Romans 9

Ahirani (आहिराणी नवा करार) - No Year

← Chapter 8 Jump to: Chapter 10 →

1मी ख्रिस्त मा खरज सांगस आणि मना विवेक बी पवित्र आत्मा मा ह्या गोष्ट नि साक्षी शे कि मी खोट नई बोलत.

2मना मन मना लोकस साठे कायम दुखत ऱ्हास.

3मनी त आठ लगून ईच्छा शे कि मी आपला यहुदी भावूस्ना चांगला साठे, ज्या शरीर ना नाता कण मना वंश मधून शेत, स्वता शापित हुई जावू आणि ख्रिस्त पासून आल्लग हुई जावू.

4त्या इस्त्राएल देश ना लोक शेतस. परमेश्वर नि तेस्ले आपला दत्तक पोर होवाना अधिकार दियेल शे. परमेश्वर नि तेस्ले महिमा दिधी. परमेश्वर नि तेस्ना संगे करार कर आणि तेस्ले मोशे ना नियम दियेल शे. तेस्ले परमेश्वर नि खरी उपासना करन माहिती शे आणि परमेश्वर नि प्रतिज्ञा बी तेस्ले भेटेल शे.

5महान ग्रीक पूर्वज तेस्नाच शेतस आणि शरीर ना भाव कण ख्रिस्त तेस्नाच मधून शे. परात्पर परमेश्वर नि स्तुती युगानयुग होवो. आमेन.

6मी अस नई सांगी ऱ्हायनु कि परमेश्वर आपला करार ना पालन कराले चुकी ग्या, कारण कि ज्या सर्वा इस्राएल ना वंश ना शेत त्या सर्वा परमेश्वर ना लोक नईत.

7आणि नईत सर्वा अब्राहाम ना वंश ना होवा मुळे परमेश्वर ना पोर ठरणात. परमेश्वर नि अब्राहाम ले सांगेल होत, “ज्या इसहाक ना वंश मधून जल्म लेतस, त्याच तुना वंशज मानामा येतीन.”

8एना अर्थ हय शे कि ज्या निसर्ग प्रमाणे जल्म लेतस, त्या परमेश्वर ना पोर नई शेतस, पण जेस्ना जल्म करार प्रमाणे हुईना, त्याच वंशज समजामा येतस.

9कारण कि परमेश्वर ना करार ना ह्याच शब्द होतात, “मी निर्धारित टाईम वर परत येसू आणि तव सारा ले एक पुत्र उत्पन्न हुईन.”

10एवळच नई, रिबेका ना गर्भ मा एकच माणुस, म्हणजे आमना पूर्वज इसहाक पासून दोन पोर हुईनात.

11आणि आते तेना दोनी पोरस्ना जल्म बी हुयेल नई होता आणि तेस्नी त्या टाईम लगून कोणताच पाप व पुण्य ना काम नई करेल होतात, तव परमेश्वर नि रिबेका ले सांग, “तुना मोठा पोऱ्या, धाकला पोऱ्या ना दास बनीन.” हय एनासाठे हुईन कि परमेश्वर नि ईच्छा ना उद्देश सदा राहो, जो माणसस्ना कामस कण नई, पण बलावणार ना निर्णय वर निर्भर शे.

13जस पवित्र शास्त्र मा लिखेल शे, “मनी याकोब वर प्रेम कर, पण एसाव ले अप्रिय समज.”

14त आमी काय सांगुत? काय परमेश्वर अन्यायी शे? कदीच नई.

15कारण कि तेनी मोशे ले सांगेल होत, “मनी जेनावर दया करानी ईच्छा शे, तेनाच वर दया करसू आणि जेनावर कृपा करानी ईच्छा शे, तेनाच वर कृपा करसू.”

16एनासाठे परमेश्वर एनी निवळ करीन कि तो कोणावर दया करो, तेनी निवळ माणुस नि ईच्छा आणि प्रयत्न्यस्वर नई शे.

17कारण कि परमेश्वर ना पुस्तक मा मिसर ना राजा फारो ले सांगामा एयेल होत, “मनी तुले एनासाठे राजा बनायेल शे कि तुना द्वारे मी आपली सामर्थ्य दाखाळू, आणि मना नाव ना प्रचार पुरी पृथ्वी वर होवो.”

18एनासाठे परमेश्वर नि जेनावर ईच्छा शे तेनावर दया करस, आणि जेले कठोर करानी ईच्छा शे तेले कठोर करी देस.

19तव काही लोक मले सांगतीन, “जर अस शे, त परमेश्वर आमना वर दोष कसा लावू सकस? कारण कि कोणी बी तेले जी तेनी करानी ईच्छा शे करा पासून रोकी नई सकत.”

20पण ओ माणुस, तू कोण शे जो परमेश्वर संगे विवाद करू सकस? कारण कि गाळायेल वस्तू गाळनार ले नई विचारू सकत कि, “तुनी मले अस काब बनाव?”

21काय कुंभार ले हय अधिकार नई कि तो माती ना एकच गोया कण एक भांड खास काम ना साठे बनावो आणि दुसर भांड साधारण काम ना साठे बनावो?

22परमेश्वर ना जोळे आपली सामर्थ्य आणि न्याय ना प्रदर्शन कराना पुरा अधिकार शे, पण तेले हय बी अधिकार शे कि तो राग ना भांडास्नि, ज्या विनाश ना साठे तयार करामा एयेल शे, तेस्ना वर सहनशील दाखाळो.

23तेले हवू बी अधिकार शे कि आपला महिमा ना धन ले त्या दया ना भांडास्वर प्रगट करो जेस्ले तेनी महिमा ना साठे पहिले पासून तयार करेल शे.

24कारण कि आमी तेना निवाळेल लोक शेतस, जेस्ले तेनी नईत फक्त यहुदीस मधून, पण बिगर यहुदीस मधून बलायेल शे.

25जसा तो होशे ना पुस्तक मा बी सांगस, “जी मनी प्रजा नई होती, तेस्ले मी आपली प्रजा सांगसू, आणि जी प्रिय नई होती, तिले प्रिय सांगसु.”

26आणि ज्या जागा वर तेनी तेस्ले सांगेल होत, “तुमी मनी प्रजा नई शेतस, तठेच त्या जित्ता परमेश्वर ना पोर म्हणावतीन.”

27आणि यशया इस्त्राएल देश ना विषय मा आराया मारीसन सांगस, “इस्राइलिस्नि संख्या समुद्र रेती सारखी का नई हो, तरी बी तेस्ना मा थोळासाच वाचाळामा येतीन.

28कारण कि प्रभु लवकरच पूर्णपणे जग ना लोकस्ना न्याय करीन.”

29जसा यशया नि पहिले पासून सांगेल शे, “जर सैन्यांस्ना प्रभु आमना साठे काही वंश नई सोळत, त आमी सदोम ना सारखा हुई जातात, आणि गमोरा ना सारखा नाश हुई जातात.”

30त आमी काय सांगुत? त्या बिगर यहुदी, ज्या धार्मिकता नि शोध बी नई करी ऱ्हायंतात, तेस्नी त्या धार्मिकता ले प्राप्त करी लीध जी विश्वास कण शे.

31जव कि इस्त्राएल देश ना लोक ज्या मोशे ना नियम ना पालन करीसन धार्मिकता नि शोध करत होतात, त्या बी धर्मी बना पासून ऱ्हाईग्यात.

32अस काब हुईन? कारण कि इस्त्राएली विश्वास वर नई, पण समजा कामस कण तेनी शोध करत होतात. परिणाम स्वरूप त्या ठेस ना दघळ कण तेस्ले ठेस लागणी.

33जस कि पवित्र शास्त्र मा लिखेल शे, “देखा, मी सियोन शहर मा एक दघळ ठेवस, जो लोकस्ना ठेस खावाना आणि अडखळ ना कारण राहीन. पण जो तेनावर विश्वास करीन तो कदी लज्जित नई होवाव.”

← Chapter 8 Jump to: Chapter 10 →