Romans 8

Ahirani (आहिराणी नवा करार) - No Year

← Chapter 7 Jump to: Chapter 9 →

1ह्या मुळे, आते जो ख्रिस्त येशु मा शे, तेस्ना वर दंड नि आदन्या नई. (कारण कि त्या शरीर प्रमाणे नई पण आत्मा ना प्रमाणे चालतस.)

2कारण कि जीवन देणारी आत्मा नि सामर्थ्य नि मले पाप नि सामर्थ्य पासून जी मृत्यु कळे लीजास मुक्त करी टाकेल शे.

3कारण कि जो काम मोशे ना नियम आमना कमजोर पापमय स्वभाव मुळे नई करू सकना, तेले परमेश्वर नि कर. तेनी पाप ना प्रायश्चित साठे आपला पोऱ्या ले धाळ, जेनी पापी माणुस सारखा शरीर ले धारण कर. ह्या प्रकारे परमेश्वर नि मानव शरीर मा पाप ले दंडीत कर.

4परमेश्वर नि हय एनासाठे कर कि मोशे ना नियम नि मांग आमी लोकस्मा ज्या शारीरिक स्वभाव प्रमाणे नई पण आत्मा ना प्रमाणे जीवन जगतस, पुरी करामा येवो.

5ज्या व्यक्ती ना जीवन पापी स्वभाव ना द्वारे चालावामा एस तेना विचार पापमयच ऱ्हातस. पण ज्या व्यक्ती ना जीवन पवित्र ना द्वारे चालावामा एस तो त्या गोष्टीस कळेच मन लावस जेना कण आत्मा खुश होस.

6पापमय स्वभाव ना प्रमाणे जीवन जगन त मृत्यु शे, पण पवित्र आत्मा ना प्रमाणे जीवन जगन शांती शे.

7आणि जव माणुस पापमय स्वभाव प्रमाणे जीवन जगस त परमेश्वर ना शत्रू बनी जास, कारण कि तो परमेश्वर ना नियम ना पालन नई करत आणि नईत करू सकतस.

8ज्या आपला पापमय स्वभाव नि आदन्या ना पालन करतस, त्या परमेश्वर ले खुश नई करू सकतस.

9पण जव परमेश्वर नि आत्मा तुमना मा वस्ती करस त तुमी पापमय स्वभाव ना प्रमाणे जीवन नका जगा, पण पवित्र आत्मा ना प्रमाणे जीवन जगा. ज्या माणुस ना जोळे पवित्र आत्मा नई तो ख्रिस्त ना नई.

10पण जर ख्रिस्त तुमना मा वास करस त पाप मुळे शरीर ले मरा वर बी धार्मिकता मुळे तुमनी आत्मा जीत्ती शे.

11कदी परमेश्वर नि आत्मा जेनी येशु ख्रिस्त ले मरेल मधून परत जित्ता कर, तुमना मा वास करस, त तोच तुमना नाशवान शरीरस्ले बी आपली आत्मा ना द्वारे जो तुमना मा बठेल शे, जित्ता करीन.

12एनासाठे ओ विश्वासी भावूसहोण, आमी कर्जदार त शेतस, पण पापमय स्वभाव ना नईत कि तेना प्रमाणे जीवन जगुत.

13कारण कि कदी तुमी पापमय स्वभाव प्रमाणे जीवन जगतस त तुमी परमेश्वर पासून दूर हुई जाश्यात. पण कदी आत्मा ना द्वारे पापमय कामस्ले मारश्यात, त तुमी जगश्यात.

14एनासाठे जीतला लोक परमेश्वर नि आत्मा ना प्रमाणे जीवन जगतस, त्याच परमेश्वर ना पोर शेतस.

15कारण कि परमेश्वर नि जी आत्मा तुमले दियेल शे ती तुमले गुलाम नई बनावत कि परत भयभीत हुई जावोत, पण ती आत्मा तुमले परमेश्वर ना पोर बनावस, त्या आत्मा कण प्रेरित हुईसन आमी जोरमा सांगतस, “अब्बा, ओ बाप.”

16परमेश्वर नि आत्मा स्वता आमनी आत्मा ना संगे जुळाईसन हय घोषणा करस कि आमी परमेश्वर ना पोर शेतस.

17जर आमी परमेश्वर ना पोर शेतस, त आमी त्या आशीर्वादस्मा बी ज्या तेनी तेना लोकस साठे ठीयेल शे वारीसदार शेतस, आणि कदी आमी ख्रिस्त ना सारखा दुख बी उचलसुत त तेना संगे महिमा बी भेटीन.

18मी समजस कि आमना वर जी महिमा प्रगट होणार शे, तेनी तुलना मा ह्या टाईम ना दुख आणि क्लेश काहीच नई शे.

19कारण कि पुरी सृष्टी मोठी आशा भरेल नजर कण परमेश्वर ना पोरस्ले प्रगट होवानी वाट देखी ऱ्हायनी.

20कारण कि जी सृष्टी परमेश्वर नि बनायेल होती तिनी आपला किंमत दवाळी टाक, अस एनासाठे नई हुईन कारण कि स्वता सृष्टी नि ईच्छा होती कि अस होवो, पण सृष्टीकरता परमेश्वर नि अस कर. पण हय आशा बी बनेल ऱ्हायनी.

21कि सृष्टी बी स्वताच विनाश ना दास्य मधून सुटीसन, परमेश्वर ना पोरस्नि महिमा नि स्वातंत्रता मा सहभागीता प्राप्त करीन.

22आमले माहिती शे कि पुरी सृष्टी आदाम ना पाप कराना टाईम पासून त आज लगून, जशी बाई जल्म देवानी पीडा ना टाईम ले कण्हस तशीच कण्ही ऱ्हायनी.

23आणि सृष्टीच नई, पण आमी बी मधमा-न-मधमा कण्ही ऱ्हायनूत. आमले पवित्र आत्मा भेटी जायेल शे, जो परमेश्वर नि महिमा ना पहिला फय शे. पण आमी आपला शरीर नि सुटका नि वाट देखी ऱ्हायनूत, जव आमी परमेश्वर ना दत्तक पोर होसुत.

24ह्या आशा मा आमना तारण हुईना. कदी कोणी ती गोष्ट देखस, जेनी तो आशा करस, त हय आशा नई म्हणावत. कारण कि माणुस ज्या वस्तू ले देखी ऱ्हायना शे, तेनी आशा काब करीन?

25पण ज्या वस्तू ले आमी नई देखतस, आणि तेनी आशा ठेवतस, त धीर धरीसन तेनी वाट बी देखतस.

26ह्याच प्रकारे पवित्र आत्मा बी आमनी दुर्बलता नि परिस्थिती मा आमनी मदत साठे आमना संगे जुळाई जास कारण कि आमले नई माहिती कि प्रार्थना कोणत्या प्रकारे कराले पाहिजे. पण पवित्र आत्मा स्वता आमना साठे मध्यस्थी हुईसन असा रळी-रळीसन, जी वर्णन ना बाहेर शे प्रार्थना करस.

27आणि परमेश्वर जो मनस्ले तपासणार शे, माहित शे कि आत्मा नि ईच्छा काय शे? कारण कि पवित्र आत्मा लोकस्ना साठे परमेश्वर नि ईच्छा प्रमाणे विनंती करस.

28आमले माहिती शे कि ज्या लोक परमेश्वर वर प्रेम ठेवतस, तेस्ना साठे सर्वा गोष्टी मियसन चांगलच उत्पन्न करतस, म्हणजे तेस्नाच साठे जेस्ले तेनी आपली ईच्छा ना प्रमाणे निवाळी लीयेल शे.

29कारण कि जेस्ले तेनी पहिले पासून निवाळी लीयेल शे तेस्ले पहिले पासून ठरायेल बी शे कि तेना पोऱ्या येशु ना स्वरूप मा होवोत, एनासाठे कि ख्रिस्त येशु गैरा भावूस्मा ज्येष्ठ शे.

30मंग जेस्ले परमेश्वर नि पहिले पासून निवाळीसन आल्लग कर, तेस्ले बलाव बी, आणि जेस्ले बलाव, तेस्ले धर्मी बी ठरायेल शे, आणि जेस्ले धर्मी ठराव, तेस्ले महिमा बी दियेल शे.

31मंग ह्या गोष्टीस्ना विषय मा आमी काय सांगुत? जर परमेश्वर आमना बाजुले शे, त आमना विरोधी कोण होवू सकस?

32तेनी आपला स्वता ना पोऱ्या ले बी नई वाचाळ, पण तेनी आमी सर्वास्ना साठे तेले अर्पण करी दिध. त इतल देवा नंतर, काय तो आमले आपला पोऱ्या ना संगे सर्व काही नई देवाव?

33परमेश्वर ना निवाळेलस्वर दोष कोण लाईन? कोणीच नई. कारण कि परमेश्वरच शे जो तेस्ले धर्मी ठरावणार शे.

34एनासाठे कोणी आमना वर दंड नि आदन्या नई देवू सकत, कारण कि येशु ख्रिस्तच शे जो आमना साठे मरणा आणि मरेल मधून परत जित्ता हुईग्या, आणि परमेश्वर ना उजवी कळे बठीसन आमना साठे विनंती करस.

35त मंग कोण आमले ख्रिस्त ना प्रेम पासून आल्लग करीन? काय क्लेश, संकट, उपद्रव, दुष्काळ, नग्नता, आपत्ती, कि तलवार असा करी सकतस?

36जस कि पवित्र शास्त्र मा लिखेल शे, “तुना साठे आमी दिन भर मारा मा येतस, आमी वध कराना मेंढी सारखा मोजामा एयेल शेतस.”

37पण या सर्वा गोष्टस्मा आमी तेना व्दारे जेनी आमना वर प्रेम करेल शे, विजयी तून बी जास्त वाळीसन शे.

38कारण कि मले निश्चित माहिती शे. कि नईत मृत्यु, नईत जीवन, नईत स्वर्गदूत, नईत सत्ता, नईत वर्तमान, नईत भविष्य, नईत सामर्थ्य, नईत उंची.

39नईत खोलाई, आणि नईत कोणी आणि सृष्टी आमले परमेश्वर ना प्रेम पासून जो आमना प्रभु ख्रिस्त येशु मा शे, आल्लग करू सकाव.

← Chapter 7 Jump to: Chapter 9 →