1 Samuel 20

Ilonggo (Maayong Balita nga Biblia (2012))

← Chapter 19 Jump to: Chapter 21 →

1Karon si David nagpalagyo halin sa Nayot sa Rama, nagkadto kay Jonatan kag nagsiling sa iya, “Ano bala ang akon nahimo? Ano bala ang sala ko? Ano bala nga sayop ang akon nahimo sa imo amay nga nagatinguha sia sa pagpatay sa akon?”

2Nagsabat si Jonatan, “Ang Dios indi magtugot nga mapatay ikaw! Ang akon amay wala sing may ginatago sa akon sang tanan nga iya ginahimo importante ukon indi, kag indi niya ini pag-ilikom sa akon. Indi ina matabo!”

3Pero si David nagsabat, “Ang imo amay nakahibalo gid kon daw ano ang imo pagpalangga sa akon, kag ginpakamaayo niya nga indi ka pagpahibal-on sang iya pagahimuon, kay basi magkalisod ka. Nagasumpa ako sa imo sa ngalan sang buhi nga Ginoo nga yara na ako sa bibi sang kamatayon!”

4Nagsiling si Jonatan, “Himuon ko ang bisan ano nga luyag mo.”

5Nagsabat si David, “Buas amo ang Piesta sang Lati, kag dapat ako magkaon upod sa hari. Pero kon tugotan mo, malakat ako kag magpanago sa uma tubtob sa gab-i sang ikatlo nga adlaw.

6Kon matalupangdan sang imo amay nga wala ako sa lamisa, singgana sia nga nagpangayo ako sing pahanugot sa imo sa pagpauli sa gilayon sa Betlehem, kay amo ini ang tion para sa tuigan nga paghalad didto para sa akon bug-os nga panimalay.

7Kon magsiling sia, ‘Wala kaso,’ wala ako sing katalagman, pero kon maakig sia, pat-od gid nga malain ang iya himuon sa akon.

8Kon mahimo buligi ako, kag tumana ang imo ginsaad sa akon sa presensya sang Ginoo. Pero kon may sala ako, ikaw mismo ang magpatay sa akon! Ngaa nga dalhon mo pa ako sa imo amay agod patyon?”

9Nagsabat si Jonatan, “Indi ka maghunahuna subong sina! Kon mapat-od ko nga malain gid ang himuon sang akon amay sa imo, sugiran ko ikaw.”

10Dayon nagpamangkot si David, “Paano ang pagpahibalo mo sa akon kon ang imo amay magsabat sa imo nga may kaakig?”

11Nagsabat si Jonatan, “Dali makadto kita sa uma.” Gani naglakat sila,

12kag si Jonatan nagsiling kay David, “Kabay ang Ginoong Dios sang Israel mangin-aton saksi! Buas ukon sa isa ka buas sa sini nga oras magapamangkot ako sa akon amay. Kon ang iya panimuot sa imo maayo, pahibaluon ko ikaw.

13Kon may malain sia nga tuyo sa imo, kabay ang Ginoo magpatay sa akon kon indi ko ikaw pagpahibal-on agod makapalagyo ikaw. Kabay nga ang Ginoo mag-upod sa imo subong sang iya pag-upod sa akon amay!

14Kag karon, samtang buhi pa ako, kon mahimo tumana ang imo ginsaad sa akon sa presensya sang Ginoo kag mag-unong ka sa akon, pero kon mapatay ako,

15ipakita mo ang amo man nga kaayo sa akon panimalay sa wala sing katapusan. Kag kon malaglag na sing bug-os sang Ginoo ang tanan mo nga mga kaaway,

16kabay nga ang aton saad sa isa kag isa matuman gid. Kon indi ini matuman, ang Ginoo magasilot sa imo.”

17Sa liwat ginpasumpa ni Jonatan si David sa paghigugma sa iya, tungod kay ginhigugma niya si David subong sang paghigugma niya sang iya kaugalingon.

18Dayon si Jonatan nagsiling sa iya, “Buas amo ang Piesta sang Lati, kag matalupangdan gid kon wala ka didto sa kalan-an.

19Sa isa ka buas matalupangdan pa gid kon wala ka didto, gani kadto ka sa ginpanaguan mo anay, kag magpanago ka sa tinumpukan sang mga bato didto.

20Dayon magapana ako sing tatlo ka mga baslay pakadto didto, nga daw may iguon ako.

21Dayon magasiling ako sa akon suloguon nga kadtuan kag pangitaon ang mga baslay. Kag kon magsiling ako sa iya, ‘Tan-awa, ang mga baslay diri lang nayon sa imo, kuhaa sila,’ kon sayuron nga wala ikaw sing katalagman kag sarang ka makagwa sa imo ginapanaguan. Nagasumpa ako sa buhi nga Ginoo nga wala ikaw sing katalagman.

22Pero kon magsiling ako sa iya, ‘Tan-awa, ang mga baslay yara sa unhan nimo,’ maglakat ka dayon, tungod kay ang Ginoo nagapapalagyo sa imo.

23Kon nahanungod sa saad nga aton ginhimo sa isa kag isa, ang Ginoo magabulig nga aton gid ini tumanon sa walay katubtoban.”

24Gani nagpanago si David sa kaumhan. Sa tion sang Piesta sang Lati, si Haring Saul nagpungko agod magkaon,

25kag didto sia nagpungko sa iya pirme ginapungkuan malapit sa dingding. Si Abner nagpungko sa tupad niya, kag si Jonatan nagpungko man sa pihak sang lamisa nga nagaatubang sa iya. Ang pulongkuan ni David wala sing may nagapungko,

26pero wala sing may ginhambal si Saul sadto nga adlaw, tungod kay naghunahuna sia nga may nahanabo sa iya, kag indi pa sia matinlo.

27Sa madason nga adlaw, sa tapos ang Piesta sang Lati, ang pulongkuan ni David wala gihapon sing may nagapungko. Gani si Saul nagpamangkot kay Jonatan, “Ngaa nga wala mag-abot si David sa pagkaon kahapon kag karon nga adlaw?”

28Nagsabat si Jonatan, “Naglisensya sia sa akon nga makadto sia sa Betlehem.

29Nagsiling sia, ‘Kon mahimo tugotan mo ako sa paglakat tungod kay ang akon panimalay magahalad sa banwa, kag ang akon utod nga lalaki nagmando sa akon nga magtambong gid ako. Gani karon kon abyan mo ako, tugotan mo ako sa paglakat kag magpakigkita sa akon mga pariente.’ Amo ina nga wala sia diri sa iya pulongkuan sa imo lamisa.”

30Naakig gid si Saul kay Jonatan kag nagsiling sa iya, “Unon ka gid nga bata! Traidor! Karon nahibaluan ko nga nagaapin ka kay David, kag nagapakahuya sang imo kaugalingon kag sang imo iloy!

31Tubtob nga buhi si David, indi gid ikaw manginhari sini nga pungsod. Karon kuhaa sia didto kag dalha diri, dapat sia mapatay!”

32Nagsabat si Jonatan, “Ngaa bala dapat sia patyon? Ano ang iya nahimo?”

33Pagsiling niya sini, ginbangkaw sia ni Saul sa pagpatay sa iya, kag nahibaluan ni Jonatan nga ang iya amay nagtapat sa pagpatay kay David.

34Naghalin si Jonatan sa lamisa nga naakig gid kag wala magkaon sa sina nga adlaw—ang ikaduha nga adlaw sang Piesta sang Lati. Nagkalisod gid sia nahanungod kay David tungod kay si Saul nagpakahuya kay David.

35Sang madason nga aga si Jonatan nagkadto sa uma sa pagpakigkita kay David, suno sa ila ginkaisahan. Nagdala sia sing bata nga lalaki,

36kag nagsiling sa iya, “Dalagan ka kag pangitaon ang mga baslay nga akon ipana.” Ang bata nagdalagan kag si Jonatan nagpana sang baslay sa unhan niya.

37Sang pag-abot sang bata sa lugar nga natup-an sang baslay, nagsinggit si Jonatan sa iya, “Ang baslay yara sa unhan mo!

38Indi ka maghinayhinay! Dalidali-a!” Ginpulot sang bata ang baslay kag ginhatag sa iya agalon,

39nga wala kahibalo kon ano ang kahulogan sadto kay si Jonatan lamang kag si David ang nakahibalo.

40Ginhatag ni Jonatan ang iya mga hinganiban sa bata kag ginsingganan sia nga dalhon ini pabalik sa banwa.

41Sang makalakat na ang bata, naggwa si David gikan sa iya ginapanaguan nga tinumpukan sang mga bato, nagluhod sa duta kag nagsaludo sing makatlo nga ang guya nagaduot sa duta. Sia kag si Jonatan naghibi kag naghaksanay. Ang kasubo ni David sobra pa sang sa kay Jonatan.

42Dayon si Jonatan nagsiling kay David, “Kabay ang Dios magaupod sa imo. Ang Ginoo magabulig sa imo kag sa akon, kag sa aton mga kaliwat sa pagtuman sang aton ginsaad sa presensya sang Ginoo.” Dayon naglakat si David, kag si Jonatan nagbalik sa banwa.

← Chapter 19 Jump to: Chapter 21 →