Romans 13

Ahirani (आहिराणी नवा करार) - No Year

← Chapter 12 Jump to: Chapter 14 →

1प्रत्येक माणुस सरकारी अधिकारीस्ना आधीन मा राहाले पाहिजे, कारण कि सर्वा अधिकार परमेश्वर ना कळून शेतस, आणि ज्या अधिकार शेतस, त्या परमेश्वरनाच ठरायेल शेतस.

2एनासाठे जो कोणी अधिकार ना विरोध करस, तो परमेश्वर ना आदन्या ना विरोध करस. आणि जो कोणी असा करस तेले दंड भेटीन.

3ज्या चांगला काम करतस तेस्ले राज्यकर्तास पासून भ्यावानी गरज नई पण ज्या वाईट काम करतस तेस्ले राज्यकर्तास्ले भ्यावाले पाहिजे. एनासाठे कदी तू राज्यकर्तास पासून बिगर भ्यावाना राहाणा देखस, त चांगला काम कर, आणि तेस्ना कळून तुनी प्रशंसा हुईन.

4कारण कि त्या परमेश्वर ना सेवक शेतस ज्या तुमना चांगला साठे काम करतस. पण कदी तू वाईट करस, त तेस्ले भ्याय, कारण कि तेस्ना जोळे अधिकार शे कि त्या दंड देवो. त्या परमेश्वर ना सेवक शेतस आणि ज्या वाईट करतस तेस्ले त्या दंडीत करतस.

5एनासाठे तू अधिकारीस्ना आधीन ऱ्हाय, नईत फक्त परमेश्वर ना दंड नि भीती कण पण एनासाठे बी कि तुना विवेक बी तुले हईच करासाठे सांगत राहो.

6एनासाठे कर बी द्या कारण कि राज्यकर्ता परमेश्वर ना सेवक शेतस आणि कायम त्याच काम मा लागेल ऱ्हातस.

7एनासाठे प्रत्येक ना प्रती आपला कर्तव्य पुरा करत राहा, जेले कर पाहिजे तेले कर द्या, जेले जकात पाहिजे तेले जकात द्या, जेले घाबराले पाहिजे तेले घाबरा, जेना आदर कराले पाहिजे तेना आदर करा.

8आपस मा प्रेम ले सोळीसन आखो कोणतीच गोष्ट मा कोणाच कर्जदार नका बनज्यात, कारण कि जो दुसरा वर प्रेम ठेवस, तेनीच मोशे ना नियम ना पालन करेल शे.

9मोशे ना नियम मा जे लिखेल शे तेना नुसार, “व्यभिचार करजो नको, मनुष्य हत्या करजो नको, चोरी करजो नको, लालच करजो नको,” ह्या गोष्टीस्ले सोळीसन आखो कोणती बी आदन्या राहो त सर्वास्ना सारांश ह्या गोष्ट मा भेटस, “आपला शेजारी वर आपला सारखा प्रेम ठेव.”

10कदी तुमी कोणावर प्रेम ठेवतस, त तुमी तेस्न वाईट नई करावतस, एनासाठे प्रेम करान पुरा मोशे ना नियम ना पालन करन शे.

11तुमी असच कऱ्या करा, कारण कि तुमले माहिती शे कि तुमना साठे निंद मधून जागी उठानी घळी ईजायेल शे, ज्या टाईम ले आमी विश्वास करेल होतुत, त्या टाईम ना तुलना मा आते आमना तारण जोळे शे.

12गैरी रात बीती जायेल शे, आणि दिन निघा वर शे, एनासाठे आणि अन्धकार ना कामस्ले सोळीसन उजाया ना हत्यार बांधील्या.

13जशी दिन ले शोभो, तशीच आमनी वागणूक बी पाहिजे, नईत कि कामातुरपणा आणि बेवळापणा मा, नईत व्यभिचार आणि अश्लीलता मा, आणि नईत झगळा आणि ईर्ष्या मा.

14पण प्रभु येशु ख्रिस्त ले कवच ना सारखा आंग मा घालील्या, आणि आपला शरीर ना पापमय स्वभाव नि वासनास्ले पुरा करा कळे ध्यान नका द्या.

← Chapter 12 Jump to: Chapter 14 →