Romans 11

Ahirani (आहिराणी नवा करार) - No Year

← Chapter 10 Jump to: Chapter 12 →

1त मी हय प्रश्न ईचारस, काय परमेश्वर नि आपली प्रजा ले सोळी दियेल शे? कदीच नई. मी बी त इस्त्राएल देश ना शे, अब्राहाम ना वंश आणि बन्यामीन ना गोत्र मधून शे.

2परमेश्वर नि आपला लोकस्ले तेस्ले तेनी पहिले पासून निवाळेल शे, नई सोळ. तुमले माहिती शे कि परमेश्वर ना पुस्तक एलीया ना विषय मा काय सांगस, कि तो इस्त्राएल देश ना विरोध मा परमेश्वर ले विनंती करस?

3तेनी सांग, “ओ प्रभु, तेस्नी तुना भविष्यवक्तास्ना घात करेल शे, आणि तुन्या वेदीस्ले पाळी टाकेल शे, आणि मीच एखटा वाचेल शे, आणि त्या मना जीव ना बी शोध मा शेतस.”

4एनावर परमेश्वर नि तेले काय उत्तर दिध? “मनी आपला साठे सात हजार माणसस्ले राखी ठीयेल शे, जेस्नी बाल देवता नि मूर्ती समोर गुळघा नई टेकेल शेतस.”

5ह्याच प्रमाणे परमेश्वर नि आपला कृपा कण काही यहुदी लोकस्ले तेनी खरी प्रजा होवा साठे निवाळेल शे.

6तेनी निवळ तेनी कृपा वर आधारित शे, नईत कि तेस्ना कामस्वर ज्या तेस्नी करेल शेतस. कारण कि जर परमेश्वर नि निवळ लोकस्ना कामस प्रमाणे ऱ्हाती, त ती कृपा खरी कृपा नई ऱ्हाती.

7त एना परिणाम काय निघणा? इस्त्राएल देश ना लोक ज्या गोष्ट ना शोध मा होतात, ती तेस्ले नई भेटणी. पण निवाळेल लोकस्ले ती भेटी गई आणि बाकी लोकस्ना मन कठोर हुई ग्यात कि परमेश्वर नि नई आयकोत.

8जस पवित्र शास्त्र मा लिखेल शे, “परमेश्वर नि तेस्नी बुद्धी ले मंद बनाई टाकेल शे. तेनी तेस्ले असा डोया दिधा, ज्या देखतस नईत आणि असा कान, ज्या आयकतस नईत आणि तेस्नी हय दशा आज लगून तशीच शे.”

9आणि दाविद सांगस, “त्या आपली मेज मा अचानक धरामा येवोत, जशी चिळी जाय मा धराई जास आणि जनावर खड्डा मा पळस तसाच तेस्ले बी दंड भेटो.

10तेस्ना डोया अंधा हुई जावोत कि त्या देखी नई सकोत आणि तू तेस्नी कमर ले कायम साठे वाकाळी दे.”

11मी ईचारस, काय यहुदी लोक ठेस लागा मुळे कायम ना साठे खाले पळेल ऱ्हातीन? कदीच नई. एनासाठे कि तेस्नी विश्वास नई कर, येणा मुळे तारण बिगर यहुदीस साठे उपलब्ध शे कि इस्त्राएल देश ना लोक बयोत.

12यहुदीस्ना अपराध आणि तेस्नी कमी बिगर यहुदीस साठे संपत्ती ना कारण ठरणा, त तेस्नी परिपूर्णता कण कितला फायदा हुईन?

13आते मी तुमी बिगर यहुदीस्ले ह्या गोष्टी सांगस, जव कि मले बिगर यहुदीस्ले प्रचार करासाठे धाळामा एयेल शे, त मी आपली हय सेवा ना विषय मा गर्व बी करत.

14एनासाठे कि काही करीसन मी आपला यहुदी लोकस्मा ईर्ष्या उत्पन्न कराईसन तेस्ना मधून काही लोकस्ना तारण कराई सकू.

15कारण कि जव त्या सोळामा उनात, त तेस्ले सोळी देन जग ना लोकस साठे परमेश्वर मा सामंजस्य ना कारण ठरणा. त जव त्या ख्रिस्त येशु ले स्वीकार करतीन त तेना परिणाम काय हुईन? एना परिणाम मरेलस्ना साठे जीवन ना सारखा हुईन.

16जव परमेश्वर ले चळायेल भेट नि पहिली भाकर पवित्र ठरणी त पुरा गुंथायेल पीठ बी पवित्र शे. आणि जव मुय पवित्र ठरणा त फांद्या बी पवित्र ठरेल शेतस.

17कदी काही फांद्या कापीसन आल्लग करामा एयेल शेतस म्हणजे तुमी, ज्या बिगर यहुदी शेतस. तुमी जंगली जैतून शेतस, तुमी त्या फांद्यास्ना जागा वर शेतस ज्या कापामा एयेल शेतीस, तेस्ना जागा वर कलम ना सारखा लावामा एयेल शेतस आणि जैतून ना मुया व तेना रस-भांडार ना भागीदार बननात,

18त तुमी स्वता ले फांद्यास्तुन वाळीसन नका समजज्यात. कदी तुमले गर्व करन शे, त ध्यान मा ठेवा कि तुमी मुयास्ले नई समायतस पण मुया तुमले समायतस.

19तुमी सांगश्यात, “फांद्या एनासाठे कापीसन आल्लग करामा उनात कि मले कलम ना सारखा लावामा येवो.”

20हय खर शे, त्या एनासाठे कापामा उनात कारण कि तेस्नी विश्वास नई कर, जव कि तू विश्वास कण त्या जागा वर टिकेल ऱ्हास. पण ह्या गोष्ट वर गर्व नको करू पण सावधान ऱ्हाय.

21जव परमेश्वर नि यहुदीस्वर दया नई करी ज्या स्वभाविक फांद्या सारखा शेतस, त तो तुमना वर बी दया नई कराव.

22परमेश्वर नि दया आणि कठोरता वर विचार कर. ज्या पळी जायेल शेतस तेस्ना वर तो कठोरता करस, पण कदी तू तेनामा बनेल ऱ्हाशी त तुनावर कृपा होत राहीन, नईत तुले बी कापामा ईन.

23कदी यहुदी आपला अविश्वास ले सोळी देस, त तेस्ले बी कलम ना सारखा लावामा ईन. कारण कि परमेश्वर तेस्ले परत कलम लावामा समर्थ शे.

24कदी तुमी स्वभाव कण जंगली जैतून ना फांद्या शेतस आणि तेना पासून कापाईसन आपला स्वभाव ना विरुद्ध असली जैतून मा कलम लावामा एयेल शेतस, त त्या जास्त सरळता कण आपला स्वभाव ना प्रमाणे आपलाच जैतून मा कलम लावामा एश्यात.

25ओ विश्वासी भावूसहोण, कदी अस नई हुई जावो कि तुमी स्वता ले हुशार समजी लेवोत. एनासाठे मनी ईच्छा नई शे कि तुमी ह्या रहस्य ना विषयी मा अज्ञानी राहोत कि जठ लगून बिगर यहुदी पुरी रिती कण प्रवेश नई करी लेत. तठ लगून इस्त्राएल देश ना एक भाग असाच कठोर राहीन.

26आणि ह्या प्रकारे पुरा इस्त्राएल देश ना लोकस्ले तारण प्राप्त हुईन, जस कि पवित्र शास्त्र मा लिखेल शे, “तारणार न येन सियोन पासून हुईन आणि तो याकोब ना वंश पासून अधर्म ले दूर करीन.

27आणि तेस्ना संगे मना हवू नवा करार राहीन, जव कि मी तेस्ना पापस्ले माफ करी दिसू.”

28तेस्नी सुवार्ता वर विश्वास नई कर एनासाठे त्या तुमना मुळे परमेश्वर ना शत्रू शेतस. पण निवाळी लेवाना भाव कण त्या पूर्वजस मुळे प्रिय शेतस.

29कारण कि जेस्ले परमेश्वर नि निवाळ आणि आशीर्वादित करेल शे तेस्ना प्रती तो आपला मन कदीच नई बदलत.

30कारण कि जसा तुमी बिगर यहुदीस्नी पहिले परमेश्वर ना आदन्यास्ले नई मान, पण आते यहुदीस्नी आदन्या नई माना मुळे तुमना वर दया करामा एयेल शे.

31ह्याच प्रकारे, त्या दया मुळे जी तुमना वर हुयेल शे, आते यहुदी आदन्या नई मानतस एनासाठे त्या बी परमेश्वर नि दया ले प्राप्त करी सकोत.

32कारण कि परमेश्वर नि सर्वा लोकस्ले आदन्या उल्लंघन ना कैदी बनाई ठेयेल शे, एनासाठे कि तो सर्वास्वर दया करो.

33परमेश्वर नि दया कितली महान शे. तेनी बुद्धी आणि ज्ञान कितला महान शे, तेना निर्णयस्ले कोण समजाळू सकस? तेना रस्तास्ना विषय मा कोण समजी सकस?

34जस कि पवित्र शास्त्र मा लिखेल शे, “प्रभु ना मन ले कोण समजू सकस? कोण तेले सल्ला देवू सकस?

35काय कोणी परमेश्वर ले कदी काही दियेल शे, जो तो बदला मा काही भेटाना दावा करी सको?”

36सर्व काही परमेश्वर पासून, परमेश्वर ना द्वारे व परमेश्वर साठे शे. तेनी महिमा युगानयुग होत राहो. आमेन.

← Chapter 10 Jump to: Chapter 12 →