Romans 5

Ahirani (आहिराणी नवा करार) - No Year

← Chapter 4 Jump to: Chapter 6 →

1एनासाठे जव आमी विश्वास कण धर्मी ठरनुत, त आपला प्रभु येशु ख्रिस्त ना त्या कामस्ना द्वारे ज्या तेनी आमना साठे करेल शेतस परमेश्वर ना संगे सामंजस्य ठेवो.

2आमना विश्वास मुळे, ख्रिस्त नि आमले ह्या कृपा मा पोहोचाळेल शे जेनामा आते आमी उभा शेतस, आते आमी परमेश्वर नि महिमा नि आशा मा खुशी करतस.

3फक्त हईच नई, पण आमी आमना क्लेशस्मा बी खुशी करतस, कारण कि आमले माहिती शे कि क्लेश पासून धीर,

4धीर पासून खरी नम्रता, व खरी नम्रता पासून आशा उत्पन्न होस.

5आणि हय आशा आमले लज्जित नई होवू देत, कारण कि परमेश्वर जी पवित्र आत्मा आमले दियेल शे, ती आमना हृदयस्ले परमेश्वर ना प्रेम कण भरी देस.

6कारण कि जव आमी असहायच होतुत त परमेश्वर ना निवाळेल टाईम वर ख्रिस्त भक्तीहीनस साठे मरणा.

7एखाद्या धर्मी झन साठे कोणी मरस, हय त कठीण शे, पण तरी होवू सकस एखाद्या चांगला माणुस साठे कोणी मरानी बी धाळस करीन.

8पण परमेश्वर नि आमले दाखाळ कि तो आमना वर कितला प्रेम करस, कि जव आमी पापीच होतुत तवच ख्रिस्त आमना साठे मरणा.

9म्हणून, जव कि आमी आते तेना रक्त मुळे धर्मी ठरनुत, त ख्रिस्त आमले निश्चितच परमेश्वर ना राग पासून बी वाचाळीन.

10आमी परमेश्वर ना शत्रू होतुत, पण परमेश्वर ना संगे आमनी सामंजस्य तेना पोऱ्या नि मृत्यु ना द्वारे हुईग्या. आते जव आमी परमेश्वर ना मित्र शेतस, त ख्रिस्त ना जीवन मुळे आमले तारण काब नई भेटाव?

11फक्त हईच नई, पण आमी आपला प्रभु येशु ख्रिस्त ना व्दारे, जेना व्दारे आमनी सामंजस्य हुयेल शे, परमेश्वर मा खुश होतस.

12पहिला माणुस आदाम ना द्वारे जेले परमेश्वर नि बनायेल होत पाप जग मा उना, आणि तेना पाप ना द्वारे मृत्यु उणी. तेना परिणाम स्वरूप मृत्यु सर्वा लोकस्मा पसरी गई, कारण कि सर्वास्नी पाप कर.

13मोशे ले नियम देवामा येवाना पहिले पाप जग मा होता, पण त्या पापस्ना हिसाब ठेवामा नई उना, कारण कि त्या टाईम ले कोणताच मोशे ना नियम नई होता जेना उल्लंघन करामा येत.

14तरी बी आदाम पासून त मोशे लगून मृत्यु पुरी माणुस जातीवर राज्य करत ऱ्हायनी, आठ लगून कि त्या लोकस्वर बी जेस्नी आदाम ना सारखी कोणती आदन्या ना उल्लंघन करा मुळे पाप नई करेल होतात, आदाम त्या व्यक्ती ना प्रतिक होता, जो येणार होता.

15पण आदाम ना पाप त्या वरदान ना सारखा नई शे जो परमेश्वर आमले कृपा कण देस. कारण कि एक माणुस ना अपराध कण गैरा माणस मरणात. पण परमेश्वर नि कृपा आणि धार्मिकता ना वरदान जो आमले त्या माणुस म्हणजे येशु ख्रिस्त ना द्वारे सर्वा माणसस साठे भेटेल शे जास्त शे.

16एक माणुस ना अपराध मा व परमेश्वर ना वरदान मा कोणतीच तुलना नई शे. कारण कि एक नाच अपराध ना परिणाम स्वरूप दंड नि आदन्या ना निर्णय हुईना, पण गैरा अपराधस मुळे परमेश्वर नि आमले असा कृपादान दिधा जो आमले तेनी नजर मा धर्मी बनाई टाकस.

17हय खर शे कि एक माणुस ना अपराध मुळे मृत्यु नि त्या एकच ना द्वारे राज्य कर. त ज्या लोकस्ले कृपा आणि धर्म रुपी वरदान विपुलता कण भेटस त्या एक माणुसस्ना, म्हणजे येशु ख्रिस्त ना व्दारे तेस्ले कायम ना जीवन भेटीन आणि तेना संगे त्या राज्य करतीन, कारण कि तेस्नी तेनावर विश्वास कर.

18एनासाठे जसा एक अपराध सर्वा माणसस साठे दंड नि आदन्या ना कारण बनना, तसाच एकच माणुस ना धार्मिकता ना काम कण सर्वा माणसस साठे पापस पासून माफी आणि कायम ना जीवन भेटणा.

19कारण कि जसा एक माणुस ना आदन्या ले नई माना मुळे गैरा लोक पापी ठरणात, तसाच एक माणुस ना आदन्या माना कण गैरा लोक धर्मी ठरतीन.

20मोशे ना नियम सर्वा माणसस्ले देवामा उना एनासाठे कि तेस्ले माहिती पळो कि त्या कितला पापी शेतस. पण जठे पाप गैरा हुईना तठे परमेश्वर नि कृपा तेना तून बी जास्त हुईनी.

21एनासाठे जस पाप नि मृत्यु पसारत राज्य कर, तसाच आमना प्रभु येशु ख्रिस्त ना द्वारे कृपा बी कायम ना जीवन साठे धर्मी ठरावत राज्य करो.

← Chapter 4 Jump to: Chapter 6 →