1 Samuel 1

Ilonggo (Maayong Balita nga Biblia (2012))

Jump to: Chapter 2 →

1May isa ka tawo gikan sa tribo ni Efraim nga ginahingalanan kay Elkana, nga nagaestar sa banwa sang Rama, sa kabakuloran sang Efraim. Anak sia ni Jeroham, kag apo ni Elihu, sa panimalay ni Tohu, sa kabarangayan ni Zuf.

2Si Elkana may duha ka asawa nga amo sanday Ana kag Penina. Si Penina may mga kabataan, pero si Ana iya wala.

3Tagsa ka tuig si Elkana nagakadto sa Silo halin sa iya banwa sa pagsimba kag sa pagdulot sing mga halad sa Ginoo nga Makagagahom, sa diin si Opni kag si Fineas nga mga anak ni Eli amo ang mga pari sang Ginoo.

4Sa tagsa ka pagdulot ni Elkana sang iya halad, ginapartihan niya si Penina kag ang tanan niya nga mga anak.

5Pero si Ana ginahatagan niya sang pinasahi nga parti tungod kay iya gid sia ginahigugma, bisan ang Ginoo naghimo sa iya nga baw-as.

6Ginapaugtas kag ginapakahuy-an sia ni Penina nga iya ribal tungod kay ang Ginoo naghimo sa iya nga baw-as.

7Amo ini ang nagakahanabo tuigtuig: kon sila magkadto sa balay sang Ginoo, si Penina nagapaugtas kay Ana sa bagay nga nagahibi sia kag indi na magkaon.

8Ang iya bana nga si Elkana nagapamangkot sa iya, “Ana, ngaa nagahibi ka? Ngaa indi ka magkaon? Ngaa pirme ka lang nagapangasubo? Indi bala nga ako labi pa para sa imo sang sa napulo ka mga anak nga lalaki?”

9Isa sadto ka tion sa Silo, sang makatapos sila kaon, si Ana nagtindog kag naglakat sa pagpangamuyo. Karon si Eli nga pari nagapungko sa tupad sang pwertahan sang balay sang Ginoo.

10Si Ana natublag gid kag naghilibion nga nagpangamuyo sa Ginoo.

11Nagpanumpa sia sa Ginoo nga nagasiling: “O Ginoo nga Makagagahom, tamda ang imo alagad! Tan-awa ang akon pag-antos kag dumdoma ako! Indi ako pagkalimti! Kon hatagan mo ako sing anak nga lalaki, nagasaad ako nga ihalad ko sia sa imo sa bug-os niya nga kabuhi, kag indi gid sia pagpaguntingan sang iya buhok.”

12Nagpadayon si Ana sa pagpangamuyo sa Ginoo sing malawig nga tion, kag si Eli nagabantay sang iya mga bibig.

13Nagapangamuyo sia sing mahipos, kag bisan ang iya mga bibig nagahulag, pero indi mabatian ang iya tingog. Gani si Eli naghunahuna nga sia hubog

14kag nagsiling sa iya, “Indi ka maghinubog! Untati ang pag-inom agod maumpawan ka!”

15Nagsabat sia, “Indi ako hubog. Wala ako nakainom! Daku gid ang akon kalisod, kag nagapangamuyo ako kag nagasugid sang akon mga kabug-atan sa Ginoo.

16Indi ka maghunahuna nga ako isa ka talamayon nga babayi. Nagapangamuyo ako subong sini kay puno ako sing kalisod.”

17Nagsiling si Eli, “Lakat ka kag indi na magpalibog. Kabay nga ang Dios sang Israel maghatag sang imo ginapangayo.”

18Nagsabat sia, “Kabay nga magmaluloy-on ka pirme sa akon.” Gani naglakat sia kag nagkaon nga wala na nagapangasubo.

19Sang madason nga adlaw si Elkana kag ang iya panimalay nagbangon sing aga pa gid kag nagsimba sa Ginoo. Dayon nagpauli sila sa Rama. Si Elkana nagpakighirop sa iya asawa nga si Ana, kag ang Ginoo nagsabat sang pangamuyo ni Ana.

20Gani sa nagakaigo nga panahon nagbusong sia kag nag-anak sang isa ka bata nga lalaki. Ginhingalanan niya ang iya bata kay Samuel kay siling niya, “Ginpangayo ko sia sa Ginoo.”

21Sa liwat nag-abot ang tion nga si Elkana kag ang iya panimalay magakadto sa Silo kag magdulot sa Ginoo sang tuigan kag pinasahi nga halad nga iya ginsaad.

22Pero sa sini nga tion si Ana wala mag-upod. Nagsiling sia sa iya bana, “Sa tapos malutas ang bata, dalhon ko sia sa balay sang Ginoo, sa diin magapabilin sia sa bug-os niya nga kabuhi.”

23Nagsabat si Elkana, “Sigi, himua ang ginahunahuna mo nga labing maayo, kag magapabilin ka diri sa balay tubtob malutas ang bata. Kabay nga itugot sang Ginoo nga matuman ang imo saad.” Gani si Ana nagpabilin sa balay kag nag-atipan sang iya bata.

24Sang malutas na niya ang bata, gindala niya sia sa Silo, kag may dala man sia nga toro nga baka nga tatlo ka tuig ang edad, tunga sa sako nga harina, kag isa ka sulodlan nga panit nga puno sang bino. Samtang diutay pa ang bata, gindala niya sia sa balay sang Ginoo sa Silo.

25Sa tapos nila maihaw ang toro nga baka, gindala nila ang bata kay Eli.

26Si Ana nagsiling sa iya, “Nadumdoman mo pa bala ako? Ako ang babayi nga imo anay nakita nga nagatindog diri, nga nagapangamuyo sa Ginoo.

27Nagpangayo ako sa iya sini nga bata, kag ginhatag niya ang akon ginpangayo.

28Gani ginahalad ko sia sa Ginoo. Tubtob nga sia nagakabuhi mangin-iya sia sang Ginoo.” Dayon nagsimba sila didto sa Ginoo.

Jump to: Chapter 2 →