Romans 14

Ahirani (आहिराणी नवा करार) - No Year

← Chapter 13 Jump to: Chapter 15 →

1कदी कोणी विश्वास मा दुर्बळ शे, त तुमी तेना शंकास्वर बिगर विवाद कराना तेनी आपली संगतीमा स्वागत करा.

2काही लोकस्ना विश्वास शे कि सर्व काही खान उचित शे, पण जो व्यक्ती विश्वास मा दुर्बळ शे तो फक्त भाजीपालाच खास.

3जो व्यक्ती मांसाहारी शे तो शाकाहारी ले तुच्छ नको समजा ले पाहिजे, आणि जो शाकाहारी शे तो मांसाहारी वर दोष नको लावाले पाहिजे. कारण कि तेले परमेश्वर नि स्वीकारेल शे.

4तू कोण शे जो दुसरा ना दासस्वर दोष लावस? फक्त तेस्ना मालकच निर्णय करीन कि त्या सेवामा पास शेतस कि नापास. कारण कि प्रभु तेले पास करू सकस.

5काही लोक एक दिन ले दुसरा तून व्हाळीसन मानतस, जव कि काही मानतस कि सर्वा दिन एकसारखा शेतस. प्रत्येक झन आपला आपला धारणा माच पुरा निश्चित राहा.

6जो कोणी कोणता दिन ले शुभ माणस, तो तेले प्रभु ना नाव वर शुभ माणस, आणि जो खास, तो प्रभु ना नाव कण खास, कारण कि तो परमेश्वर ले धन्यवाद देस. जो खात नई तो प्रभु ना नाव वर खात नई, आणि तो बी परमेश्वर ले धन्यवाद देस.

7कारण कि, आमना मधून कोणी नईत स्वता साठे जगस आणि नईत स्वता आपला साठे मरस.

8जर आमी जित्ता राहातस, त प्रभु ना साठे जित्ता राहातस आणि जर मरतस, त प्रभु ना साठे मरतस. ह्या प्रकारे भले आमी जित्ता राहूत कि मरी जावूत, आमी प्रभु नाच शेतस.

9कारण कि ख्रिस्त एनासाठे मरणा आणि परत जित्ता बी हुईग्या कि तो मरेल आणि जित्ता दोनीस्ना प्रभु होवो.

10तव तू जो शाकाहारी शे. तू काब आपला विश्वासी भावू वर दोष लावस? आणि तू जो मांसाहारी शे, तू काब दुसरा विश्वासीले तुच्छ समजस? आमी सर्वा परमेश्वर ना न्याय सिंहासन ना समोर उभा राहासुत.

11कारण कि पवित्र शास्त्र मा लिखेल शे, “प्रभु सांगस, मना जीवन नि शेप्पत शे कि प्रत्येक गुळघा मना समोर टीकीन, आणि प्रत्येक जीप स्वीकार करीन कि मीच परमेश्वर शे.”

12तव आमना मधून प्रत्येक ले परमेश्वर ना समोर आपला-आपला लेख देन पळीन.

13एनासाठे आते पासून आमी एक दुसरा वर दोष लावान सोळी देवाले पाहिजे, पण आमी हय निश्चित करी लेवाले पाहिजे कि आमी कोणताच असा काम नई करावत कि जेना कण आमना विश्वासी भावू ठोकर खावो आणि पाप मा पळी जावो.

14मले माहित शे आणि प्रभु येशु ना शिष्य होवाना नाता कण मना विश्वास शे कि कोणतीच गोष्ट स्वता मा अशुद्ध नई शे. पण जो तेले अशुद्ध समजस तेना साठे अशुध शे.

15कदी तू आपला जेवण मुळे भावू ले दुख देस, त तू प्रेम नि रिती प्रमाणे नई चालत. एनासाठे आमले सावधान हुई जावाले पाहिजे आणि जेवण मुळे आपला विश्वासी भावू ना विश्वास नष्ट नई कराले पाहिजे, जेना साठे ख्रिस्त मरणा.

16एनासाठे जे तुमनी नजर मा तुमना साठे चांगल आणि उचित शे, तेना विषय मा दुसरास्ले निंदा करानी संधी नका द्या.

17कारण कि परमेश्वर ना राज्य खावा-पेवाना नई, पण तो धार्मिकता, शांती, आणि खुशी ना शे, जो पवित्र आत्मा कण भेटस.

18आणि जो कोणी ह्या प्रमाणे ख्रिस्त नि सेवा करस, तो परमेश्वर ले खुश करस आणि माणसस्मा ग्रहणयोग्य ठरस.

19आमी कायम एक दुसरा ना संगे सामंजस्य कण राहाणा प्रयत्न कराले पाहिजे आणि कायम एक दुसराले आत्मिकता मा पक्का करत राहोत.

20जे काही बी तुमी खातस तेना मुळे परमेश्वर ना कामस्ले नका बीगाळा. सगळ काही त खावामा येवू सकस पण असा जेवण जेले खावा कण कोले ठोकर लागस त ते चांगल नई शे.

21चांगल त हय शे कि तू नईत मांस खावो आणि नईत द्राक्षरस पीवो, आणि नईत काही असा करो जेना कण तुना विश्वासी भावू ठोकर खावो.

22तुना जो विश्वास शे, तेले परमेश्वर ना समोर आपला मनमाच ठेव. धन्य शे तो जो त्या गोष्ट मा, जेले तो चांगली समजस, स्वता ले दोषी नई ठरावत.

23पण जो खावाना विषय मा संक्या करस आणि तरी बी खास, परमेश्वर तेले दोषी ठरावस, कारण कि तेन हय कार्य विश्वास ना प्रमाणे नई शे, आणि जे कार्य विश्वास ना प्रमाणे नई शे, ते पाप शे.

← Chapter 13 Jump to: Chapter 15 →