Romans 2

Ahirani (आहिराणी नवा करार) - No Year

← Chapter 1 Jump to: Chapter 3 →

1एनासाठे, ओ दोष लावणार, तू कोणी का नई राहो, तू निरुत्तर शे. कारण कि ज्या गोष्ट मा तू दुसरास्वर दोष लावस त्याच गोष्ट मा स्वता ले बी दोषी ठरावस, एनासाठे कि तू जो दोष लावस स्वताच ते काम करस.

2आमले माहित शे कि परमेश्वर न्याय करणारा शे आणि असा काम करणारस्ले तो दंड दिन.

3पण, तू जो असा काम करणारस्वर दोष लावस आणि स्वता त्याच काम करस, काय हय समजस कि तू परमेश्वर ना दंड पासून वाची जाशी?

4काय तू परमेश्वर नि कृपा, आणि सहनशीलता, आणि धिरजरूपी धन ले तुच्छ समजस? काय हय नई समजस कि परमेश्वर नि कृपा तुले मन फिरावाले शिकाळस?

5पण एनासाठे कि तू कठोर शे आणि मन फिरावाले नकार करस, तू तेना राग ना दिन साठे, जेनामा परमेश्वर ना खरा न्याय हुईन, आपला साठे राग कमाई ऱ्हायना शे.

6कारण कि परमेश्वर प्रत्येक माणुस्ले तेस्ना कामस्ना प्रमाणे ज्या तेनी करेल शे फय दिन.

7ज्या लोक चांगला काम करत गौरव, आदर आणि अमरत्व ना शोध मा शे, परमेश्वर तेस्ले कायम ना जीवन दिन.

8पण ज्या तठ पाळणारा शेतस आणि सत्य ले नई मानीसन अधर्म वर चालतस, असास्वर परमेश्वर आपला राग आणि कोप ले ओतीन.

9क्लेश आणि संकट प्रत्येक माणसस्ना जीव वर ज्या वाईट करतस ईन, पहिले यहुदीस्वर मंग बिगर यहुदीस्वर.

10पण परमेश्वर प्रत्येक ले ज्या चांगल करतस गौरव, आदर आणि शांती दिन. पहिले यहुदीस्ले मंग बिगर यहुदीस्ले.

11कारण कि परमेश्वर प्रत्येक झनस्ना न्याय बिगर पक्षपात ना करीन.

12ज्या मोशे ना नियम ना आधीन नई होतात, कदी त्या नियमले बिगर वयखाना पाप करेल शेतस, त त्या नियमले बिगर वयखाना नाश बी होतीन. पण जेस्ले नियम माहिती हुईसन पाप करेल शेतस, तेस्ना न्याय बी नियम प्रमाणेच हुईन.

13कारण कि मोशे ना नियम ना गोष्टीस्ले आयकनारा परमेश्वर नि नजर मा धर्मी नई शेतस, पण मोशे ना नियम ना गोष्टीस्ना पालन करणारस्ले धर्मी ठरावामा ईन.

14बिगर यहुदीस जोळे मोशे ना नियम नई शेतस, पण जव कदी त्या स्वभाविक्ता कणच नियम ना गोष्टीस्ना प्रमाणे जीवन जगतस, त नियम तेस्ना जोळे नई राहातांना बी त्या स्वतास्ना साठे स्वताच नियम शेतस.

15तेस्नी वागणूक वरून हय प्रगट होस कि मोशे ना नियम तेस्ना हृदयस्वर लिखेल शे. तेस्ना विवेक बी हईच साक्ष देस कि हय सत्य शे, जव कि तेस्ना विचार तेस्ले कदी दोषी, त कदी निर्दोष ठरावतस.

16हय सगळ त्या दिन प्रगट करामा ईन, जव परमेश्वर, मनी सुवार्ता प्रमाणे, येशु ख्रिस्त ना द्वारे माणसस्ना गुप्त विचारस्ना न्याय करीन.

17पण तू, जो यहुदी म्हणावस, आणि मोशे ना नियम वर विश्वास ठेवस, आणि गर्व करस कि तू परमेश्वर ना निवाळेल लोकस मधला शे.

18तुले जेले तेनी ईच्छा माहिती शे आणि माहिती शे कि काय करान चांगल शे. कारण कि तुले एस्ना बारामा मोशे ना नियम मधून सिखाळामा एयेल शे.

19आणि स्वता ले अंधास्ना पुढारी आणि अंधकार मा पळेलस्ना उजाया समजस.

20निर्बुद्धीस्ले शिकाळनारा, आणि पोरस्ना उपदेशक समजस, आणि तुले खात्री शे कि ज्ञान, आणि सत्य ना नमुना जो मोशे ना नियम ना प्रमाणे शे, तुले भेटेल शे.

21म्हणून तू जो दुसरास्ले शिकाळस, स्वताःले काब नई शिकाळत? तू प्रचार करस “चोरी नका करज्यात.” आणि स्वताच चोरी करस.

22तू जे सांगस, “व्यभिचार नका करज्यात,” काय स्वताच व्यभिचार करस? तू जो मूर्तीस्नी घृणा करस, काय स्वताच मंदिरस्ले लूटस?

23तू जो गर्व करस कि परमेश्वर ना नियम तुना पा शे, त मंग मोशे ना नियम ना गोष्टी ना पालन नई करीसन काय तू परमेश्वर ना अनादर नई करत?

24जस कि शास्त्र मा लिखेल शे, “तुमी यहुदीस मुळे, बिगर यहुदीस्मा परमेश्वर ना नाव नि निंदा करामा एस.”

25कदी तू मोशे ना नियम ना गोष्टीस्ना पालन करशी, त तुना सुंता नि दशा कण तुले फायदा शे, पण कदी तू मोशे ना नियम ना गोष्टीस्ना उल्लंघन करस, त तुना सुंता बिगर सुंता नि दशा ठरणा.

26कदी कोणी बिगर यहुदी, जेना सुंता नई हुयेल राहो, जर तो मोशे ना नियम ना गोष्टीस्ना पालन करस, त परमेश्वर असा माणुस ले त्याच माणुस ना रूप मा देखस जेना सुंता हुयेल शे.

27त तो व्यक्ती जो शारीरिक दशा कण बिगर सुंता ना शे पण मोशे ना नियम ना गोष्टीस्ना पालन करस, तुनावर जो यहुदी शे दोष लाईन. कारण कि तुले मोशे ना लिखेल नियम भेटणा आणि तुना सुंता बी हुईना तरी बी तू मोशे ना नियम ना उल्लंघन करस.

28खरा यहुदी तो नई, जेना फक्त बाहेर ना स्वरूप यहुदीस सारखा शे आणि नईत खरा सुंता तो शे, जो बाहेर ना रूप कण फक्त शरीर माच करामा एयेल शे.

29पण खरा यहुदी तो शे, जो आपला मन मा यहुदी शे व खरा सुंता तो शे, जो पवित्र आत्मा ना द्वारे हृदय ना करामा एस, नई कि तो, जो फक्त नियम ना प्रमाणे करामा एस. ह्या प्रकार ना माणुस नि स्तुती माणसस्ना द्वारे नई, पण परमेश्वर ना द्वारे करामा एस.

← Chapter 1 Jump to: Chapter 3 →