Romans 15

Ahirani (आहिराणी नवा करार) - No Year

← Chapter 14 Jump to: Chapter 16 →

1म्हणून आमी ज्या विश्वास मा पक्का शेतस, आमले फक्त आपलीच सुख-सुविधा नि नई पण दुर्बळस्नि कमजोरीस्ना बी ध्यान देवाले पाहिजे.

2आमना मधून प्रत्येक आपला विश्वासी भावू संगे चांगल करीसन तेले खुश करो एनासाठे कि तेना कण तेनी आत्मिक उन्नती होवो.

3कारण कि ख्रिस्त नि स्वता ले खुश करासाठे काहीच नई कर, पण जस पवित्र शास्त्र मा लिखेल शे, “तुनी निंदा करणारस्नि मनी निंदा करी.”

4परमेश्वर ना पुस्तक मा जे काही लिखामा एयेल शे ते आमनी शिक्षा साठे लिखामा एयेल शे, एनासाठे कि आमले धीर आणि प्रोत्साहन भेटत राहो आणि ह्या प्रकारे आमी आपली आशा सदा ठेवी सकुत.

5मी प्रार्थना करस कि परमेश्वर तुमले धीर आणि प्रोत्साहन देत राहो एनासाठे कि तुमी ख्रिस्त येशु नि शिक्षा प्रमाणे एक दुसरा ना संगे सामंजस्य कण राहू सकोत.

6एनासाठे कि तुमी एक मन आणि सूर मा मियसन परमेश्वर, आमना प्रभु येशु ख्रिस्त ना बाप नि स्तुती करी सकोत.

7एनासाठे जसा ख्रिस्त नि तुमले स्वीकार कर तसाच तुमी बी एक दुसराले स्वीकार करा एनासाठे कि लोक परमेश्वर नि महिमा करो.

8मले हय सांगण शे कि ख्रिस्त येशु ले सेवक एनासाठे बनन पळण कि तो, पूर्वजस्ले देवामा एयेल करारस्ले पुरा करीसन, परमेश्वर नि सत्यता ना प्रमाण देवू सको.

9आणि एनासाठे बी कि बिगर यहुदी, परमेश्वर नि दया प्राप्त करीसन, तेनी स्तुती करो. जस पवित्र शास्त्र मा लिखेल शे, “ह्या मुळे मी बिगर यहुदीस्ना मधमा तुनी स्तुती करसू आणि तुना नाव नि महिमा ना गाना म्हणसू.”

10मंग तो सांगस, “ओ दुसरी जाती ना सर्वा लोकसहोण, तेनी प्रजा संगे खुशी करा.”

11परत पवित्र शास्त्र मा लिखेल शे, “ओ दुसरी जाती ना सर्वा लोकसहोण, प्रभु नि स्तुती करा, आणि ओ राज्य-राज्य ना सर्वा लोकसहोण, तेनी प्रशंसा करा.”

12आणि मंग यशया सांगस, “इशाया नि एक मुय प्रकट हुईन, आणि बिगर यहुदीस्ना अधिकारी होवा साठे एक उठीन, तेनावर बिगर यहुदी जाती आशा ठेवतीन.”

13मी प्रार्थना करस कि परमेश्वर जो आशा ना झरा शे तुमले विश्वास करामा सर्वा प्रकार नि खुशी आणि शांती कण परिपूर्ण करो, कि पवित्र आत्मा नि सामर्थ्य कण तुमनी आशा व्हाळत जावो.

14ओ मना विश्वासी भावूसहोण, मले स्वता तुमना विषय मा निश्चय माहिती शे कि तुमी बी स्वताच चांगुलपणा कण भरेल आणि सर्वा प्रकार ना ज्ञान कण भरेल शेतस, आणि एक दुसरास्ले शिकाळू सकतस.

15पण ह्या पत्र मा काही गोष्टी आठवण देवाळा साठे मनी तुमले हिम्मत कण लिखेल शे, आणि हय हिम्मत मले परमेश्वर नि कृपा कण भेटेल शे.

16कि मी बिगर यहुदीस साठे ख्रिस्त येशु ना सेवक बनीसन परमेश्वर नि सुवार्ता नि सेवा यहुदी पुजारी ना सारखा करू, एनासाठे कि बिगर यहुदी, पवित्र आत्मा ना द्वारे पवित्र करामा येवा नंतर, परमेश्वर ले समर्पित आणि स्वीकारा योग्य हुई जावोत.

17एनासाठे मी येशु ख्रिस्त ना मुळेच परमेश्वर नि सेवा वर गर्व करू सकस.

18मी फक्त त्या गोष्टीस्नी चर्चा करानी हिम्मत करसू, जेस्ले ख्रिस्त नि बिगर यहुदीस्ले विश्वास नि आधीनता स्वीकार करासाठे मना द्वारे वचन आणि कामस कण,

19आणि चिन्ह आणि अदभूत कामस्नी सामर्थ्य कण, आणि पवित्र आत्मा नि सामर्थ्य कण करेल शे. आठ लगून कि मनी यरूशलेम शहर पासून त चारीस कळे इल्लूरिकम प्रांत लगून ख्रिस्त नि सुवार्ता ना प्रचार पुरा-पुरा करेल शे.

20मनी पहिले पासून हय ईच्छा शे कि मी ख्रिस्त येशु नि सुवार्ता असा जागास्वर आयकाळू जठे तेनी सुवार्ता प्रचार नई करामा एयेल होवो. कारण कि मी दुसरास्ना द्वारे टाकेल पाया वर बांधांना नई देखत.

21जस कि पवित्र शास्त्र मा लिखेल शे, “जेस्ले कदी तेना संदेश नई भेटेल होता, त्या तेना दर्शन करतीन आणि जेस्नी कदी तेना विषय मा नई आयक, त्या समजतीन.”

22आणि हईच कारण शे कि मी तुमना जोळे घळी-घळी येवा कण थांबेल ऱ्हायनु.

23पण आते मनी ह्या प्रदेशस्मा ख्रिस्त नि सुवार्ता सर्वा लोकस्ले आयकाळी दियेल शे आणि आते मना कामस साठे आखो जागा नई ऱ्हायनी, आणि गैरा वरीस पासून मले तुमना जोळे येवानी ईच्छा शे.

24एनासाठे जव मी स्पेन देश ले जासू त तुमना जोळे होत जासू, कारण कि मले आशा शे कि त्या प्रवास मा मनी तुमना संगे भेट हुईन, आणि जव तुमना संगे संगती करीसन मले खुशी वाटीन त तुमी मले थोळा पुळे पोहोचाळी देयज्यात.

25पण ह्या टाईम ले त मी परमेश्वर ना लोकस्नी मदत करासाठे यरूशलेम शहर कळे जाई ऱ्हायनु.

26कारण कि मासेदोनिया प्रांत आणि अखया प्रांत ना मंडळीस्नी स्वतास्ना ईच्छा कण हय निर्णय करेल शे कि त्या भेटणा रूप कण यरूशलेम शहर ना परमेश्वर ना लोकस्मा गरीब लोकस साठे काही मदत धाळोत.

27तेस्ना हवू निर्णय चांगल शे, पण खरज त्या यरूशलेम शहर ना परमेश्वर ना लोकस्ना कर्जदार बी शेतस. कारण कि कदी बिगर यहुदी लोक यहुदी लोकस्नी आत्मिक संपत्ती ना भागीदार होतीन. त बिगर यहुदीस्ले आपली भौतिक संपत्ती कण तेस्नी सार्वजनिक सेवा कराले पाहिजे.

28एनासाठे मी पहिले यरूशलेम शहर ले जाईसन जमा करेल भेट तेस्ले सोपी देसू, नंतर मी तुमना जोळे रोम शहर ले होत स्पेन देश ले जासू.

29मले विश्वास शे कि जव मी तुमना जोळे एसू, त ख्रिस्त ना पुरा आशीर्वाद ना संगे एसू.

30ओ विश्वासी भावूसहोण, आमना प्रभु येशु ख्रिस्त ना आणि पवित्र आत्मा ना प्रेम नि आठवण देवाळीसन मी तुमले विनंती करस, कि मना संघर्ष मा मनासाठे परमेश्वर ले प्रार्थना करामा मना संगे मियसन लीन राहा.

31आणि हय प्रार्थना करज्यात कि मी यहूदा प्रदेश ना अविश्वासीस पासून वाची राहू आणि ज्या सेवा-कार्य साठे मी यरूशलेम शहर ले जाईऱ्हायनु, तठे तठला परमेश्वर ना लोकस्ले आवळो.

32आणि मी खुशी कण तुमी लोकस्ना आठे पोहोचीसन परमेश्वर नि ईच्छा प्रमाणे तुमी लोकस्नी संगतीमा आराम करी सकू.

33परमेश्वर, जो शांती ना झरा शे, तुमना संगे राहो. आमेन.

← Chapter 14 Jump to: Chapter 16 →