Romans 7

Ahirani (आहिराणी नवा करार) - No Year

← Chapter 6 Jump to: Chapter 8 →

1ओ विश्वासी भावूसहोण, तुमले माहित शे कि मी तेस्ले सांगस जेस्ले मोशे ना नियम माहिती शे. जठ लगून माणुस जित्ता ऱ्हास तेले नियम ना गोष्टीस्ना पालन करन पळस.

2उदाहरणार्थ, एक विवाहित बाई आपला नवरा संगे विवाहिक नियम ना प्रमाणे त्या संबंध मा तठ लगून बांधायेल ऱ्हास जठ लगून तीना नवरा जित्ता शे, पण जर तीना नवरा मरी जास त ती त्या विवाहिक नियम पासून सुटी जास जीनामा ती आपला नवरा संगे बांधायेल होती.

3एनासाठे, कदी ती आपला नवराले जित्ता राहतांना बी कोणी दुसरा माणुस ना संगे ऱ्हास, त ती व्यभिचारिणी म्हणाईन. पण जर तीना नवरा मरी जास, त ती विवाहिक नियम पासून मुक्त हुई जास आणि कोणी दुसरा माणुस संगे लग्न करावर व्यभिचारिणी नई म्हणावनार.

4तसाच, ओ विश्वासी भावूसहोण, जव तुमी ख्रिस्त ना संगे मरी ग्यात, त तुमी मोशे ना नियम ना साठे बी मरी ग्यात. आते तुमी तेना शेतस जो मरेल मधून परत जित्ता हुई जायेल शे एनासाठे कि तुमी परमेश्वर ना साठे फलदायी जीवन जगू सकोत.

5कारण कि जव आमी शरीर ना स्वभाव प्रमाणे जीवन जगतस, त मोशे ना नियम कण शक्तिशाली हुईसन पापस्ना वासना आमना आंगस्मा काम करत होती जेस्नी समाप्ती मृत्यु होत होती.

6पण आते आमी मोशे ना नियम पासून मुक्त हुई जायेल शेतस, कारण कि आमी त्या गोष्टीस साठे मरी जायेल शेतस, जी आमले कैदीस सारखी बंधन मा जखडी ठेवत होती. आते आमी लिखेल नियम ना गोष्टीस्ना पालन करीसन जुनी रितीवर नई पण पवित्र आत्मा नि आदन्या ना पालन करीसन नवी रिती कण परमेश्वर नि सेवा करू सकतस.

7त आमी काय सांगुत? काय नियम पाप शे? कदीच नई. पण मोशे ना नियम ना द्वारेच मले माहिती पळण कि पाप काय शे. मोशे ना नियम ना द्वारेच मले माहिती पळण कि लोभ करान पाप शे, कारण कि मोशे ना नियम मा हय आदन्या लिखेल शे कि “लोभ नका करज्यात.”

8पण ह्या आदन्या ना द्वारे पाप नि संधी देखीसन मना मा सर्वा प्रकार ना लोभ उत्पन्न कर, कारण कि बिगर मोशे ना नियम ना पाप सामर्थ्य हीन आणि मरेल सारखा शे.

9एक टाईम होता जव मी नियमले नई वयखतांना जित्ता होतु, पण जव मले मोशे ना नियम ना द्वारे पाप माहिती पळणा त मना मा पाप करानी तीव्र ईच्छा जागी उठनी आणि मी परमेश्वर पासून दूर हुई ग्यू.

10पण जी आदन्या ले मानाना द्वारे मले जीवन भेटाले पाहिजे होत तीच आदन्या द्वारे मी परमेश्वर पासून दूर हुई ग्यू.

11कारण कि पाप नि संधी देखीसन आदन्या ना व्दारे मले फसाळ, आणि तेनाच व्दारे मले परमेश्वर पासून दूर बी करी टाक.

12ह्या प्रकारे आमी देखतस कि मोशे ना नियम पवित्र शे आणि आदन्या पवित्र, उचित व कल्याणकारी शे.

13त काय एना अर्थ हय शे कि मोशे ना नियम, जो चांगला शे, परमेश्वर पासून मले दूर होवाना कारण ठरणा? कदीच नई. पण हय पाप ना द्वारे हुईन. पण पाप नि त्या चांगला मोशे ना नियम ना द्वारे मले परमेश्वर पासून आल्लग करी टाक, एनासाठे कि पाप ना खरा रूप प्रगट होवो आणि आदन्या ना द्वारे हय प्रगट हुईन कि पाप पूर्णपणे वाईट शे.

14आमले माहित शे कि मोशे ना नियम त आत्मिक शे, पण मी शारीरिक शे आणि पाप ना गुलाम शे.

15जे मी करस तेनी मले समज नई, कारण कि जे मी कराले देखस ते मी नई करत, पण जेना कण मले घृणा येस तेच करस.

16एनासाठे, जे वाईट मी नई कराले देखस कदी तेच करस, त मी मानी लेस कि मोशे ना नियम बरोबर शे.

17त अशी दशा मा त्या वाईट ले करणारा मी नई, पण पाप शे जो मना मा बठेल शे.

18कारण कि मले माहित शे कि मना मा म्हणजे मना पापमय शारीरिक स्वभाव मा काहीच चांगल वास नई करत. जरी चांगला काम करानी ईच्छा मना मा शे पण ते मी नई करू सकत.

19कारण कि ज्या चांगला काम करानी ईच्छा मी ठेवस ते त नई करत, पण ज्या वाईट ना कामस्ले मी नई करान देखस तेच करत ऱ्हास.

20म्हणून कदी मी तेच करस जेनी ईच्छा नई करत, त तेना करणार मी नई पण पाप शे जो मना मा बसेल शे.

21ह्या प्रकारे, मना अनुभव हय शे कि जव मी चांगल करानी ईच्छा करस, त वाईटच करू सकत.

22मना मधला मनुष्यत्व परमेश्वर ना नियम वर गैरा खुश ऱ्हास.

23पण मले आपल शरीर ना आंगस्मा दुसरा प्रकार ना नियम दिखी पळस, जो मनी बुद्धी ना नियम संगे झगळा करस आणि मले त्या पाप ना गुलाम बनाई टाकस जो मना मा काम करस.

24मी कितला कष्टी माणुस शे. मले ह्या वासनाना शरीर पासून कोण सोळाईन जी मले मृत्यु ना कळे धकलस?

25मी परमेश्वर ना धन्यवाद करस जो मले प्रभु येशु ख्रिस्त व्दारे वाचाळस. एनासाठे मी स्वता आपला कण त परमेश्वर ना नियम ना पालन करस पण शरीर कण पाप ना नियम ना पालन करस.

← Chapter 6 Jump to: Chapter 8 →