Romans 6

Ahirani (आहिराणी नवा करार) - No Year

← Chapter 5 Jump to: Chapter 7 →

1त आमी काय सांगुत? काय आमी पाप करत राहूत कि परमेश्वर नि कृपा वाळत राहो?

2कदीच नई. आमी पाप साठे मरी जायेल शेतस आणि एनासाठे आमी परत पाप करत नई राहाले पाहिजे.

3आमले माहिती शे कि जव आमी ख्रिस्त येशु ना बाप्तिस्मा लीधा, त आमी सर्वा तेनी मृत्यु ना बाप्तिस्मा लीधा.

4त आमना त्या बाप्तिस्मा द्वारे आमी तेना संगे गाळाई ग्युत आणि तेनी मृत्यु मा सहभागी हुयनूत, एनासाठे कि जसा ख्रिस्त बाप नि महिमा ना द्वारे मरेल मधून परत जित्ता करामा उना, तसाच आमी बी नवा जीवन ले जगुत.

5कारण कि कदी आमी बाप्तिस्मा ना द्वारे ख्रिस्त ना सारखा मरीसन तेना संगे एक हुई जायेल शेतस, त निश्चितच आमी तेना सारखा पुनरुत्थान मा बी तेना संगे जोळामा येसुत.

6आमले माहिती शे कि आमना जुना पापमय स्वभाव ख्रिस्त येशु ना संगे क्रूस वर चळावामा उना एनासाठे कि आमना शरीर मा पापमय स्वभाव नष्ट हुई जावो, आणि आमी पुळे पाप ना गुलामी मा नई राहोत.

7कारण कि जव आमी ख्रिस्त ना संगे मरी जायेल शेतस त पाप ना गुलामी मधून मुक्त हुई जायेल शेतस.

8एनासाठे कदी आमी ख्रिस्त ना संगे मरी ग्यात, त आमना विश्वास हवू शे कि तेना संगे जगसुत बी.

9कारण कि आमले माहिती शे कि ख्रिस्त मरेल मधून परत जित्ता होवा नंतर परत कदीच नई मराव. आते मृत्यु ना तेनावर कोणताच अधिकार नई.

10आणि एनासाठे, कारण कि तो मरी ग्या, त मृत्यु ना तेनावर कोणताच अधिकार नई. आणि आते तो जित्ता हुईसन परमेश्वर ना साठेच जगस.

11असाच तुमी बी स्वता ले पाप ना साठे मरेल समजा, पण परमेश्वर नि सेवा साठे ख्रिस्त येशु मा जित्ता समजा.

12एनासाठे पापमय वासना तुमना नाशवान शरीर मा राज्य नई कराले पाहिजे, कि तुमी तेनी लालुस्ना आधीन राहोत.

13आणि आपला शरीर ना आंगस्ले वाईट ना उद्देश्य ले पुरा करासाठे पापस्ले नका सोपा, पण स्वता ले मरेल मधून परत जित्ता हुयेल समजीसन धार्मिकता ना उद्देश्य ले पुरा करासाठे परमेश्वर ले सोपी द्या.

14तव तुमना वर पाप ना अधिकार नई राहाव, कारण कि तुमी मोशे ना नियम ना आधीन नई पण कृपा ना आधीन शेतस.

15त काय, आमी एनासाठे पाप करूत कारण कि आमी मोशे ना नियम ना आधीन नई पण परमेश्वर नि कृपा ना आधीन मा शेतस? कदीच नई.

16निश्चित तुमले माहिती शे कि जव तुमी स्वता ले कोणी आदन्या माना साठे दास सारखा सोपी देतस, तव तो व्यक्ती तुमना मालक बनी जास जेनी तुमी आदन्या मानतस. तुमी पाप ना दास बनी सकतस जेना परिणाम मृत्यु शे, व तुमी परमेश्वर नि आदन्या ले मानानी निवळ करू सकतस जेना परिणाम धार्मिकता शे.

17पहिले तुमी पाप ना दास होतात, पण आते तुमनी त्या शिक्षा ना पालन करेल शेतस जी तुमले भेटेल शे. आणि मी एनासाठे परमेश्वर ना धन्यवाद करस.

18परमेश्वर नि तुमले पाप नि सामर्थ्य कण सोळाव आणि आते तुमी धार्मिकता ना दास हुई जायेल शेतस.

19मी तुमनी शारीरिक दुर्बलता मुळे माणसस्नी रिती प्रमाणे सांगस. जसा पहिले तुमनी आपला शरीर ले अशुद्धता आणि अधर्म ना आधीन करेल होतात, जेना कण ते खराब हुई जायेल होत, तसाच आते आपला शारीरिक आंगस्ले पवित्रता ना साठे धार्मिकता दास म्हणीसन सोपी द्या.

20जव तुमी पाप ना दास होतात, तव तुमी धार्मिकता ना कामस्ले नई करू सकत होतात.

21तुमना त्या जुना जीवन कण जेना कण तुमी आते लज्जित होतस काय फायदा हुईना? कारण कि त्या कामस्ना फय त मृत्यु शे.

22पण आते तुमी पाप पासून मुक्त हुई जायेल शेतस आणि परमेश्वर ना दास बनी जायेल शेतस. आते तुमी त्या काम करतस जेस्ना कण पवित्रता भेटस, आणि तेना फय कायम ना जीवन शे.

23कारण कि पाप ना फय त मृत्यु शे, पण परमेश्वर ना कृपादान त कायम ना जीवन शे जो प्रभु येशु ख्रिस्त मा आमले भेटस.

← Chapter 5 Jump to: Chapter 7 →