा एयेल शे.

2परमेश्वर नि ह्या सुवार्ता नि प्रतिज्ञा गैरा पहिलेच आपला भविष्यवक्तास्ना व्दारे परमेश्वर ना पुस्तक मा करेल होती.

3हय सुवार्ता तेना पोऱ्या, आमना प्रभु येशु ख्रिस्त ना विषय मा शे. तो दाविद ना वंश मा माणुस बनीसन जल्म ले उना

4आणि पवित्र आत्मा ना भाव कण मरेल मधून परत जित्ता होवा मुळे सामर्थ्य कण परमेश्वर ना पोऱ्या येशु ख्रिस्त ठरेल शे.

5येशु ख्रिस्त ना द्वारे परमेश्वर नि मले ख्रिस्त ना प्रेषित ना पद आणि अधिकार दिधा कारण कि तेना नाव ना साठे सर्वा जातीस्ना लोक तेनावर विश्वास करोत आणि तेले स्वीकार करोत.

6जेस्ना मा तुमी बी ज्या रोम शहर मा राहातस मिई जावा आणि येशु ख्रिस्त ना होवा साठे बलावामा एयेल शेतस.

7मी तुमी सर्वा लोकस्ले ज्या रोम शहर मा परमेश्वर ना प्रिय शेतस आणि तेना पवित्र लोक होवा साठे बलावामा एयेल शेतस, हय पत्र लिखस. आमना बाप परमेश्वर आणि प्रभु येशु ख्रिस्त ना कळून तुमले कृपा आणि शांती भेटत राहो.

8पहिले मी तुमी सर्वास साठे येशु ख्रिस्त ना व्दारे आपला परमेश्वर ना धन्यवाद करस, कारण कि येशु ख्रिस्त वर तुमना विश्वास नि चर्चा प्रत्येक जागा वर लोकस्ना मधमा हुई ऱ्हायनात.

9परमेश्वर जेनी सेवा मी आपला पुरा हृदय कण तेना पोऱ्या नि सुवार्ता ना विषय मा करस, तोच मना साक्ष शे कि मी तुमले आपली प्रार्थना मा कायम आठवण करत ऱ्हास.

10आणि कायम आपली प्रार्थनास्मा विनंती करत ऱ्हास कि परमेश्वर नि ईच्छा कण कोणत्यान-कोणत्या प्रकारे कण मले आखरी वर तुमी लोकस जोळे एवानी संधी भेटो.

11कारण कि मी तुमले भेटानी लालसा करस एनासाठे कि मी तुमले कोणती तरी आत्मिक कृपादान देवू जेना कण तुमी विश्वास मा पक्का हुई जावोत.

12मन सांगान अर्थ हय शे कि जव मी तुमना मधमा ऱ्हासु, त आमी तेनावर विश्वास ना द्वारे जो मना मा आणि तुमना मा शे, एक दुसरा कण प्रोत्साहन भेटो.

13ओ मना विश्वासी भावूसहोण, मले तुमले सांगानी ईच्छा शे कि मनी घडीघडी तुमना जोळे येवानी योजना करी, एनासाठे कि मी तठला लोकस्ले ख्रिस्त ना मांगे चालणारा बनाई सकू जस मनी सर्वा जातीस्ना लोकस्मा करेल शे. पण आते लगून रोका मा उनू.

14एना कण काही फरक नई पडत कि लोक सभ्य आणि शिक्षित शे, व जर त्या असभ्य आणि अशिक्षित शे. मी सर्वास्ले सुवार्ता आयकाळाना साठे कर्जदार शे.

15म्हणून मी तुमले बी ज्या रोम शहर मा राहातस, सुवार्ता आयकाळाले पुरा तयार शे.

16कारण कि मले सुवार्ता आयकाळाना साठे स्वता वर गर्व शे, कारण कि ती प्रत्येक विश्वास करणार ना तारण साठे पहिले त यहुदीस साठे मंग बिगर यहुदीस साठे परमेश्वर नि सामर्थ्य शे.

17कारण कि सुवार्ता हय प्रगट करस कि परमेश्वर कोणता प्रकारे लोकस्ले धर्मी ठरावस, हय सुरुवात पासून त आखरी लगून विश्वास ना द्वारे होस. जस शास्त्र मा लिखेल शे, “विश्वास कण धर्मी झन जित्ता राहीन.”

18परमेश्वर ना राग त सर्वा अभक्ति आणि अधर्म ना काम करणारा लोकस्वर स्वर्ग मधून प्रगट होस, जो अधर्म ना कामस्ले कराना द्वारे परमेश्वर ना सत्य ले लोकस्वर प्रगट होवा पासून रोकतस.

19कारण कि सगळी मानव जाती ना साठे स्पष्ट शे कि परमेश्वर कसा शे, कारण कि परमेश्वर नि स्वता तेस्ले स्पष्ट रूप कण प्रगट करेल शे.

20जव पासून परमेश्वर नि जग नि उत्पती करेल शे तव पासून तेना बिगर देखेल गुण, म्हणजे तेना कायम ना सामर्थ्य आणि स्वभाव ले तेना कार्यस्मा देखामा येस, एनासाठे तेस्ना बचावमा कोणताच बाहान नई शे कि त्या परमेश्वर ले नई ओयखतस.

21त्या परमेश्वर ले वयखतस, तरी बी त्या तेना आदर नई करतस जेना योग्य तो शे आणि नईत तेना धन्यवाद करतस. पण तेस्ना विचार पुरा निरर्थक हुई जायेल शेतस आणि तेस्ना निर्बुद्धी मन अंधार कण भरी जायेल शे.

22त्या सांगतस कि त्या बुद्धीमान शेतस पण त्या मूर्ख शेतस.

23अविनाशी परमेश्वर नि महिमा कराना एवजी त्या नाशवंत माणुसस्ना, आणि पक्षीस्ना, आणि सरपटणार जंतुस्नि मूर्तीस्ना गौरव करतस.

24एनासाठे परमेश्वर नि तेस्ले तेस्ना मन नि वाईट ईच्छा नुसार अशुद्धता साठे सोळी टाक कि त्या आपस मा वाईट कामस्मा आपला शरीर ना अपवित्र करोत.

25तेस्नी परमेश्वर नि सत्यता वर विश्वास नई ठेव पण जे खोट शे तेनावर विश्वास ठेव, आणि सृष्टी नि उपासना करी, नई कि त्या निर्माणकर्ता नि जो कायम धन्य शे. आमेन.

26तेस्न अस करा मुळे, परमेश्वर नि तेस्ले वाईट वासनास्ना वश मा सोळी दिधा. आठ लगून कि बायास्नी माणसस संगे नई करता बायास संगे शारीरिक संबंध ठेवू लागनात.

27त्याच प्रकारे तेस्ना माणसस्नी बी बायस्ना संगे स्वभाविक संबंध ठेवाना सोळीसन माणसस्ना संगे आपस मा कामातुर हुईसन बयाले लागनात. माणुस-माणुस ना संगेच कुकर्म करू लागनात आणि ह्या प्रकारे त्या आपला वाईट वागणूक ना योग्य दंड स्वतास्ले भेटस.

28जव तेस्नी परमेश्वर ना खरा ज्ञान ले प्राप्त कराले योग्य नई समजत त परमेश्वर नि बी तेस्ले ते सगळ करासाठे, जे अयोग्य होत, तेस्ना वायबार मन ना वश मा सोळी दिध.

29एनासाठे त्या सर्वा प्रकार ना अधर्म, दृष्टता, लोभ, मत्सर आणि द्वेष कण भरीग्यात, हत्या, झगळा, कपट, ईर्ष्या कण भरपूर हुई ग्यात, चुगली खोर.

30निंदा करणारा, परमेश्वर ना संगे घृणा करणारा, हिंसक, गर्विष्ठ, बळाईखी मारणारा, वाईट-वाईट गोष्टीस्ले बनावणारा.

31निर्बुद्ध, विश्वासघाती, दयाहीन आणि निर्दय हुई जायेल शेतस.

32तेस्ले त परमेश्वर नि विधी माहिती शे कि असा काम करणारा मृत्यु ना दंड ना योग्य शेतस, तरी बी नईत फक्त स्वताच असा काम करतस पण करणारस कण खुश बी होतस.

Jump to: Chapter 2 →