1 Samuel 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Si Samuel nagsiling sa mga tawo sang Israel, “Yari karon, ginhimo ko ang inyo ginpangayo sa akon. Ginhatagan ko kamo sing hari nga maggahom sa inyo.

2Karon yara na sia sa pagtuytoy sa inyo. Kon parti sa akon, tigulang kag ubanon na ako, kag ang akon mga anak nga lalaki yara upod sa inyo. Nanginpangulo ako ninyo halin sang pamatan-on pa ako tubtob karon.

3Kon may nahimo ako nga sayop, yari ako, isumbong ninyo ako karon sa presensya sang Ginoo kag sa hari nga iya ginpili. May baka bala sang iban ukon asno nga ginkuha ako? May isa bala nga gindayaan ako ukon ginpigos? May ginbaton bala ako nga hamham gikan sa bisan kay sin-o? Kon may nahimo ako bisan isa sa sining mga butang, magabayad ako sa bisan ano nga akon ginkuha.”

4Ang mga tawo nagsabat, “Wala ikaw magdaya sa amon, ukon magpigos sa amon; wala ikaw sang may ginkuha sa bisan kay sin-o.”

5Si Samuel nagsabat, “Ang Ginoo kag ang hari nga iya ginpili mga saksi sa inyo karon nga adlaw nga suno sa inyo wala ako sing sala.” Nagsabat sila, “Ang Ginoo amo ang amon saksi.”

6Si Samuel nagpadayon, “Ang Ginoo amo ang nagpili kay Moises kag kay Aaron, kag nagdala sang inyo mga katigulangan pa gwa sa Ehipto.

7Karon pabilin kamo sa inyo ginatindugan, kag isumbong ko kamo sa atubang sang Ginoo, paagi sa pagpahanumdom sa inyo sang tanan nga gamhanan nga mga buhat sang Ginoo sa pagluwas sa inyo kag sa inyo mga katigulangan.

8Sang si Jacob kag ang iya panimalay nagkadto sa Ehipto, ginpigos sila sang mga Ehiptohanon. Gani ang inyo mga katigulangan nagpangayo sing bulig sa Ginoo, kag iya ginpadala si Moises kag si Aaron nga nagpagwa sa ila sa Ehipto kag ginpaestar sila sa sini nga duta.

9Pero ginkalimtan nila ang Ginoo nga ila Dios, kag gintugotan niya si Sisera nga heneral sang mga soldado sang siudad sang Hasor, kag ang mga Filistinhon, kag ang hari sang Moab sa pagpakig-away batok sa ila kag ginlutos sila.

10Dayon nagpangayo sila sing bulig sa Ginoo kag nagsiling, ‘Nakasala kami, tungod kay nagtalikod kami sa imo, O Ginoo, kag nagsimba sa mga diosdios ni Baal kag mga diosdios ni Astarot. Luwasa kami sa amon mga kaaway, O Ginoo, kag magasimba kami sa imo!’

11Kag ang Ginoo nagpadala kay Gideon, kay Barak, kay Jepte, kag sa akon, nga nagluwas sa inyo gikan sa inyo mga kaaway, kag nagkabuhi kamo nga may paghidait.

12Kag sang makita ninyo nga si Haring Nahas sang Amon nagapakadto sa pagsalakay sa inyo, ginsikway ninyo ang Ginoo subong inyo hari kag nagsiling sa akon, ‘Luyag namon nga may hari nga magagahom sa amon.’

13“Kag yari karon ang hari nga inyo ginpili, ginpangayo ninyo sia, kag karon ginhatag sia sang Ginoo sa inyo.

14Wala sing malain nga mahanabo sa inyo kon magkahadlok kamo sa Ginoo nga inyo Dios, mag-alagad sa iya, magpamati sa iya, kag magtuman sang iya mga sugo, kag kon kamo kag ang inyo hari magsunod sa iya.

15Pero kon indi kamo magpamati sa Ginoo kag indi magtuman sang iya mga sugo, magasumpong sia sa inyo kag sa inyo hari.

16Gani karon, pahimunong kamo kag makita ninyo ang gamhanan nga mga buhat nga pagahimuon sang Ginoo.

17Tingadlaw karon, indi bala? Magapangamuyo ako kag ang Ginoo magapadala sing daguob kag ulan. Kay kon inyo makita ini, inyo matalupangdan nga nakahimo kamo sang daku nga sala batok sa Ginoo sa inyo pagpangayo sa iya sing hari.”

18Gani nagpangamuyo si Samuel kag sa amo gid nga adlaw ang Ginoo nagpadala sing daguob kag ulan. Dayon ang tanan nga mga tawo hinadlukan sa Ginoo kag sa kay Samuel,

19kag nagsiling sila kay Samuel, “Kon mahimo pangamuyo ka sa Ginoo nga imo Dios para sa amon, agod nga indi kami magkalamatay. Luas sang madamo namon nga mga sala, nakasala pa gid kami sa pagpangayo sing hari.”

20Si Samuel nagsabat, “Indi kamo magkahadlok. Bisan pa nga nakahimo kamo sing malaut nga butang, indi kamo magbiya sa Ginoo, kundi alagara sia sa bug-os ninyo nga tagipusoon.

21Indi kamo magdangop sa diosdios, indi sila makabulig ukon makaluwas sa inyo, tungod kay indi sila matuod nga Dios.

22Ang Ginoo nagpanumpa, kag indi niya kamo pagpatumbayaan, tungod kay nagpamat-od sia sa paghimo sa inyo nga iya kaugalingon nga mga tawo.

23Kon nahanungod sa akon, ipahilayo lang sang Ginoo nga makasala ako batok sa iya sa pag-untat sa pagpangamuyo para sa inyo. Sa baylo pagatudloan ko kamo sang maayo kag matarong nga himuon ninyo.

24Magtahod kamo sa Ginoo kag mag-alagad sa iya sing matutom sa bug-os ninyo nga tagipusoon. Dumdoma ang dalagku nga mga butang nga ginhimo sang Ginoo sa inyo.

25Pero kon magpadayon kamo sa pagpakasala, kamo kag ang inyo hari malaglag.”

← Chapter 11 Jump to: Chapter 13 →